Proverbs 30

Ilonggo (Maayong Balita nga Biblia (2012))

← Chapter 29 Jump to: Chapter 31 →

1Amo ini ang talalupangdon nga mga pulong ni Agur nga anak ni Hake. Ini nga tawo nagsiling: “Ang Dios wala nagaupod sa akon, ang Dios wala nagaupod sa akon, kag wala ako sing sarang mahimo.

2Daw sapat ako kag indi tawo. Wala ako sing paghangop kaangay sang iya sang tawo.

3Wala gid ako makatuon sang bisan ano nga kaalam, kag wala gid ako sing nahibal-an nahanungod sa Dios.

4Sin-o bala ang nakasayasat sang langitnon nga kaalam? Sin-o bala ang makahakop sang hangin? Ukon nakaputos sa panapton sang tubig? Ukon nakapahamtang sang mga dulonan sang duta? Sin-o bala sia, kon nahibal-an mo? Sin-o bala ang iya anak?

5“Ang Dios nagatuman sang tagsa niya ka saad. Kaangay sia sang taming sa tanan nga nagapaapin sa iya.

6Kon magpatupato ka sang wala niya ginsiling, sawayon niya ikaw, kag ipakilala niya nga butigon ka.”

7O Dios, nagapangayo ako sa imo sang duha ka butang sa wala pa ako mapatay:

8ipahilayo ako sa pagbinutig kag indi ako pagpamanggara ukon pagpaimula. Hatagi lamang ako sang kalan-on nga akon kinahanglanon.

9Kay kon magsobra ang akon kalan-on, basi magsiling ako nga wala ako sing kinahanglan sa imo. Pero kon imol ako, basi magpangawat ako, kag magpakahuya sa akon Dios.

10Indi ka magbutangbutang sing malain sa isa ka ulipon sa atubang sang iya amo. Pagapakamalauton ka, kag magaantos tungod sini.

11May mga tawo nga nagapakamalaut sang ila amay, kag wala nagapakamahal sang ila iloy.

12May mga tawo nga nagahunahuna nga putli sila, bisan nga tama sila kalaut.

13May mga tawo nga nagahunahuna nga maayo gid sila—abaw, daw sila lang ang maayo!

14May mga tawo nga sobra magpamintaha sa mga imol kag nawad-an. Amo ini ang ila palangitan-an.

15Ang linta may duha ka mga anak nga babayi, kag sila nga duha ginahingalanan, “Hatagi ako!” May apat ka mga butang nga indi gid mabusog:

16Ang kalibutan sang mga patay, ang babayi nga baw-as, ang mamala nga duta nga nagakinahanglan sing ulan, kag ang nagaharahara nga kalayo nga indi masagang.

17Ang tawo nga nagayaguta sang iya amay ukon nagatamay sang iya iloy sa iya katigulangon dapat kaunon sang mga agila, ukon ang mga uwak magatusik sang iya mga mata.

18May apat ka mga butang nga tama ka makatilingala nga indi ko mahangpan:

19Ang agila nga nagalupad sa kahawaan, ang man-og nga nagasaog sa kabatuhan, ang bapor nga nagapanakayon sa kadagatan, kag ang lalaki kag babayi nga nagahigugmaanay.

20Amo ini ang ginahimo sang maluib nga asawa: nagapakighilawas sia sa iban nga lalaki, nagapaligo, kag nagasiling, “Pero wala ako sing nahimo nga malain!”

21May apat ka mga butang nga bisan ang duta indi makaagwanta:

22Ang ulipon nga manginhari, ang buangbuang nga may yara sang tanan nga luyag niya kaunon,

23ang makaulogot nga babayi nga nakapamana, kag ang ulipon nga babayi nga nagkuha sang lugar sang iya ama.

24May apat ka mga sapat nga magamay sa kalibutan, pero tama kaalam:

25Ang mga subay: indi makusog, pero nagatipon sila sang ila pagkaon kon tingadlaw.

26Ang mga koneho sa bato: indi man sila makusog, pero nagahimo sila sang ila, mga ilistaran sa mga bato.

27Ang mga apan: wala sila sing hari, pero nagatingob kon maglupad.

28Ang mga tiki: sarang mo mauyatan ang isa sa ila sa imo kamot, pero makita mo sila sa mga palasyo.

29May apat ka mga butang nga manami tan-awon kon maglakat sila:

30ang leon, ang labing makusog sa tanan nga mga sapat, kag wala sing may nahadlukan;

31ang toro nga kanding, ang sulog nga manok nga may bugal maglakatlakat, kag ang mga hari sa atubang sang ila mga tinawo.

32Kon tama ka kabuang sa bagay nga nagbugalon ka, kag nagplano sing malaut, magpundo ka anay kag magpanghunahuna!

33Lugaya nga lugaya ang gatas kag makahimo ka sing mantikilya. Sumbaga ang ilong sang isa ka tawo kag magadugo ini. Pukawa ang kaakig kag magaagom ka sing kagamo.

← Chapter 29 Jump to: Chapter 31 →