Proverbs 17

Ilonggo (Maayong Balita nga Biblia (2012))

← Chapter 16 Jump to: Chapter 18 →

1Mas maayo pa nga magkaon sing dukot sang kan-on nga may paghidait, sang sa magpunsyon sa balay nga puno sang kagamo.

2Ang maabtik nga suloguon magagahom sa wala pulos nga anak sang iya amo, kag magapakigbahin sang panublion.

3Ang bulawan kag pilak ginatilawan paagi sa kalayo, kag ang tagipusoon sang tawo ginatilawan sang Ginoo.

4Ang malaut nga mga tawo nagapamati sang malaut nga mga panghunahuna kag ang mga butigon nagapamati sang kabutigan.

5Ang nagayaguta sa mga imol nagainsulto sa Dios nga nagtuga sa ila. Ang nagakalipay sa malain nga kapalaran sang iban pagasilutan.

6Ang mga lolo kag mga lola nagapabugal sang ila mga apo, subong nga ang mga kabataan nagapabugal sang ila mga ginikanan.

7Ang talahuron nga tawo wala nagabutig, subong nga ang buangbuang nagahambal nga wala sing pulos.

8May mga tawo nga nagahunahuna nga ang hamham kaangay sang madyik. Nagapati sila nga ini sarang makahimo sang bisan ano nga butang.

9Kon luyag ka nga mauyonan sang mga tawo, patawara sila kon makasayop sila sa imo. Ang paghupot sang aligutgot nagaguba sang pag-amiguhay.

10Madamo ang matun-an sang maalam nga tawo sa isa lang ka pagsaway, sang sa isa ka buangbuang sa 100 ka paghanot.

11Ang kamatayon magaabot kaangay sang isa ka mapintas nga manugtunda sa malaut nga mga tawo nga pirme lang nagatuga sing gamo.

12Mas maayo pa nga makasugata ka sang oso nga ginkawatan sing mga tutoy, sang sa isa ka buangbuang nga tawo sa iya kabuangan.

13Kon balusan mo sing malain ang maayo, ang malain indi gid magbiya sa imo balay.

14Ang pagsugod sang binaisay kaangay sang diutay nga litik sang punong sang tubig. Tapnaa ini sa wala pa ini magdaku.

15Ang Ginoo naakig gid sa nagakondenar sa tawo nga wala sing sala, kag nagapakamatarong sang malaut nga tawo.

16Wala sing pulos para sa buangbuang ang paggasto sing kwarta sa pagtuon, tungod kay indi man sia makahangop.

17Ang abyan nagahigugma sa tanan nga tion. Ano ang pulos sang mga mag-utod kon wala sila nagabinuligay sa kalisdanan?

18Ang tawo lamang nga buangbuang ang nagasaad sa pagbayad sang kautangan sang iya kasilingan.

19Ang maluyagon sang sala maluyagon sang gamo. Ang tawo nga nagapahambog sa tanan nga tion nagapangita sing gamo.

20Ang tawo nga nagapanghunahuna kag nagahambal sing malaut wala sing makuha nga maayo, kundi kalaglagan.

21Kalisod lamang kag pag-antos ang makuha sang isa ka ginikanan nga ang iya anak nagabinuang.

22Ang pagkamalipayon nagapaayo sang lawas, kag ang pagkamasinulob-on nagapaas-as.

23Ang malaut nga mga hukom nagabaton sing hamham sa tago, kag ang ila paghukom indi na matarong.

24Ang maalam nga tawo nakahibalo maghimo kon ano ang maayo, pero ang buangbuang indi makahibalo maghimo sing desisyon.

25Ang buangbuang nga anak nagadala sing kalisod sa iya amay, kag tama nga kasakit sa iya iloy.

26Indi matarong ang pagsilot sa tawo nga wala sing sala, kag malain ang pagbunal sa dungganon nga mga tawo tungod sang ila kaayo.

27Ang maalam nga tawo indi palahambal. Ang tawo nga may paghangop indi dasudaso.

28Bisan gani ang mga buangbuang ginakabig nga maalam kag may paghangop kon maghipos sila kag indi magsagad hambal.

← Chapter 16 Jump to: Chapter 18 →