Proverbs 29

Ilonggo (Maayong Balita nga Biblia (2012))

← Chapter 28 Jump to: Chapter 30 →

1Kon nagatig-a pa gid ang imo tagipusoon sa tagsa ka tion nga ginatudloan ka, sa indi madugay malain ang maabutan mo kag indi ka na gid matabangan.

2Kon matarong ang pangulo, ang mga tawo malipayon. Kon ang pangulo malaut, ang mga tawo makaluluoy.

3Kon naluyag ka sang kaalam, ang imo ginikanan magakalipay tungod sa imo. Binuang ang paggasto sing kwarta para sa mga babayi nga nagabaligya sang ila dungog.

4Kon ang hari may kabalaka sang katarungan, ang ginharian magabakod, pero kon nagakabalaka lamang sia sa kwarta, ang iya ginharian malaglag.

5Dayawdayawa ang imo mga abyan kag nagabutang ka sing siod para sa imo kaugalingon.

6Ang malaut nga mga tawo madakpan sa ila kaugalingon nga mga sala, pero ang matarong nga mga tawo malipayon kag hilway.

7Ang maayo nga tawo nakahibalo sang kinamatarong sang mga imol, pero ang malaut nga mga tawo indi makahangop sini nga mga butang.

8Ang mga tawo nga wala sing pagtahod sa iban sarang makatuga sing kagamo sa bug-os nga siudad, pero ang maalam nga mga tawo makapaluntad sang kalinong.

9Kon ang maalam nga tawo magsumbong sang buangbuang, ang buangbuang nagakadlaw lang, nagagahod kag nagagamo.

10Ang manugpatay sa mga tawo nagadumot sang maminatud-on nga tawo, pero ang matarong nga mga tawo magaapin sang iya kabuhi.

11Ang buangbuang nga tawo wala nagapugongpugong sang iya kaakig, pero ang maalam nga tawo mapinasensyahon kag ginapunggan niya ang iya kaakig.

12Kon ang pangulo nagapati sang mga kabutigan, ang tanan niya nga mga opisyales manginbutigon.

13Sa isa ka bagay ang imol nga tawo kag ang nagapigos sa iya pareho man lang—ang Ginoo naghatag sing mata sa ila nga duha.

14Kon ang hari nagaapin sang kinamatarong sang mga imol, magahari sia sa malawig nga panahon.

15Ang pagtudlo kag pagdisiplina maayo para sa mga kabataan. Kon pabay-an mo lang ang bata, magadala sia sing kahuloy-an sa iya iloy.

16Kon ang malaut nga mga tawo yara sa gahom, ang mga kalautan nagadugang. Pero ang mga matarong makakita sang pagkapukan sini nga mga malaut.

17Disiplinaha ang imo anak, kag sarang mo sia mapabugal sa gihapon. Indi ka gid mahuy-an tungod sa iya.

18Ang pungsod nga wala sing pagtuytoy sang Dios isa ka pungsod nga magamo. Malipayon ang tawo nga nagatuman sang kasugoan sang Dios!

19Indi mo matudloan ang ulipon paagi sa paghambal lang sa iya. Bisan mahangpan niya ikaw, pero indi sia magsapak.

20May daku pa nga paglaom sa buangbuang sang sa tawo nga nagahambal nga wala anay nagapanghunahuna.

21Hatagi ang imo ulipon sang tanan nga luyag niya halin sang bata pa sia, kag sa pila ka adlaw sia ang magagahom sang tanan mo nga mga pagkabutang.

22Ang mga tawo nga mainiton amo ang kabangdanan sang madamo nga pag-inaway kag kagamo.

23Ang bugal amo ang kabangdanan sang pagkapukan sang tawo, pero ang tawo nga mapainuboson pagatahuron.

24Ang upod sang makawat amo ang labing malain niya nga kaaway. Pagasilutan sia kon magsugid sia sang matuod sa korte, kag ang Dios magapakamalaut sa iya kon indi sia magsugid sang matuod.

25Makatalagam kon magsapak ikaw sang ginapanghunahuna sang iban nahanungod sa imo, pero kon nagasalig ka sa Ginoo, indi ka maano.

26Ang tanan nagatinguha sang maayo nga kabubot-on sang pangulo, pero ang Ginoo lamang ang makahatag sing katarungan.

27Ang mga matarong nagadumot sa mga malaut, kag ang mga malaut nagadumot sa mga matarong.

← Chapter 28 Jump to: Chapter 30 →