Proverbs 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Anak, nagpiyansa ka bala sang utang sang iban?

2Nadakpan ka bala sa imo kaugalingon nga mga pulong, kag nasiod sa imo kaugalingon nga mga saad?

3Kon amo ina, anak ko, yara ka sa idalom sang gahom sina nga tawo, pero amo ini ang paagi sa pagluwas sang imo kaugalingon: dalidali ka sa pagkadto sa iya kag magpakitluoy sa paghilway sa imo.

4Indi pagtulogi kag pagpahuwayi

5tubtob maluwas mo ang imo kaugalingon sa siod, subong sang isa ka pispis ukon usa nga nagapalagyo sa mangangayam.

6Ang matamad nga mga tawo dapat magtuon sa pagginawi sang mga subay.

7Wala sila sing kabo, pangulo, ukon manugdumala,

8pero nagatipon sila sing kalan-on kon tingadlaw sa paghanda para sa tingulan.

9Tubtob pa bala san-o ang paghigda sang matamad nga tawo? San-o pa bala sia magabangon?

10Nagasiling sia, “Mapiyungpiyong ako anay, magpanimuko kag magpahuwayhuway.”

11Pero samtang nagatulog sia ang kinawad-on magaabot sa iya kaangay sang isa ka makawat nga nasangkapan sang hinganiban.

12Ang wala pulos kag malaut nga mga tawo nagapanugidsugid sang mga kabutigan.

13Nagapangilay sila kag nagasinyas sa pagdaya sa imo,

14samtang sa tanan nga tion nagaplano sila sing malain sa ila mahigko nga mga panghunahuna kag nagapadihot sing kagamo bisan diin.

15Tungod sini, ang kalaglagan magaabot sa ila sing hinali, kag mahalitan sila nga indi na matabangan.

16Pito ka mga butang ang ginadumtan kag ginakangil-aran sang Ginoo: Ang bugalon nga panulok, ang dila nga butigon, ang mga kamot nga nagapatay sang mga tawo nga wala sing sala, ang panghunahuna nga nagapahito sing malaut, ang mga tiil nga madasig sa paghimo sing malaut, ang saksi nga nagasugid sing kabutigan, kag ang tawo nga nagapaaway sang mga mag-abyan.

20Toto, tumana ang mga sugo sang imo amay kag indi pagkalimti ang gintudlo sang imo iloy.

21Tipigi sa gihapon ang ila mga pulong kag hupti sa imo tagipusoon.

22Ang ila mga pagtudlo magatuytoy sa imo pagpanglakaton, magabantay sa imo sa gab-i, kag magalaygay sa imo sa adlaw.

23Ang ila mga pagtudlo kaangay sang kapawa nga nagasiga kag ang ila mga pagsaway makatudlo sa imo sa pagkabuhi.

24Makapahilayo ini sa imo sa malain nga mga babayi, kag sa makagalanyat nga mga pulong sang asawa sang iban nga tawo.

25Indi ka magpasulay sa ila katahom. Indi ka magpasiod sa ila mga pagpangilay.

26Ang malain nga babayi mabakal sang isa ka tawo sa bili sang isa ka barita nga tinapay, pero ang pagpanginbabayi magapierde sang tanan niya nga mga pagkabutang.

27Mabutang mo bala ang kalayo sa imo sabak nga indi masunog ang imo bayu?

28Makalakat ka bala sa mga baga nga indi mapaso ang imo mga tiil?

29Gani amo man ka makatalagam ang paghulid sa asawa sang iban nga tawo. Ang nagahimo sini pagasilutan.

30Ang mga tawo wala nagatamay sa isa ka makawat kon mangawat sia sing pagkaon tungod kay gutom sia.

31Pero kon madakpan sia, dapat sia magbayad sing pito ka pilo kag ihatag niya ang tanan niya nga mga pagkabutang.

32Ang tawo nga nagapanginbabayi buangbuang. Ginalaglag lamang niya ang iya kaugalingon.

33Pagapakahuy-an sia kag pagabunalon kag ang iya kahuloy-an indi malipatan.

34Ang kaakig sang bana indi matupongan kon nagapangimon sia. Ang iya pagtimalos wala sing luoyluoy.

35Indi sia magsapak sang bisan ano nga bayad, kag bisan daw ano ka daku ang regalo indi makalugpay sa iya kaakig.

← Chapter 5 Jump to: Chapter 7 →