Proverbs 21

Ilonggo (Maayong Balita nga Biblia (2012))

← Chapter 20 Jump to: Chapter 22 →

1Ang Ginoo nagagahom sang panghunahuna sang hari subong kahapos sang pagtuytoy niya sang alagyan sang sapa.

2Bisan nagahunahuna ka nga ang tanan mo nga ginahimo matarong, pero dumdoma nga ang Ginoo nagahukom sang imo mga tinutuyo.

3Ginapasulabi sang Ginoo nga maghimo ka sing husto kag nagakabagay sang sa magdala ka sa iya sing mga halad.

4Ang malaut nga mga tawo ginagamhan sang ila pagkamaiyaiyahon kag bugal, kag ini sala.

5Magplano sing maayo nga nagapangabudlay kag magabugana ka. Magdasudaso ka kag pirme ka lang ginakulang.

6Ang manggad nga imo makuha paagi sa daya madali madula, kag magadala ini sa imo sa bibi sang kamatayon.

7Ang malaut malaglag sang ila kaugalingon nga kapintas, kay indi sila maghimo sang matarong.

8Ang dalanon sang nakasala tiko, pero ang tawo nga wala sing sala nagahimo sing matarong.

9Mas maayo pa nga mag-estar ka sa gwa sang balay sang sa mag-estar ka sa sulod upod sa asawa nga masuayon.

10Ang handom sang malaut nga tawo amo ang paghimo sang malaut, wala sila sing kaluoy sa bisan kay sin-o.

11Kon ang bugalon nga tawo masilutan, bisan pa ang wala sing tinun-an makatuon sing leksyon. Ang maalam nga tawo mahapos tudloan.

12Ang Dios nga matarong nakahibalo sang nagakatabo sa mga balay sang mga malaut, kag pagalaglagon niya ang mga malaut.

13Ang wala nagapamati sa pagpangayo sing bulig sang mga imol, indi man pagpamatian ang iya pagpangayo sing bulig.

14Kon may isa nga naakig sa imo, ang regalo nga ginhatag sa sekrito makalugpay sa iya.

15Kon ang katarungan magluntad, nagakalipay ang maayo nga mga tawo, pero nagakasubo ang malain nga mga tawo.

16Ang kamatayon nagahulat sa tawo nga nagapalayo sa dalan sang kaalam.

17Ang nagapatuyang sa mga kadayawan, bino, kag malahalon nga pagkaon indi magmanggaranon.

18Ang malaut nga mga tawo nagadala sa ila kaugalingon sang pag-antos nga ila kuntani ihalit sa maayo nga mga tawo.

19Mas maayo pa nga mag-estar sa desierto sang sa mag-estar upod sa masuayon kag reklamadora nga asawa.

20Ang maalam nga mga tawo nagakabuhi sa manggad kag patuyang, pero ang buangbuang nga mga tawo nagagasto sang ila kwarta subong kadali sang ila pagkakita sini.

21Magmaluloy-on ka kag magmaminatud-on kag magakabuhi ka sing malawig; ang iban nga mga tawo magatahod sa imo kag magatratar sa imo sing maayo.

22Ang heneral nga maayo sa taktika makaagaw sang isa ka siudad nga ginabantayan sang makusog nga mga tawo, kag makaguba sang mga pader nga ila ginasaligan.

23Kon luyag ka maglikaw sa gamo, maghalong ka sang imo ginahambal.

24Ang tawo nga bugalon ginatawag man nga hambog, tikalon, kag wala sing pasunaid.

25Ang matamad nga tawo nga indi luyag mag-obra nagapatay sang iya kaugalingon.

26Ang ginahimo lamang niya amo ang pagpanumdom sang luyag niya maangkon. Pero ang matarong nga tawo nagahatag sing maalwan.

27Ang Ginoo nagadumot sa malaut nga mga tawo nga nagadulot sa iya sing mga halad, labi na gid kon ginahimo nila ini sa malaut nga mga tinutuyo.

28Ang panaksihon sang butigon indi mapatihan, pero ang hambal sang tawo nga nagapanghunahuna sing maayo ginapatihan.

29Ang matarong nga tawo nakasiguro sang iya ginahimo. Pero ang malaut nga tawo nagatinguha sa pagpakunokuno.

30Ang kaalam, ang kaabtik sing ulo, kag ang paghangop wala sing mahimo kon ang Ginoo nagapamatok sa imo.

31Mahanda mo ang mga kabayo para sa inaway, pero ang Ginoo amo ang nagapadaog.

← Chapter 20 Jump to: Chapter 22 →