Proverbs 27

Ilonggo (Maayong Balita nga Biblia (2012))

← Chapter 26 Jump to: Chapter 28 →

1Indi ka magpabugal sang buas kay indi ka makahibalo sang matabo halin karon tubtob sa masunod nga mga inadlaw.

2Iban lang ang padayawa sa imo—bisan ang mga dumoluong, kag indi ikaw ang magdayaw sang imo kaugalingon.

3Ang kabug-at sang bato kag balas tama ka diutay kon ipaanggid sa kagamo nga madala sang kabuangan.

4Ang kaakig mapintas kag makalaglag, pero diutay ini kon ipaanggid sa kaimon.

5Mas maayo pa ang hayag nga pagsaway sang sa maghunahuna sia nga wala ka nagakabalaka sa iya.

6Ang isa ka abyan may maayo nga tinutuyo bisan pa kon ginasakit niya ang imo buot. Pero mag-andam ka kon ang imo kaaway mag-uloagbay sa imo!

7Kon ang tawo busog, indi sia magkaon bisan sang dugos, pero kon gutom sia, bisan ang mapait nga pagkaon manamit.

8Ang tawo nga malayo sa iya balay kaangay sang pispis nga malayo sa iya pugad.

9Ang agwa kag ang mahamot nga mga pamanyos nagalipay sa imo, pero ang suod nga pag-abyanay mas maayo pa gid.

10Indi pagkalimti ang imo mga abyan, ukon ang mga abyan sang imo amay. Kon yara ka sa kabudlayan, indi ka magpangayo sing bulig sa imo pariente kay ang malapit mo nga kaingod makabulig sa imo sang sa imo pariente nga didto sa malayo.

11Anak, magmaalam ka, agod manginmalipayon ako, kag may isabat ako sa tanan nga nagahikay sa akon.

12Ang maalam nga tawo makakita sang magaabot nga kagamo kag ginalikawan niya ini, pero ang buangbuang nga tawo magapadayon kag sa ulihi magahinulsol sia.

13Ang bisan sin-o nga tama ka buangbuang nga magtindog sang utang sang dumoluong dapat niya ipiyansa ang iya pagkabutang agod masiguro ang pagbayad.

14Ang nagapukaw sang iya abyan kon aga pa gid sa mabaskog nga tingog daw pareho lang nga nagapakamalaut sa iya.

15Ang palareklamo nga asawa kaangay sang ulan nga wala nagauntat.

16Ano ang pagpahipos mo sa iya? Nakatilaw ka bala sa pagpauntat sang hangin, ukon makatapnay ka sang lana nga indi mausik?

17Ang mga tawo nagatuon sa iban nga tawo, subong nga ang salsalon nagapatalom sang salsalon.

18Tatapa ang kahoy nga higera kag may mga higos ka nga kaunon. Ang ulipon nga nagatatap sang iya amo pagapasidunggan.

19Kon magtan-aw ka sa tubig makita mo ang imo guya, kag kon magtan-aw ka sa imo tagipusoon makita mo ang imo kaugalingon.

20Ang handom sang tawo kaangay sang kalibutan sang mga patay—may lugar pa para sa madamo.

21Ang kalayo nagatilaw sang bulawan kag pilak, subong man ang tawo ginatilawan kon ginadayaw sia.

22Bisan anhon mo ka hanot ang buangbuang, buangbuang man sia gihapon.

23Bantayi sing maayo ang imo mga karnero kag mga baka,

24tungod kay ang manggad wala nagapadayon, kag bisan pa ang mga pungsod.

25Garaba ang kumpay, kag samtang nagatubo ini liwat, makagarab ka sing mga hilamon sa kabakuloran.

26Makahimo ka sing mga bayu gikan sa bulbol sang imo mga karnero, kag makabakal ka sing duta gikan sa kwarta nga imo makuha sa imo pagbaligya sang imo mga kanding.

27Ang nabilin mo nga mga kanding magahatag sing gatas sa imo kag sa imo panimalay, kag sa imo man mga suloguon nga babayi.

← Chapter 26 Jump to: Chapter 28 →