2 Kings 11

Kamba (Mbivilia) 1956

← Chapter 10 Jump to: Chapter 12 →

1Na ĩndĩ yĩla Athalia inyia wa Aasia wonie kana mwana wake nĩ mũkw’ũ, ookĩla na amina ũsyao w’onthe wa kĩũsumbĩ.

2Ĩndĩ Yeoseva, mwĩĩtu wa mũsumbĩ Yolamu, mwĩĩtu‐a‐inyia wa Aasia, oosa Yoasi mwana wa Aasia, na amũya kũmumya ananĩ ma mũsumbĩ ala mooaawa, o we na mũei wake, na amekĩa kasũmbanĩ ka ũkoma; na mamũvitha Athalia ndakamwone, na ĩndĩ ndaaũawa;

3na aĩ nake avithĩtwe nyũmbanĩ ya Yeova myaka thanthatũ. Na Athalia asumbĩka ĩ nthĩ.

4Na mwaka wa mũonza Yeoiata atũmana na aete makavuteni ma maana ma Akali na ma nguthu ya asũvĩi, na amaete vala ũĩ nyũmbanĩ ya Yeova; na atianĩa ũtianĩo nao, na ameavĩthĩsya nyũmbanĩ ya Yeova, na amon’ya mwana wa mũsumbĩ.

5Na ameaĩa, akĩmea, Ũũ nĩw’o ũla mwĩĩka: kĩlungu kya katatũ kya inyw’ĩ, ala mũkaa mũthenya wa savato, mũkeethĩwa asyaĩĩsya ma kũsũvĩa nyũmba ya mũsumbĩ;

6na kĩlungu kĩngĩ kĩkeethĩwa mbingĩlonĩ yĩtawa Suli; na kĩlungu kĩngĩ mbingĩlonĩ ĩla yĩ ĩtina wa nguthu ya asũvĩi: ũu nĩw’o mwĩsyaĩĩasya nyũmba, na mũkeethĩwa kĩsiĩĩi.

7Na ila nguthu ilĩ sya inyw’ĩ, o onthe ala maumaalaa mũthenya wa savato, mũkasũvĩa nyũmba ya Yeova mũthyũlũlũkĩte mũsumbĩ.

8Na mũkathyũlũlũka mũsumbĩ ngalĩ syonthe, kĩla mũndũ akwete mĩio yake ya kaũ kw’okonĩ kwake; na ũla wĩvotela nthĩnĩ wa mĩselele, nĩoawe: na mwĩĩthĩwa na mũsumbĩ yĩla wĩumaala, na yĩla wĩsyoka.

9Na makavuteni ma maana meeka kwĩanana na w’onthe ũla mũthembi Yeoiata weaĩte; na moosa kĩla mũndũ andũ make, ala maĩ ma ũlika mũthenya wa savato, na ala maĩ ma kumaala mũthenya wa savato, na mooka vala ve mũthembi Yeoiata.

10Na mũthembi amanenga makavuteni ma maana matumo na ngao ila syaĩ sya mũsumbĩ Ndaviti, ila syaĩ nyũmbanĩ ya Yeova.

11Na asũvĩi maũngama, kĩla mũndũ akwete mĩio yake ya kaũ kw’okonĩ kwake, kuma ngalĩ ya kwo’ko kwa aũme kũvika ngalĩ ya kw’oko kwa aka kwa nyũmba, vakuvĩ na kĩthembeo na nyũmba, mathyũlũlũkĩte mũsumbĩ ngalĩ syonthe.

12Nĩvo ĩndĩ waumaalilye mwana wa mũsumbĩ, na amwĩkĩa ĩla ngovĩa ya ũsumbĩ, na amũnenga ũla ũkũsĩ; na mamũtw’ĩkĩthya mũsumbĩ, na mamwĩtĩkĩsya mauta; na makũnangan’ya mbĩ, na masya, Mũsumbĩ nĩekale thayũ ĩvinda ĩasa.

13Na yĩla Athalia wewie kĩlonzo kya asũvĩi na kya andũ, ooka vala ve andũ nyũmbanĩ ya Yeova:

14na asisya, na, kaĩ, mũsumbĩ aũngyĩ vakuvĩ na kĩtuĩ, o tondũ kweekawa, na makavuteni na masoo vakuvĩ na mũsumbĩ; na andũ onthe ma ĩ nthĩ matana, na mavuva masoo. Nĩvo ĩndĩ Athalia watembũangie ngũa syake, na asya, Nĩ ũvinga! Nĩ ũvinga!

15Na mũthembi Yeoiata ameaĩa makavuteni ma maana ala maiĩtwe ĩũlũ wa nguthu, na amea, Mumaalĩlye katĩ wa mĩselele; na ũla wĩmũatĩĩa mũaei na ũvyũ. Nũndũ mũthembi aisye, Ndakoaĩwe nyũmbanĩ ya Yeova.

16Kwondũ wa ũu mamwathũkĩa; na athi na nzĩa ya ũlikĩlo wa mbalasi wa nyũmba ya mũsumbĩ: na ooaĩwa vo.

17Na Yeoiata atianĩa ũtianĩo katĩ wa Yeova na mũsumbĩ na andũ, atĩ makeethĩwa andũ ma Yeova; o na katĩ wa mũsumbĩ na andũ.

18Na andũ onthe ma ĩ nthĩ mathi nyũmbanĩ ya Mbaali, na mamĩomboanga; ithembeo syayo na mĩvw’anano yayo matũlanga ilungu vyũ, na mooaĩa Matani mũthembi wa Mbaali mbee wa ithembeo. Na mũthembi aia anene ĩũlũ wa nyũmba ya Yeova.

19Na oosa makavuteni ma maana, na Akali, na asũvĩi, na andũ ma ĩ nthĩ; na mamũete mũsumbĩ kuma nyũmbanĩ ya Yeova, na mooka na nzĩa ya mbingĩlo ya asũvĩi asu kũvika nyũmba ya mũsumbĩ. Na ekala kĩvĩlanĩ kya ũsumbĩ kya asumbĩ.

20Na ĩndĩ andũ onthe ma ĩ nthĩ matana, na ndũa yausya. Na maĩ manamũaĩa Athalia na ũvyũ nyũmbanĩ ya mũsumbĩ.

21Yeoasi aĩ wa myaka mũonza yĩla wambĩlĩlye kũsumbĩka.

← Chapter 10 Jump to: Chapter 12 →