Proverbs 19

Ilonggo (Maayong Balita nga Biblia (2012))

← Chapter 18 Jump to: Chapter 20 →

1Mas maayo pa ang imol nga maminatud-on, sang sa buangbuang nga butigon.

2Ang paghimo sang isa ka butang nga wala mapainuinohi indi maayo. Ang dasudaso sa iya ginahimo dali mapaso.

3Ang iban nga mga tawo nagahalit sang ila kaugalingon paagi sa ila binuang nga mga buhat, kag ang Ginoo amo ang ila basulon.

4Ang manggaranon nga tawo madali makakita sing bag-o nga mga abyan, pero ang imol nga tawo ginabayaan sang iya mga abyan.

5Ang nagabinutig sa korte pagasilutan, kag indi gid sia makapalagyo.

6Ang tanan nagatinguha sa pagkuha sang maayo nga kabubot-on sang gamhanan nga mga tawo. Ang tanan naluyag magpakig-abyan sa tawo nga may ginahatag.

7Ang mga pariente sang imol nga tawo wala sing makuha sa iya, amo ina nga wala sia sing mga abyan. Bisan daw ano ang iya pagtinguha indi sia makaangkon sing mga abyan bisan isa lang.

8Ang tawo nga nagatuon nagahatag sing kaayuhan sa iya kaugalingon. Gani dumdoma ang imo natun-an kag ikaw magamainuswagon.

9Ang nagasaksi sing butig sa korte indi makapalagyo sa silot, ang nagabinutig malaglag.

10Ang mga buangbuang indi dapat magkabuhi sa patuyang, kag ang mga ulipon indi man dapat maggahom sa gamhanan nga mga tawo.

11Ang tawo nga may paghangop nagapugong sang iya kaakig. Wala sia nagasapak sa makasayop sa iya.

12Ang kaakig sang hari kaangay sang ngurob sang isa ka leon, pero ang iya maayo nga buot kaangay sang ginapaabot nga ulan.

13Ang buangbuang nga anak makadala sing kalaglagan sa iya amay. Ang asawa nga reklamadora kaangay sang nagatulotulo nga tubig.

14Ang isa ka tawo makapanubli sing balay kag kwarta sa iya mga ginikanan, pero ang Ginoo lamang ang sarang makahatag sa iya sing but-anan nga asawa.

15Sigi magtinamad ka. Magpadayon ka sa pagtulog, pero gutoman ka.

16Ang nagatuman sang mga kasugoan sang Dios magakabuhi sing malawig. Ang nagasikway sang mga kasugoan mapatay.

17Ang nagahatag sa mga imol kaangay lang sang nagapahulam sa Ginoo, kay ang Ginoo magabayad sa iya.

18Disiplinaha ang imo mga kabataan samtang magamay pa sila, kay kon indi mo sila pagdisiplinahon nagabulig ka sa ila kalaglagan.

19Kon ang isa ka tawo mainiton dapat sia manabat sang maabutan sini. Kon tabangan mo sia sa kahul-anan sing makaisa, kinahanglan tabangan mo sia pirme.

20Magpamati ka sang laygay kag tumana ini, kag sa pila ka adlaw manginmaalam ka.

21Ang isa ka tawo ayhan magaplano sing madamo nga mga butang, pero ang kabubot-on sang Ginoo amo ang matuman.

22Ang pagkahakog makahuloya, ang imol nga tawo maayo pa sang sa butigon.

23Tahura ang Ginoo kag magakabuhi ka sing malawig, kontento kag malayo sa katalagman.

24Ang iban nga mga tawo tama katamad sa pagtimo sang ila kaugalingon nga pagkaon.

25Ang bugal dapat silutan, agod ang mga tawo nga wala sing tinun-an makatuon sing leksyon. Ang maalam nga tawo makahangop kon tudloan sia.

26Ang nagapintas sa iya amay ukon nagatabog sang iya iloy gikan sa iya puloy-an amo ang anak nga makahuloya kag talamayon.

27Anak, kon indi ka magpalaygay, mapatumbayaan mo ang nahibaluan na nimo.

28Wala sing hustisya kon ang isa ka saksi nakapamat-od na sa paghalit sang isa ka tawo. Ang malaut nga mga tawo luyag gid magtilaw sang kalautan.

29Ang bugalon nga buangbuang pat-od gid nga pagabunalon.

← Chapter 18 Jump to: Chapter 20 →