Proverbs 25

Ilonggo (Maayong Balita nga Biblia (2012))

← Chapter 24 Jump to: Chapter 26 →

1Ari pa gid ang iban nga mga hulobaton ni Solomon nga ginkopya sang mga sekretaryo ni Haring Ezequias sang Juda.

2Ginapasidunggan naton ang Dios tungod sang mga butang nga iya ginatago. Ginapasidunggan naton ang mga hari tungod sang mga butang nga ila ginasaysay.

3Indi ka gid makahibalo kon ano ang ginapanghunahuna sang hari. Ang iya mga panghunahuna labaw sa aton, kaangay sang kataason sang langit, ukon sang kadalumon sang kadagatan.

4Kuhaa ang mga higko nga nagasimbog sa pilak, kag ang isa ka platero makahimo sang isa ka butang nga matahom.

5Pahalina ang malain nga mga palamangkutan sang hari, kag ang katarungan magaluntad sa iya ginharian.

6Kon nagatindog ka sa atubang sang hari, indi ka magpakita sa iya nga daw gamhanan ka kag sobra ang imo masarangan.

7Mas maayo pa nga tawgon ka nga magpungko sa atubangan sang sa singganon ka nga ihatag ang imo lugar sa tawo nga mas importante pa sang sa imo.

8Indi ka magdasudaso sa pagkadto sa korte tungod sang imo nakita. Kon sa ulihi ang isa ka saksi makapamatuod nga sala ikaw, ti, ano na lang ang himuon mo?

9Kon ikaw kag ang imo kaingod may kasuayon, mag-areglahanay kamo kag indi kamo magpanugid sang inyo mga sekrito.

10Basi ang iban makahibalo nga indi ka masaligan sang sekrito kag madula ang imo dungog.

11Ang isa ka panghunahuna nga napabutyag sing maayo kaangay sang nadesinyo nga bulawan nga nabutang sa balayan nga pilak.

12Ang paandam sang maalam nga tawo sa isa ka tawo nga luyag magpamati mas mahal pa sang sa bulawan nga mga singsing, ukon sa alahas nga nahimo sa puraw nga bulawan.

13Ang masaligan nga mensahero nagahatag sing maayo nga balatyagon sa nagapadala sa iya, subong sang mabugnaw nga tubig sa kainit sang tig-alani.

14Ang mga tawo nga nagasaad sang mga butang nga wala man lang nila ginahatag, kaangay sang mga gal-om kag hangin nga wala nagadala sing ulan.

15Kon may pasensya ka madaog mo ang mabaskog nga pagpamatok sa imo, kag bisan pa ang mga pangulo mahaylo mo.

16Indi ka magkaon sing dugos nga sobra sa kinahanglanon mo, kay basi magsululuka ka.

17Indi ka magbisita pirme sa imo kaingod, kay basi tak-an sia kag maakig sa imo.

18Ang tawo nga nagasugid sing butig nahanungod sang iya isigkatawo kaangay sa isa ka espada, inuglampos, ukon mataliwis nga baslay nga makamamatay.

19Sa tion sang kapiutan kon magsalig ka sa tawo nga indi masaligan daw kaangay ka sang tawo nga nagausang sa nagahunga nga ngipon, ukon nagalakat sa bali nga tiil.

20Ang pagkanta sa tawo nga nasub-an daw pareho ini nga ginauba mo ang iya bayu sa tion sang tigtulognaw ukon kaangay nga ginabutangan mo sing asin ang iya pilas.

21Kon ang imo kaaway ginagutom, pakan-a sia. Kon ginauhaw, paimna sia.

22Tungod sang imo ginhimo magabatyag sia sing tama nga kahuya, kag ang Ginoo magabalos sa imo.

23Ang kutsokutso nagadala sing kaakig, pareho ka pat-od sang pagdala sang amihan sing ulan.

24Mas maayo pa ang mag-estar ka sa gwa sang balay sang sa mag-estar ka sa sulod upod sa asawa nga masuayon.

25Ang pagkabati mo sang maayong balita nga halin sa malayo nga lugar kaangay sang mabugnaw nga tubig kon nagamala ang imo tutonlan sa kauhaw.

26Ang maayo nga tawo nga nagapasugot sa malain nga tawo pareho sang tuboran nga mahigko, ukon bubon nga ginhiluan.

27Ang sobra nga dugos malain para sa imo, kag amo man ang pagtinguha sa pag-agom sing sobra nga pagdayaw.

28Kon indi ka makapugong sang imo kaakig, kaangay ikaw sang isa ka siudad nga wala sing pader kag indi matabangan kon salakayon.

← Chapter 24 Jump to: Chapter 26 →