Proverbs 22

Ilonggo (Maayong Balita nga Biblia (2012))

← Chapter 21 Jump to: Chapter 23 →

1Kon papilion ka sa kadungganan kag daku nga manggad, pilia ang kadungganan.

2Wala sing kinatuhay ang manggaranon kag imol, kay sila nga duha gintuga sang Ginoo.

3Ang maalam nga tawo makakita sang magaabot nga kagamo kag ginalikawan niya ini, pero ang buangbuang nga tawo magapadayon kag sa ulihi magahinulsol sia.

4Tahura ang Ginoo, magpaubos ka, kag makaangkon ka sing manggad, kadungganan kag malawig nga kabuhi.

5Kon ginapakamahal mo ang imo kabuhi, maglikaw ka sa mga siod sa dalanon nga nagadakop sang mga malaut.

6Tudloi ang bata sang husto nga pagginawi, kag iya ini pagasundon sa bug-os niya nga kabuhi.

7Ang imol nga mga tawo ulipon sang manggaranon. Maghulam ka sing kwarta kag mangin-ulipon ka sang nagpahulam sa imo.

8Magpanggas ka sang binhi sang pagkadi-matarong kag magaani ka sing kalaglagan kag ang imo pagpamigos sa iban magauntat.

9Magmaalwan ka, kag magpaambit sang imo pagkaon sa imol. Pagabendisyunan ka sang Ginoo tungod sini.

10Tabuga ang palahikay nga tawo, kag ang binais, ang inaway, kag ang pasipala magauntat.

11Ang may putli sing tagipusoon kag malulo sa paghambal mangin—iya abyan ang hari.

12Ang Ginoo nagaapin sang kamatuoran paagi sa iya paghimutig sang mga pulong sang mga butigon.

13Ang matamad nga tawo nagapabilin sa balay kag nagasiling sia nga basi ang mga leon magapatay sa iya kon maggwa sia.

14Ang pagpanginbabayi ukon pagpanginlalaki isa ka siod nga nagadakop sang mga tawo nga ginakaakigan sang Ginoo.

15Kinaugali sang mga kabataan ang paghimo sang kabuangan, pero ang nagakaigo nga paghanot magatudlo sa ila sing maayo.

16Kon maghatag ka sing mga regalo sa mga manggaranon ukon magpigos sang mga imol agod magmanggaranon ka, ikaw mismo magaimol.

17Magpamati ka kag tudloan ko ikaw sang ginsiling sang mga mangin-alamon. Tun-i ang ila mga ginatudlo,

18kag manginmalipayon ka kon huptan mo ini sa imo tagipusoon kag masaulo ini.

19Luyag ko nga magsalig ka sa Ginoo, gani, karon luyag ko nga itudlo ini sa imo.

20Nagsulat ako sing traynta ka mga hulobaton para sa imo. Puno ini sing kaalam kag maayo nga laygay,

21kag magatudlo ini sa imo kon ano gid ang kamatuoran. Dayon kon ikaw ipadala sa pag-usisa sini, magabalik ka nga may husto nga sabat.

22Indi ka magpamintaha sa imol nga tawo tungod lamang kay sarang mo mahimo ini. Indi pagdaugdaoga ang isa ka tawo nga wala sing nagatabang sa iya sa atubangan sang korte.

23Ang Ginoo amo ang magatabang sang ila kaso, kag magabutang sa katalagman ang mga nagahingabot sang ila kabuhi.

24Indi ka magpangamigo sa mga tawo nga mainiton kag mapintas kon maakig,

25basi masunod mo ang ila pamatasan, kag indi ka na makabaylo sang imo kaugalingon.

26Indi magtug-an nga ikaw ang manabat sang utang sang iban.

27Kon indi ka makabayad, kuhaon nila bisan pa ang imo higdaan.

28Indi mo paghalinon ang muhon nga ginbutang sang imo mga katigulangan.

29Nakita mo bala ang tawo nga maayo mag-obra? Ipakita ko sa imo ang isa ka tawo nga mas maayo sang sa iban kag takos sa pag-alagad sa mga hari.

← Chapter 21 Jump to: Chapter 23 →