Ezekiel 24

Sinhala Bile - Revised Old Version (SROV)

← Chapter 23 Jump to: Chapter 25 →

1නවවෙනි අවුරුද්දේ දසවෙනි මාසයේ දසවෙනිදා ස්වාමීන්වහන්සේ ගේ වචනය මා වෙතට පැමිණ කියනුයේ:

2මනුෂ්‍ය පුත්‍රය, දවසේ, එනම් මේ අද දවසේම නම ලියාගන්න. බබිලෝනියේ රජ මේ අද දවසේදීම යෙරුසලමට ළංවී සිටියේය.

3කැරළිකාර වංශයට උපමාවක් කියමින්: ස්වාමිවූ දෙවියන්වහන්සේ මෙසේ කියනසේකැයි ඔවුන්ට කියන්නහැළිය ලිපේ තබන්න; ඒක තබා වතුරත් එහි වත්කරන්න.

4ඊට අයිති කෑලි වන සියලු හොඳ කෑලි පස්සා ගාතයද ඉස්සරහ ගාතයද ඇතුව එහි එකතුකර, ඉතා හොඳ ඇට ඇති ඒවායෙන් පුරවන්න.

5එළු බැටළු රැළෙන් හොඳ එවුන් ගන්න, ඒක යට ඇට ගොඩක් තබන්න. ඒක හොඳට උතුරවා, එහි තුළ තිබෙන ඇටත් තම්බන්න.

6එබැවින් ස්වාමිවූ දෙවියන්වහන්සේ මෙසේ කියනසේක: ලේ වගුරුවන නුවරට දුක්වේ! ඒක මලකඩ ඇති හැළියක්ය, ඒකේ මලකඩ ඒකෙන් ඇරිලා නැත; ඒකේ සෑම කෑලි පිටින්ම එය ඇර දමන්න. ඊට කිසි පසඇටයක් වැටුණේ නැත.

7මක්නිසාද ඇගේ ලේ ඈ ඇතුළෙහි ඇත්තේය; ඈ ඒවා පස්වලින් වැසීයන්ට පොළොව පිට වගුරුවන්නේ නැතුව පස් නැති පර්වතය උඩ තැබුවාය.

8ඇගේ ලේ වැසී නොයන හැටියට, පළිගන්න පිණිස කෝපය ඇවිස්සවීමට, මම ඒවා පස් නැති පර්වතය උඩ තැබීමි.

9එබැවින් ස්වාමිවූ දෙවියන්වහන්සේ මෙසේ කියනසේක: ලේ වගුරුවන නුවරට දුක්වේ! මමත් දර සෑය මහත්කරන්නෙමි.

10බොහෝ දර දමා, ගින්දර අවුළවා, මස් තම්බාදමා, කලවමක් කර, ඇටත් පුළුස්සා දමන්න.

11එවිට ඒකේ පිත්තල රත්වී ගිනියම්වී, ඒකේ අපවිත්‍රකම ඒක ඇතුළෙහි උණුවී, ඒකේ මලකඩ නැතිවී යන පිණිස, ඒක ගිනිඅඟුරු පිට හිස්ව තබන්න.

12ඈ වීර්යකිරීමෙන් වෙහෙසුණු නුමුත්, ඇඟේ බොහෝ මලකඩ ඇඟෙන් පහව නොයයි; ඇගේ මලකඩ ගින්නෙන් පවා පහව නොයයි.

13ඔබේ අපවිත්‍රකම දූෂිතය. මක්නිසාද මා විසින් ඔබ පිරිසිදුකරමින් සිටි නුමුත් ඔබේ අපවිත්‍රකමෙන් ඔබ පිරිසිදුවුණේ නැත; මාගේ කෝපය ඔබ කෙරෙහි සංසිඳුවාගන්න තුරු ඔබ තවත් පිරිසිදුකරනු නොලබන්නෙහිය.

14ස්වාමීන්වහන්සේ වන මම ඒක කීයෙමි. ඒක සිදුවන්නේය, මම ඒක කරන්නෙමි; මා පසුබටවෙන්නේවත් දයාවෙන්නේවත් තැවෙන්නේවත් නැත; ඔබේ මාර්ගවලද ක්‍රියාවලද හැටියට ඔව්හු ඔබ විනිශ්චයකරන්නෝයයි ස්වාමිවූ දෙවියන්වහන්සේ කියනසේකැයි කීය.

15ස්වාමීන්වහන්සේ ගේ වචනය මා වෙතට පැමිණ කියනුයේ:

16මනුෂ්‍ය පුත්‍රය, මෙන්න, ඔබේ ඇස්වලට ප්‍රියවූ දේ එක පහරකින් ඔබෙන් ගනිමි. එහෙත් ඔබ විලාප නොකිය යුතුය, නොහැඬිය යුතුය, ඔබේ කඳුළුත් නොවැගිරියයුතුය.

17නිශ්ශබ්දව සුසුම්ලා, මළවුන් ගැන වැලපීමක් නොකර, ඔබේ තොප්පිය හිසේ බැඳගෙන; ඔබේ වහන් පාදවල දමාගන්න, තොල් වසා නොගෙන, මිනිසුන්ගේ රොටිද නොකා සිටින්නැයි කීය.

18එබැවින් මම උදයේ සෙනඟට කථාකෙළෙමි; සවස මාගේ භාර්යාව මළාය. මට අණකළ ලෙස උදයේදී කෙළෙමි.

19සෙනඟද: ඔබ කරන මේ දේ අපට අදාළවෙන හැටි ඔබ අපට නොකියන්නෙහිදැයි මාගෙන් ඇසුවෝය.

20එවිට මම ඔවුන්ට කථාකොට: ස්වාමීන්වහන්සේ ගේ වචනය මා වෙතට පැමිණ මෙසේ කීයේය ස්වාමිවූ දෙවියන්වහන්සේ මෙසේ කියනසේකැයි ඉශ්‍රායෙල් වංශයට කියන්න.

21බලව, මම ඔබ සැමගේ බලයේ පාරට්ටුව වූ, ඔබ සැමගේ ඇස්වලට ප්‍රියව තිබෙන්නාවූ, ඔබ සැමගේ ආත්ම ආශාවෙන්නාවූ මාගේ ශුද්ධස්ථානය කෙලහන්නෙමි; ඔබ සැම විසින් අත්හැර ආවාවූ ඔබ සැමගේ පුත්‍රයෝද ඔබ සැමගේ දූවරුද කඩුවෙන් වැටෙන්නෝය.

22මා කළාක්මෙන් ඔබ සැමත් කරනවා ඇත. ඔබ සැම තොල් වසා නොගෙන, මිනිසුන්ගේ රොටිද නොකා සිටිනවා ඇත.

23ඔබ සැමගේ තොප්පි ඔබ සැමගේ හිස්වලද ඔබ සැමගේ වහන් ඔබ සැමගේ පාදවලද වන්නේය. ඔබ සැම විලාප කියන්නේවත් අඬන්නේවත් නැත; ඔබ සැමගේ අයුතුකම්වලින් ඔබ සැම ෂයවී ගොස්, එකිනෙකා දෙස බලා සුසුම්ලනවා ඇත.

24මෙසේ එසකියෙල් ඔබ සැමට සලකුණක් වන්නේය; ඔහු කළ සියල්ල ලෙස ඔබ සැම කරනවා ඇත. මේක පැමිණි කළ මා ස්වාමිවූ දෙවියන්වහන්සේ බව ඔබ සැම දැනගන්නවා ඇත.

25ඉතින් මනුෂ්‍ය පුත්‍රය, ඔවුන්ගේ බලයද ඔවුන්ගේ තේජසේ ප්‍රීතියද ඔවුන්ගේ ඇස්වලට ප්‍රියව තිබෙන්නාවූ, ඔවුන්ගේ ආත්ම ආශාවෙන්නාවූ දේද ඔවුන්ගේ පුත්‍රයන්ද දූවරුන්ද මා විසින් ඔවුන්ගෙන් පැහැරගන්න දවසේදී,

26මිදෙන තැනැත්තා ඒ බව ඔබේ කන්වලට දන්වන පිණිස ඔබ ළඟට එනවා නොවේද?

27ඒ දවසේදී ඔබේ මුඛය මිදෙන තැනැත්තා කෙරෙහි ඇරී, ඔබ තවත් ගොළුව නොසිට කථාකරන්නෙහිය. මෙසේ ඔබ ඔවුන්ට සලකුණක් වන්නෙහිය; ඔවුන් මා ස්වාමීන්වහන්සේ බව දැනගන්නවා ඇතැයි කීය.

← Chapter 23 Jump to: Chapter 25 →