Proverbs 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Ang Kaalam nagpatindog sang iya balay, kag ginbutangan niya ini sing pito ka mga haligi.

2Nag-ihaw sia sing isa ka sapat para sa punsyon, ginsimbugan niya ang bino sang pahamot, kag ginhanda ang lamisa.

3Ginsugo niya ang iya mga suloguon nga babayi sa pagkadto sa labing mataas nga lugar sang banwa sa pagpanawag:

4“Palapit kamo nga mga wala sing tinun-an!” Kag sa mga buangbuang nagasiling sia,

5“Dali kamo sa pagkaon sang akon kalan-on kag sa pag-inom sang bino nga akon ginsimbog.

6Indi kamo mag-upod sa wala sing tinun-an agod magkabuhi kamo. Sunda ang dalanon sang paghangop.”

7Kon tudloan mo ang bugalon nga tawo, pagainsultohan ka lang. Kon sawayon mo ang malaut nga tawo, kasakitan lang ang imo maagom.

8Indi pagsawaya ang bugalon nga tawo, kay maakig sia sa imo. Pero kon sayawon mo ang maalam nga tawo, magataha sia sa imo.

9Ang bisan ano nga itudlo mo sa maalam nga tawo magapaalam pa gid sa iya. Ang bisan ano nga isiling mo sa matarong nga tawo magadugang sang iya ihibalo.

10Tahura sing una ang Ginoo agod magmaalam ka. Kon nakilala mo ang Dios nga Balaan, may paghangop ka.

11Ang kaalam magadugang sing mga tinuig sa imo kabuhi.

12Kon may kaalam ka, ini mangin sa imo kaayuhan. Kon sikwayon mo ini, ikaw man lang ang magaantos.

13Ang kabuangan kaangay sang magahod, walay tinun-an, walay huya nga babayi.

14Nagapungko sia sa pwertahan sang iya balay, ukon sa pulongkuan sa pinakamataas nga lugar sang banwa,

15kag nagapanawag sang mga tawo nga nagaagi pakadto sa ila obra. Nagasiling sia:

16“Sulod kamo, mga tawo nga wala sing tinun-an!” Nagasiling sia sa buangbuang nga tawo,

17“Ang kinawat nga tubig mas matam-is kag ang kinawat nga tinapay mas manamit.”

18Ang iya mga nahaylo wala makahibalo nga ang mga tawo nga nagasulod sa iya balay nagakapatay, kag ang nakasulod na didto yadto na karon sa kaidadalman sang kalibutan sang mga patay.

← Chapter 8 Jump to: Chapter 10 →