Proverbs 26

Ilonggo (Maayong Balita nga Biblia (2012))

← Chapter 25 Jump to: Chapter 27 →

1Ang pagdayaw sa buangbuang wala nagakabagay. Kaangay ini sang pudpod nga yelo nga nagatupa sa tingadlaw, ukon ulan sa tion sang tig-alani.

2Ang mga pagpakamalaut indi makahalit sa imo kon wala ka sing sala. Kaangay ini sang mga pispis nga nagalabay lang kag wala nagahapon.

3Kinahanglan nga hanuton mo ang kabayo, busalan mo ang asno, kag hanuton ang buangbuang.

4Kon magsabat ka sang binuang nga pamangkot, pareho ka man ka buang sa tawo nga nagpamangkot sini.

5Sabta sing binuang ang pamangkot nga binuang, kag ang nagpamangkot sini makatalupangod nga indi gid man sia maalam subong sang iya ginapanghunahuna.

6Ang tawo nga nagapadala sing mensahe sa tawo nga buangbuang mas maayo pa nga utdon niya ang iya kaugalingon nga mga tiil, kay nagapangita lang sia sing gamo.

7Ang buangbuang makagamit sang hulobaton pareho sang paggamit sang piang sang iya mga tiil.

8Ang pagdayaw sa buangbuang kaangay sang paghigot sing bato sa panit sang tirador.

9Ang buangbuang nga nagahambal sang maalamon nga hulobaton nga iya nasaulo kaangay sang isa ka hubog nga nagatinguha sa paggabot sang tunok sa iya kamot.

10Ang isa ka manugpaobra nga nagapaobra sa buangbuang nagahalit lamang sang iban.

11Ang isa ka buangbuang nga nagahimo liwat sang kabuangan kaangay sang isa ka ido nga nagakaon sang iya ginsuka.

12Ang pinakabuangbuang nga tawo mas maayo pa sang sa tawo nga nagahunahuna nga maalam sia nga indi man sia maalam.

13Ngaa bala ang matamad nga tawo wala gid nagagwa sa balay? Ano ang nahadlukan niya? Mga leon bala?

14Ang matamad nga tawo nagalisuliso sa iya katre kaangay sang pwerta nga nagalisuliso sa iya bisagra nga wala man sing may maabutan.

15Ang iban nga mga tawo tama katamad sa pagtimo sang ila pagkaon.

16Ang matamad nga tawo nagahunahuna nga mas maalam pa sia sang sa pito ka mga tawo nga makahatag sing husto nga rason.

17Ang tawo nga nagaentra sa binaisay nga wala sia sing labot kaangay sang nagakadto sia sa kalsada kag nagadakop sang ido sa dulonggan.

18Ang isa ka tawo nga nagalag-it sang iya isigkatawo pero nagasiling sia nga nagalahog lamang sia, kaangay sang buangbuang nga tawo nga nagahampang sang makamamatay nga hinganiban.

20Ang kalayo nagakapatay kon wala sing gatong, kag kon wala sing kutsokutso ang kaawayon nagauntat.

21Ang baga wala nagakapatay kon may uling, ang kalayo nagapadayon sa pagdabdab kon may gatong, kag ang manugtuga sang kagamo amo ang nagapadayon sang kaawayon.

22Ang kutsokutso manamit! Maluyag gid kita magtulon sini!

23Ang indi sinsero nga pagdayaw nga nagatago sang matuod mo nga panghunahuna kaangay sang matahom nga inugpahining sa baratuhon nga kolon.

24Ang salimpapaw nga tawo nagatago sang iya kaakig paagi sa pagdayawdayaw.

25Daw maayo pamatian ang iya ginasiling, pero indi ka magpati sa iya, tungod kay ang iya tagipusoon puno sing kaakig.

26Ayhan matagutago niya ang iya kaakig, pero ang tagsatagsa makakita sang kalautan nga iya ginahimo.

27Ang mga tawo nga nagabutang sing siod para sa iban nagakasiod man. Ang mga tawo nga nagapaligid sing bato nagakaligsa man.

28Kon wala mo ginadumti ang isa ka tawo indi ka magsugid sing binutig nahanungod sa iya. Ang indi sinsero nga hambal wala sing iban nga ginadala kundi kalaglagan.

← Chapter 25 Jump to: Chapter 27 →