Proverbs 28

Ilonggo (Maayong Balita nga Biblia (2012))

← Chapter 27 Jump to: Chapter 29 →

1Ang malaut nga mga tawo nagapalagyo bisan wala sing may nagalagas sa ila, pero ang matarong nga tawo maisog kaangay sang leon.

2Ang pungsod magamabakod kag magapadayon kon ini may maalam kag mahinangpanon nga mga pangulo. Pero kon ang pungsod nagapakasala, ang iya mga pangulo dugaydugay ginailisan.

3Ang tawo nga yara sa gahom nga nagapigos sa mga imol kaangay sang baha nga nagapierde sang mga tanom.

4Kon wala ka nagatahod sang kasugoan, nagaapin ka sa mga malaut, pero kon nagatuman ka sang kasugoan, batok ka sa mga malaut.

5Ang malaut nga mga tawo wala makahibalo kon ano ang katarungan, pero ang mga nagasimba sa Ginoo nakahangop sini sing maayo.

6Mas maayo pa ang imol nga ang pagkabuhi tadlong sang sa manggaranon nga tiko ang pagginawi.

7Ang pamatan-on nga nagatuman sang kasugoan maalam. Ang nagapakig-abyan sa mga hurong nagapakahuya sa iya mga ginikanan.

8Kon magmanggaranon ka paagi sa pagpasaka sing kwarta kag pagpamintaha sa iban nga mga tawo, ang imo manggad magakadto sa kay bisan sin-o nga mabinuligon sa mga imol.

9Kon wala ka nagatuman sang kasugoan, ang imo mga pangamuyo manginkangil-aran sa Dios.

10Ganyata ang matarong nga tawo sa paghimo sing malaut kag mahulog ikaw sa imo kaugalingon nga tugalbong. Ang wala sing sala pagabalusan sing maayo.

11Ang manggaranon nga mga tawo nagahunahuna nga maalam sila, pero ang imol nga tawo nga nakahangop sang ila pamatasan mas maalam pa.

12Kon ang maayo nga mga tawo magpungko sa poder, ang tanan nagakalipay, pero kon ang malain nga mga tawo maggahom, ang mga tawo nagapanago.

13Indi ka gid magmadinalag-on kon ginatago mo ang imo mga sala, pero kon ituad mo ang imo mga sala kag maghinulsol, ang Dios magakaluoy sa imo.

14Tahura sa gihapon ang Ginoo kag magamalipayon ka. Patig-aha ang imo tagipusoon kag malaglag ka.

15Ang imol nga mga tawo wala sing mahimo batok sa malaut nga pangulo, kay makatalagam sia kaangay sang nagangurob nga leon, ukon sang nagaluyong nga uso.

16Ang pangulo nga indi mahinangpanon mapintas nga manugpigos. Pero ang nagadumot sa pagkadi-matarong magagahom sing malawig.

17Ang tawo nga nakasala sang pagpatay madasig nga nagakutkot sang iya kaugalingon nga lulobngan. Pabay-i lang sia.

18Magginawi ka sing matarong kag indi ka maano. Magginawi ka sing di-matarong kag sa hinali mapukan ka.

19Ang mapisan nga mangungoma may madamo nga kalan-on. Ang mga tawo nga nagausik sang ila tion magaimol sa gihapon.

20Ang matarong nga tawo magakabuhi nga kontento kag malipayon. Pero kon nagadali ka magmanggaranon, pagasilutan ka.

21Ang may pinilian sala. Pero ang iban nga mga hukom may pagpasulabi tungod sang bisan diutay lang nga hamham.

22Ang hakugan nga tawo nagadali magmanggaranon kag indi sia makahibalo kon san-o ang kaimulon mag-abot.

23Sawaya ang tawo, kag sa ulihi makita niya ang kapuslanan sini labaw pa sang sa pagdayawdayaw.

24Ang tawo nga nagahunahuna nga indi sala ang magpangawat sa iya mga ginikanan pareho lang sang isa ka makawat.

25Ang pagkamaiyaiyahon nagatuga sing kagamo, pero ang nagasalig sa Ginoo magauswag.

26Kabuangan ang magsalig sa imo kaugalingon nga panghunahuna. Pero ang nagasunod sa pagtudlo sang maalam nga mga tawo indi maano.

27Magbulig ka sa mga imol kag indi ka mawad-an. Indi sila pagsapaka, kag madamo ang magapakamalaut sa imo.

28Ang mga tawo nagapanago kon ang malain nga mga tawo magpungko sa poder. Pero kon wala na sila sa gahom, ang mga matarong magagahom liwat.

← Chapter 27 Jump to: Chapter 29 →