Proverbs 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Pamatii! Ang Kaalam nagapanawag. Ang paghangop nagasinggit.

2Nagatindog sia sa ibabaw sang mga bakulod sa tupad sang dalan, kag sa mga ginsang-an sang mga dalan.

3Sa alagyan pakadto sa siudad, sa tupad sang mga pwerta nagapanawag sia:

4“Mga katawhan, nagapanawag ako sa inyo, nagapanawag ako sa tagsa ka tawo sa duta.

5Wala pa bala kamo sing buot? Magpakahamtong kamo. Mga buangbuang bala kamo? Magmaalam kamo.

6Pamati kamo sa akon matahom nga mga pulong, ang tanan nga akon ginasiling matarong.

7Ang akon ginahambal matuod. Ginadumtan ko ang mga kabutigan.

8Ang tanan nga ginasiling ko matuod, wala sing butig ukon pagpatalang.

9Sa tawo nga may paghangop, ang tanan maathag, sa may ihibalo, ang tanan mahapos.

10Pasulabiha ang akon pagtudlo sa baylo sang pilak, pilia ang ihibalo sa baylo sang puraw nga bulawan.

11“Ako amo ang Kaalam, mas maayo pa ako sang sa mga alahas, wala ka sing ginahandom nga makatupong sa akon.

12Ako amo ang Kaalam, kag may paghangop ako, may ihibalo ako kag husto nga pagbinagbinag.

13Ang pagtahod sa Ginoo amo ang pagdumot sang malaut. Ginadumtan ko ang bugal kag pagkamatinaastaason, ang malaut nga mga pagginawi kag binutig nga mga hambal.

14May mga plano ako kag ginatuman ko ini. May paghangop ako kag may kabakod.

15Ginabuligan ko ang mga hari sa paggahom kag ang mga pangulo sa paghimo sang maayo nga mga kasugoan.

16Ginabuligan ko ang tagsa ka pangulo sa duta sa paggahom, subong man ang mga opisyales kag mga dungganon.

17Ginahigugma ko ang mga nagahigugma sa akon, makita ako sang mga nagapangita sa akon.

18Makahatag ako sing manggad kag kadungganan, kauswagan kag kadalag-an.

19Ang imo makuha sa akon mas maayo pa sang sa puraw nga bulawan, kag mas maayo pa sang sa puraw nga pilak.

20Nagalakat ako sa dalanon sang pagkamatarong, ginasunod ko ang mga banas sang katarungan.

21Nagahatag ako sing manggad sa mga nagahigugma sa akon, kag ginapuno ko ang ila mga balay sing bahandi.

22“Ang Ginoo nagtuga sa akon una sa tanan, ang nahauna sang iya mga binuhatan sadto anay.

23Ginhimo niya ako sa ginsugoran gid, ang nahauna gid, sa wala pa magsugod ang kalibutan.

24Natawo na ako sang wala pa ang mga kadagatan, sang wala pa ang mga tuboran sang tubig.

25Natawo na ako sang wala pa ang mga kabukiran, sang wala pa mapahamtang ang mga bakulod sa ila mga lugar,

26sang wala pa mahimo sang Dios ang duta kag ang iya mga kaumhan, ukon ang nahauna nga yab-ok sang duta.

27Didto ako sang pagpahamtang niya sang langit, sang pagbutang niya sang kadaygan sang kadagatan,

28sang pagpahamtang niya sang mga panganod sa langit, sang pag-abri niya sang mga tuboran sang kadagatan,

29sang pagmando niya sang mga tubig sa dagat nga indi maglapaw sa ginbutang niya nga dulonan. Didto ako sang pagbutang niya sang mga sadsaran sang duta.

30Yara ako sa tupad niya kaangay sang manugdumala sang obra, ako ang iya kalipayan adlaw-adlaw, malipayon ako sa gihapon sa iya presensya,

31nga nasadyahan sang kalibutan kag sang mga katawhan.

32“Karon, mga pamatan-on, magpamati kamo sa akon. Tumana ang akon ginasiling kag manginmalipayon kamo.

33Magpamati kamo sa ginatudlo sa inyo. Magmaalam kamo, kag indi ini pagpatumbayai.

34Ang tawo nga nagapamati sa akon manginmalipayon, ang nagabantay sa akon pwertahan adlaw-adlaw, nga nagahulat sa atubangan sang akon balay.

35Ang tawo nga nakakita sa akon nakakita sing kabuhi, kag ang Ginoo malipay sa iya.

36Ang tawo nga wala makakita sa akon nagasakit sang iya kaugalingon. Ang bisan sin-o nga nagadumot sa akon nagahigugma sang kamatayon.”

← Chapter 7 Jump to: Chapter 9 →