Proverbs 14

Ilonggo (Maayong Balita nga Biblia (2012))

← Chapter 13 Jump to: Chapter 15 →

1Ang maalam nga babayi nagapalig-on sang panimalay, pero ang buangbuang nga babayi nagaguba sini.

2Ang maminatud-on nagapakita sang pagtahod sa Ginoo, pero ang madaya wala nagapahayag sang pagtahod sa Ginoo.

3Ang mga pulong sang buangbuang magadala sing silot sa iya, pero ang mga pulong sang matarong nga tawo nagatipig sa iya.

4Kon wala ka sing karabaw nga inug-arado diutay ang imo maani, pero kon may mga karabaw ka madamo ang imo mapatubas.

5Ang masaligan nga saksi nagasugid sang kamatuoran, pero ang indi masaligan wala sing iban nga ginasugid kundi kabutigan.

6Ang bugalon nga tawo mabudlay pahangpon, pero ang maalam nga tawo madali lang makahangop.

7Likawi ang buangbuang nga tawo, kay wala sia sing sarang matudlo sa imo nga maayo.

8Ngaa bala nga ang maalam nga tawo maabtik? Tungod kay nakahibalo sia sang iya pagahimuon. Ngaa bala nga ang buangbuang nga tawo balingag? Tungod kay naghunahuna sia nga nakahibalo sia.

9Ang buangbuang nga mga tawo wala lang nagasapak kon makasala sila, pero ang maayo nga mga tawo nagapangayo sing patawad.

10Ikaw lang ang makahibalo sang imo kalipay kag kasakitan. Wala sing may makabatyag sini upod sa imo.

11Bisan nalaglag na ang balay sang malaut nga tawo, ang balay sang matarong nga tawo nagatindog sa gihapon nga malig-on.

12May yara nga dalan nga ang dumdom sang tawo husto, pero nagapadulong ini sa kamatayon.

13Ang kaladlawon sang tawo ayhan makatago sang iya kasubo, pero kon tapos na ang kalipay ang kasubo yara sa gihapon.

14Ang malain nga tawo magabaton sang nagakabagay sa iya, pero ang maayo nga tawo magabaton sing balos tungod sang iya mga binuhatan.

15Ang buangbuang nagapati sang bisan ano, pero ang maalam nga tawo nagaandam sang iya kaugalingon nga tikang.

16Ang maalam nga tawo mainandamon kag nagalikaw sa gamo, pero ang buangbuang nga tawo wala nagaandam kag dasudaso.

17Ang tawo nga mainiton nagahimo sing kabuangan, pero ang maalam nga tawo mapainulobon.

18Ang ignorante nga mga tawo nagabaton sang nagakabagay sa ila kabuangan, pero ang mga maalam ginabalusan sing ihibalo.

19Ang malaut nga mga tawo magasaludo sa mga matarong, kag magapakitluoy sa ila.

20Wala sing may nagasapak sa imol nga mga tawo, bisan pa ang iya kaingod, pero ang manggaranon may madamo nga mga abyan.

21Kon luyag mo magmalipayon magmabinuligon ka sa mga imol, kay sala ang pagtamay sa bisan kay sin-o.

22Ang nagahimo sing maayo pagasaligan kag pagatahuron sang iban, pero ang nagahimo sing malaut nakasala.

23Ang nagaobra makakita sing palangabuhian, pero ang nagapungko kag nagawakal lang magaimol.

24Ang maalam nga mga tawo ginabalusan sing manggad, pero ang mga buangbuang makilala sa ila kabuangan.

25Ang isa ka saksi nagaluwas sang mga kabuhi kon nagasugid sia sang kamatuoran, pero ginaluiban niya ang mga tawo kon nagasugid sia sing binutig.

26Ang pagtahod sa Ginoo nagahatag sing pagsalig kag kalig-unan sa tawo kag sa iya panimalay.

27Ang pagtahod sa Ginoo amo ang tuboran sang kabuhi, kag paagi sini makalikaw ang tawo sang kamatayon.

28Ang pagkagamhanan sang hari depende sa kadamuon sang mga tawo nga iya ginagamhan. Kon wala sila wala man sia sing gahom.

29Ang tawo nga indi madali mangakig maalam, pero ang mainiton nagapakita lamang sang iya pagkabuang.

30Ang malinong nga panghunahuna nagahatag sing maayo nga lawas, pero ang kahisa kaangay sang kanser.

31Ang nagapigos sang mga imol nagapakahuya sa Dios nga nagtuga sa ila, pero ang kaayo nga ginapakita sa mga imol nagapasidungog sa Dios.

32Ang malain nga mga hinimuan sang malaut nga tawo amo ang kabangdanan sang iya pagkapukan, pero ang matarong nga tawo ginatipigan sang iya pagkamaminatud-on.

33May kaalam ang tagsa ka panghunahuna sang maalam nga tawo, pero ang mga buangbuang wala gid nakahibalo nahanungod sang kaalam.

34Ang pagkamatarong nagapadaku sang pungsod, pero ang sala nagapakahuya sang iya mga tawo.

35Ang mga hari nalipay sa mga alagad nga maalam, pero ginasilutan nila ang wala nagahimo sang ila katungdanan.

← Chapter 13 Jump to: Chapter 15 →