Proverbs 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Ang tawo nga nagahigugma sang ihibalo luyag pakilalahon kon nakasayop sia, pero ang buangbuang nagakaakig kon sawayon sia.

2Ang Ginoo nalipay sa maayo nga mga tawo, pero ginakondenar niya ang mga nagaplano sing malain.

3Ang kalautan wala nagahatag sing kalig-unan, pero ang matarong nga mga tawo magatindog sing malig-on.

4Ang maayo nga asawa bugal kag kalipay sang iya bana. Pero kon nagahatag sia sing kahuloy-an sa iya, kaangay sia sang kanser sa mga tul-an sang iya bana.

5Ang maminatud-on nga mga tawo magatratar sa imo sing husto, pero ang mga malaut magadaya lamang sa imo.

6Ang mga ginahambal sang malaut nga mga tawo makamamatay, pero ang mga ginahambal sang mga matarong nagaluwas.

7Ang malaut nga mga tawo mapapas kag wala sang kaliwat, pero ang mga panimalay sang matarong nagapadayon.

8Kon maalam ikaw, pagadayawon ka; kon buangbuang ikaw, pagahikayan ka.

9Mas maayo pa ang imol nga nagapangabudlay agod may kalan-on, sang sa nagapakamanggaranon nga wala sing kalan-on.

10Ang maayo nga tawo nagaatipan sang iya mga kahayupan, pero ang malaut nga mga tawo mapintas sa ila mga kahayupan.

11Ang mapisan nga mangungoma may madamo nga kalan-on, pero kabuangan ang pag-usik sing tion sa walay pulos nga mga bulohaton.

12Ang luyag lamang sang malaut nga mga tawo amo ang paghimo sing malain, pero ang matarong nga mga tawo magatindog sing malig-on.

13Ang malaut nga tawo masiod sa iya kaugalingon nga mga hambal, pero ang matarong nga tawo makaluwas sang iya kaugalingon sa kagamo.

14Ang maayo nga mga butang nga mabaton sang isa ka tawo depende sa iya ginasiling kag ginahimo. Maagom niya ang nagakabagay sa iya.

15Ang buangbuang nga tawo nagahunahuna nga pirme gid sia husto, pero ang maalam nga tawo nagapamati sang laygay.

16Kon masaklaw ang buangbuang, nagapangakig sia sa gilayon, pero ang maalam nga tawo wala nagasapak sang pag-insulto sa iya.

17Kon magsugid ka sang kamatuoran magapangibabaw ang katarungan, pero ang mga kabutigan nagapadulong sa pagkadi-matarong.

18Ang maparas nga mga pulong makapilas sing madalom subong sang espada, pero ang mga pulong sang maalam nga tawo makaayo sang mga pilas.

19Ang kamatuoran wala nagabaylo tubtob sa walay katapusan, pero ang butig indi magdugay.

20Ang nagaplano sing malaut may malain nga maabutan, pero ang nagahimo sing kaayuhan magamalipayon.

21Wala sing malain nga matabo sa matarong nga tawo, pero ang malaut nga mga tawo wala sing makuha kundi kagamo.

22Ang Ginoo nagadumot sa mga butigon, pero nalipay sia sa mga maminatud-on.

23Ang maalam nga tawo wala nagasugid sang iya nahibaluan, pero ang mga buangbuang nagapakita sang ila pagkaignorante.

24Ang pagkapisan nagahatag sa tawo sing palangakuan, pero ang katamad nagahimo sa tawo nga ulipon.

25Ang pagpalibog nagakuha sang kalipay sang tawo, pero ang malulo nga mga pulong magalipay sa iya.

26Ang matarong nga tawo tuytoy sa iya abyan, pero ang dalan sang mga malaut nagapatalang sa ila.

27Ang matamad nga tawo indi gid makalambot sang iya ginahandom, pero ang mapisan nga tawo makaangkon sing manggad.

28Ang katarungan amo ang dalanon pakadto sa kabuhi, pero ang kalautan amo ang dalan pakadto sa kamatayon.

← Chapter 11 Jump to: Chapter 13 →