Proverbs 31

Ilonggo (Maayong Balita nga Biblia (2012))

← Chapter 30 Jump to:

1Amo ini ang talalupangdon nga mga pulong nga ginhambal sang iloy ni Haring Lemuel sa iya:

2“Ikaw ang akon pinalangga nga anak, ang sabat sang akon mga pangamuyo. Ano bala ang isiling ko sa imo?

3Indi paggamita ang tanan mo nga kusog kag tanan mo nga kwarta sa mga babayi, kay ang mga hari nagkalapukan tungod sa ila.

4Lemuel, magpamati ka. Ang mga hari indi dapat mag-inom sang bino, ukon maghandom sang makahulobog nga ilimnon.

5Kon mag-inom sila, nagakalipat sila sang mga kasugoan, kag wala nila ginasapaka ang mga kinamatarong sang mga tawo nga may kinahanglan.

6Paimna sing bino kag makahulobog nga ilimnon ang mga nagahimumogto kag ang mga yara sa kabudlayan,

7kag malimtan nila ang ila kaimulon kag mga kalisod.

8“Maghambal ka para sa mga tawo nga indi makahambal para sa ila kaugalingon. Apini ang mga kinamatarong sang tanan nga wala sing may nagaapin.

9Maghambal ka para sa ila, kag magmatarong ka nga hukom. Apini ang mga kinamatarong sang mga imol kag nawad-an.”

10Daw ano kabudlay ang pagpangita sang isa ka huwaran nga asawa! Labaw pa sia sang sa mga alahas!

11Ang iya bana nagasalig sa iya, kag sia nga bana indi makulangan sang iya kinahanglanon.

12Samtang nagakabuhi pa sia, wala sia sing ginahimo nga malain sa iya bana, kundi maayo lang.

13Maukod sia sa paghabol sang tela nga delana kag lino.

14Nagadala sia sing pagkaon sa ila balay gikan sa malayo nga mga lugar, kaangay sang mga bapor sa negosyo.

15Nagamata sia sing aga pa sa paghanda sing pagkaon para sa iya panimalay kag nagatudlo sa iya mga suloguon nga babayi kon ano ang ila dapat himuon.

16Ginatan-aw niya ang uma nga balaklon, kag ginabakal niya ini, kag sa iya natipon nga kwarta ginapatamnan niya ini sang ubas.

17Mabakas sia, mapisan kag maayo sing lawas.

18Nahibal-an niya ang kapuslanan sang iya ginahimo, kag nagaobra sia tubtob hanagob na ang kagab-ihon.

19Sia ang nagahimo sang iya bunang kag nagahabol sang iya bayu.

20Maalwan sia sa imol kag nawad-an.

21Wala sia nagapalibog kon magtigtulognaw, tungod kay ang iya panimalay may panapton para sa tugnaw.

22Nagahimo sia sing mga tela nga inugtabon sa katre, kag nagabayo sia sang mapino nga lino nga pula.

23Ang iya bana kilala sing maayo, isa sia ka opisyal sang banwa.

24Nagahimo sia sing mga bayu kag mga paha kag ginabaligya niya ini sa mga negosyante.

25Mabakod sia kag ginatahod, kag wala sia mahadlok sang palaabuton.

26Maalam sia kag malulo maghambal.

27Wala sia nagapahuway sa pag-obra, kag nagaatipan sia sang kinahanglanon sang iya panimalay.

28Ang iya mga kabataan nagapakamahal sa iya kag ang iya bana nagadayaw sa iya.

29Ang iya bana nagasiling, “Madamo ang maayo nga mga asawa, pero ikaw ang labing maayo sa tanan.”

30Ang kagayon malimbungon kag ang katahom umalagi, pero ang babayi nga nagatahod sa Ginoo dapat dayawon.

31Pasidunggi sia tungod sang tanan niya nga ginahimo. Bagay sia tahuron sang tanan.

← Chapter 30 Jump to:

Recommended Reading

Commentary Proverbs Commentaries → Devotional Proverbs Devotional Guide → Get This Bible 2012 Study Bible →