Proverbs 24

Ilonggo (Maayong Balita nga Biblia (2012))

← Chapter 23 Jump to: Chapter 25 →

1Indi ka magkahisa sa malaut nga mga tawo, kag indi ka magpangamigo sa ila.

2Ang ila ginapanghunahuna amo lamang ang pagtuga sing kagamo. Sa tagsa nila ka paghambal may masaklaw.

3Ang kaalam kag paghangop amo ang sadsaran sang puloy-an.

4Kon may ihibalo, ang mga kwarto ginsangkapan sing malahalon kag matahom nga mga butang.

5Ang maalam mas maayo pa sang sa makusog, kag ang ihibalo mas maayo pa sang sa kusog.

6Dapat ka magplano sing maayo sa wala ka pa magpakig-away sa gira, kay kon may madamo ka nga palamangkutan, mas daku ang imo kahigayunan sa pagdaog.

7Ang mga hulobaton nga may kaalam indi mahangpan sang buangbuang. Wala sia sing matugda kon ang importante nga mga butang ginapatugsilingan.

8Kon pirme ka lang nagaplano sang malain, mabantugan ka nga manugtuga sang kagamo.

9Ang bisan ano nga padugi nga ginapanghunahuna sang buangbuang sala. Ang mga katawhan indi luyag sa tawo nga wala sing iban nga ginahimo kundi pagtamay lang sa iban.

10Kon maluya ka sa tion sang ital-ital, matuod gid nga maluya ka.

11Indi ka magpabaya sa pagluwas sang tawo nga wala sang sala nga ginadala nga pagapatyon.

12Ayhan magasiling ka nga wala ka sing labot sa iya, pero ang Dios nakahibalo kag nagahukom sang imo mga tinutuyo. Nagabantay sia sa imo, kag nakahibalo sia. Magabalos sia sa imo suno sa imo ginahimo.

13Anak, magkaon ka sing dugos kay maayo ini. Kag subong nga ang dugos sa balay sang putyokan matam-is kon imo dimdiman,

14amo man ang kaalam maayo sa kalag. Angkuna ini kag may maayo ka nga palaabuton.

15Indi ka magmanginkaangay sang buyong nga nagapadihot sa pagpangawat sa matarong nga tawo ukon sa pagkuha sang iya balay.

16Bisan kapila matumba ang matarong nga tawo, sa gihapon nagabangon sia. Pero ang kalalat-an nagalaglag sang malaut.

17Indi pagkadlawi ang imo kaaway kon yara sia sa kalalat-an, kag indi ka magkalipay kon makadusmo sia.

18Ang Ginoo makahibalo kon kadlawan mo sia kag indi sia maluyag sini. Ayhan indi niya sia pagsilutan.

19Indi ka magpalibog tungod sa malaut nga mga tawo. Indi ka magkahisa sa ila ginahimo.

20Ang malaut nga tawo wala sing maayo nga palaabuton, wala sia sing paglaom.

21Anak, tahura ang Ginoo kag ang hari. Indi ka magpakig-upod sa mga tawo nga nagapamatok sa ila,

22kay ina nga mga tawo sarang malaglag sa isa ka pamisok. Kahibalo ka bala sang kalalat-an nga mahatag sang Dios ukon hari?

23Ang maalam nga mga tawo nagsiling man sini nga mga butang: Indi matarong para sa isa ka hukom nga sia may pinilian.

24Kon hilwayon niya ang nakasala, pakamalauton kag dumtan sia sang tanan nga mga tawo sa kalibutan.

25Pero ang mga hukom nga nagasilot sang may sala manginmainuswagon kag magaagom sing maayo nga ngalan.

26Ang sabat nga wala sing lipudlipod isa ka tanda sang matuodtuod nga pag-abyanay.

27Indi ka magpatindog sing balay kag magpangasawa kon indi pa handa ang imo uma, kag kon wala pa ikaw sing pangita.

28Indi ka magsaksi batok sa imo isigkatawo sa wala sing kabangdanan, ukon magsugid sing di-matuod nahanungod sa iya.

29Indi ka magsiling, “Himuon ko sa iya ang iya ginhimo sa akon! Balusan ko sia sang ginhimo niya sa akon!”

30Nag-agi ako sa kaumhan kag sa katamnan sang ubas sang isa ka matamad kag buangbuang nga tawo.

31Nakita ko nga puno ini sang tunokon nga magamay nga mga kahoy kag sang matag-as nga mga hilamon. Ang kudal nga bato sa palibot sini natumba na.

32Gintan-aw ko ini kag nagpainuino ako kag nakakuha ako sini nga leksyon:

33Sigi, maghilayhilay ka kag magtulogtulog. Magpanimuko ka kag magpulopahuway,

34pero samtang nagakatulog ka, ang kaimulon magaabot sa imo kaangay sang makawat nga nasangkapan sa hinganiban.

← Chapter 23 Jump to: Chapter 25 →