Proverbs 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1Ang Ginoo nagadumot sa mga tawo nga nagagamit sang indi husto nga timbangan. Nalipay sia sa mga tawo nga nagagamit sang husto nga timbangan.

2Ang bugalon nga mga tawo madali mahuy-an. Mas maayo ang magmapainuboson.

3Ang maayo nga mga tawo ginatuytuyan sang pagkamaminatud-on, pero ang dayaon ginalaglag sang ila kalautan.

4Ang mga manggad indi makatabang sa imo sa adlaw sang kamatayon, pero ang pagkamatarong makaluwas sa imo sa imo kamatayon.

5Ang pagkamaminatud-on nagapahapos sang pangabuhi sang maayo nga tawo, pero ang malaut nga tawo magalaglag sang iya kaugalingon.

6Ang pagkamatarong nagaluwas sang masaligan nga tawo, pero ang tawo nga indi masaligan masiod sang iya kaugalingon nga kahakog.

7Kon ang malaut nga tawo mapatay, ang iya paglaom mapatay man upod sa iya. Ang pagsalig sa mga manggad wala sing pulos.

8Ang matarong nga tawo ginaluwas sa kalalat-an, sa baylo nagaabot ini sa malaut.

9Ang mga tawo mahalitan sang hambal sang di-diosnon nga mga tawo, pero ginaluwas sila sang kaalam sang mga matarong.

10Ang isa ka siudad malipayon kon ang matarong nga mga tawo nagauswag, kag may paghinugyaw kon ang malaut nga mga tawo mapatay.

11Ang siudad nagauswag kon pakamaayuhon sang matarong nga mga pumoluyo, pero ginalaglag ini tungod sang mga pulong sang malaut nga mga pumoluyo.

12Ang nagahikay sa iban buangbuang. Ang maalam nga tawo mahipos.

13Ang palakutsokutso indi makatago sing sekrito, pero ang masaligan nga tawo masugiran mo sang sekrito.

14Ang pungsod mapukan kon wala sing may nagatuytoy. Kon madamo ang palamangkutan ang pungsod may kalig-unan.

15Piyansahi ang utang sang dumoluong kag magahinulsol ka. Mas maayo pa nga indi ka magpiyansa agod wala ka sing problema.

16Ang babayi nga maayo sing pamatasan ginatahod, pero ang babayi nga malain sing batasan kahuloy-an. Ang matamad nga tawo indi makaangkon sing pilak, pero ang mapisan magamanggaranon.

17Ang mabinuligon nagabulig sa iya kaugalingon. Pero ang mapintas nagahalit lamang sang iya kaugalingon.

18Ang malaut nga mga tawo wala gid sing makuha nga maayo, pero kon matarong ang imo ginahimo, pat-od gid nga magabaton ka sing balos.

19Ang bisan sin-o nga nagatinguha sa paghimo sing matarong magakabuhi, pero ang bisan sin-o nga nagapamilit sa paghimo sing malaut mapatay.

20Ang Ginoo nagadumot sa mga tawo nga may malaut nga mga panghunahuna, pero nalipay sia sa mga nagahimo sing matarong.

21Pat-od gid nga ang malaut nga mga tawo pagasilutan, pero ang matarong nga mga tawo pagahilwayon.

22Ang katahom sang babayi nga wala sing maayo nga pagbinagbinag kaangay sang bulawan nga singsing sa hingudhingod sang baboy.

23Ang handom sang maayo nga mga tawo nagabunga sing kaayuhan, pero kon matigayon ang handom sang malaut nga mga tawo, ang tagsatagsa nagakaakig.

24May mga tawo nga maalwan nga nagamanggaranon pa gid. Ang iban mainot, pero nagaimol pa gid.

25Magmaalwan ka kag ikaw magamainuswagon. Buligi ang iban kag sila man magabulig sa imo.

26Ang nagatago sing humay nga nagahulat sa mataas nga presyo ginapakamalaut sang mga tawo, pero ginadayaw nila ang nagapagwa sini agod ipadalawat.

27Kon ang imo tinutuyo maayo, pagatahuron ka, pero kon nagapangita ka sing gamo, gamo ang imo makuha.

28Ang mga nagasalig sa ila manggad magakalahulog kaangay sang mga dahon nga laya, pero ang matarong magauswag, pareho sang pagpanglumbay sang kahoy.

29Ang tawo nga nagadala sing gamo sa iya panimalay wala gid sing maayo nga maabutan sa ulihi. Ang buangbuang nga mga tawo mangin-ulipon sa gihapon sang mga maalam.

30Ang pagkamatarong nagahatag sing kabuhi. Pero ang kapintas nagakuha sini.

31Kon ang maayo nga mga tawo ginahatagan sing balos sa sini nga duta, pat-od gid nga ang malaut nga mga tawo kag ang mga makasasala pagasilutan.

← Chapter 10 Jump to: Chapter 12 →