2 Kings 25

Kamba (Mbivilia) 1956

← Chapter 24 Jump to:

1Na kweethĩwa mwaka wa kenda wa kũsumbĩka kwake, mwei wa ĩkũmi, mũthenya wa ĩkũmi wa mwei, Nevukatilesa mũsumbĩ wa Mbaviloni ooka Yelusaleme, we na ita syake syonthe, na mamba maeema mamĩtaũĩĩe; na mamyakĩa ngome kũmĩthyũlũlũka ngalĩ syonthe.

2Na ĩndĩ ndũa yatw’ĩkanĩw’a kũvika mwaka wa ĩkũmi na ũmwe wa kũsumbĩka kwa mũsumbĩ Nzetekia.

3Mũthenya wa kenda wa mwei wa kana yũa yaĩ ĩnene ndũanĩ, kũvika kũtyaĩ lĩu kwondũ wa andũ ma ĩ nthĩ.

4Nĩvo ĩndĩ vandũ vavũthũiwe ndũanĩ, na andũ onthe ma kaũ makĩa ũtukũ na nzĩa ya mbingĩlo ĩla yaĩ katĩ wa maũvai elĩ, ĩla yaĩ vakuvĩ na mũũnda wa mũsumbĩ (na ĩndĩ Akalitei maĩ manathyũlũlũka ndũa ngalĩ syonthe); na mũsumbĩ aenda na nzĩa ya Alava.

5Ĩndĩ ita sya Akalitei syamũatĩĩa mũsumbĩ, na syamũkwatĩa ndiĩnĩ sya Yeliko; na ita syake syonthe syanyaĩĩkwa kuma vala ũĩ.

6Nĩvo ĩndĩ makwatie mũsumbĩ, na mamũtwaa vala ve mũsumbĩ wa Mbaviloni ku Livila; na mamũtw’ĩa sila.

7Na mooaa ana ma Nzetekia ene na metho make, na mamũvũthũanga Nzetekia metho, na mamwĩkĩa mbĩngũ, na mamũtwaa Mbaviloni.

8Na ĩndĩ mwei wa katano, mũthenya wa mũonza wa mwei, ũla waĩ mwaka wa ĩkũmi na kenda wa kũsumbĩka kwa mũsumbĩ Nevukatilesa, mũsumbĩ wa Mbaviloni, nĩvo Nevusalatani, kavuteni wa nguthu ya asũvĩi, mũthũkũmi wa mũsumbĩ wa Mbaviloni, wokie Yelusaleme.

9Nake avĩvya nyũmba ya Yeova, na nyũmba ya mũsumbĩ; na nyũmba syonthe sya Yelusaleme, o kĩla nyũmba nene, avĩvya na mwaki.

10Na ita syonthe sya Akalitei, ila syaĩ na kavuteni wa asũvĩi, syaomboanga maũvai onthe ma Yelusaleme ngalĩ syonthe.

11Na ũtialo wa andũ ala matialilwe ndũanĩ, na ala meetilile, o asu ala meetilile maende kwa mũsumbĩ wa Mbaviloni, na ũtialo wa andũ asu aingĩ, Nevusalatani kavuteni wa asũvĩi amatwaa me atave.

12Ĩndĩ kavuteni wa asũvĩi atia amwe ala ngya ki ma ĩ nthĩ methĩwe asũvĩi ma mĩsavivũ na aĩmi.

13Na ituĩ sya ũthuku ila syaĩ nyũmbanĩ ya Yeova, na ala matina na ũla ũkanga wa ũthuku ila syaĩ nyũmbanĩ ya Yeova, Akalitei maitilanga ilungu, na matwaa ũthuku wasyo Mbaviloni.

14Na matwaa mbisũ, na mĩko, na mĩkasi, na syĩko, na mĩio yonthe ya ũthuku ĩla mathũkũmaa nayo.

15Na tũvũngũlyũ twa ũkua makaa, na masaani manene, kĩla kyaĩ kya thaavu, thaavunĩ, na kĩla kyaĩ kya vetha, vethanĩ, kavuteni wa asũvĩi atwaa.

16Ituĩ ilĩ, na ũkanga ũsu ũmwe, na ala matina, ila Solomoni waseũvĩtye kwondũ wa nyũmba ya Yeova, ũthuku wa mĩio ĩsu yonthe ndwaĩ ũthimĩka.

17Ũtũlu wa kĩtuĩ kĩmwe waĩ mĩkono ĩkũmi na nyanya, na ngovia ya ũthuku yaĩ ĩũlũ wakyo; na ũtũlu wa ngovia waĩ mĩkono ĩtatũ, yĩ na seng’eng’e na makũngũmanga kũthyũlũlũka ngovianĩ, syonthe sya ũthuku: na kĩtuĩ kya kelĩ kyaĩ na syĩndũ syailyĩ o isu kĩ na seng’eng’e.

18Na ũla kavuteni wa asũvĩi oosa mũthembi mũnene Selaia, na Nzevania mũthembi wa kelĩ, na ala asũvĩi atatũ ma mwalyonĩ:

19na ndũanĩ oosa mũnene ũla waiĩtwe ĩũlũ wa andũ ma kaũ; na andũ atano ma ala monaa ũthyũ wa mũsumbĩ, ala meethĩiwe ndũanĩ; na mũandĩki, o kavuteni wa nguthu, ũla wombanasya andũ ma ĩ nthĩ; na andũ mĩongo thanthatũ ma andũ ma nthĩ ĩsu, ala meethĩiwe ndũanĩ.

20Na Nevusalatani kavuteni wa asũvĩi amosa, na amatwaa kwa mũsumbĩ wa Mbaviloni ku Livila.

21Na mũsumbĩ wa Mbaviloni amakũna, na amoaĩa ku Livila, nthĩ ya Amathi. Ũu nĩw’o Yuta matwaiwe me atave kumwa nthĩ yoo.

22Na ũndũ wa andũ ala matialile nthĩ ya Yuta, ala Nevukatilesa mũsumbĩ wa Mbaviloni wamatiie, amũtw’ĩkĩthya Ngetalia mwana wa Aikamu, mwana wa Savani, ngavana woo.

23Na ĩndĩ yĩla makavuteni onthe ma ita, mo na andũ moo, meewie kana mũsumbĩ wa Mbaviloni nũmũtw’ĩkĩthĩtye Ngetalia ngavana, mooka kwa Ngetalia ku Misiva, o Isumaeli mwana wa Nethania, na Yoanani mwana wa Kalea, na Selaia mwana wa Tanumethi Mũnetovathi, na Yaasania mwana wa Mũmaaka, mo na andũ moo.

24Na Ngetalia ameavĩa mo na andũ moo, na amea, Mũtikakĩe nũndũ wa athũkũmi ma Akalitei: ĩkalai nthĩ ĩno, mũthũkũme mũsumbĩ wa Mbaviloni na kũkeethĩwa kũseo kwenyu.

25Ĩndĩ kweethĩwa mwei wa mũonza, Isumaeli mwana wa Nethania, mwana wa Elisama wa ũsyao wa kĩũsumbĩ, ooka, na andũ ĩkũmi vamwe nake, na amũkũna Ngetalia, na akw’a, o na Ayuti na Akalitei ala maĩ vamwe nake ku Misiva.

26Na andũ onthe anini o na anene, na makavuteni ma ita, mookĩla, na maenda Misili; nũndũ maĩ na w’ĩa ũndũ wa Akalitei.

27Na kweethĩwa mwaka wa mĩongo ĩtatũ na mũonza wa kũtavwa kwa Yeoĩakini mũsumbĩ wa Yuta, mwei wa ĩkũmi na ĩlĩ, mũthenya wa mĩongo ĩlĩ na mũonza wa mwei, Evili‐melotaki mũsumbĩ wa Mbaviloni, mwaka ũla wambĩlĩlye kũsumbĩka, ookĩlya mũtwe wa Yeoiakini mũsumbĩ wa Yuta aume kolokolonĩ;

28na aneena nake nesa, na aia kĩvĩla kyake kya ũsumbĩ ĩũlũ wa ivĩla sya ũsumbĩ sya asumbĩ ala maĩ nake Mbaviloni,

29na akũan’ya ngũa syake sya kolokolonĩ. Na Yeoiakini aĩsaa lĩu e nake mavinda onthe mĩthenya yonthe ya thayũ wake:

30na ũndũ wa lĩu wake, kwaĩ lĩu wa mavinda onthe wanengawe nĩ mũsumbĩ, kĩla mũthenya lĩu, mĩthenya yonthe ya thayũ wake.

← Chapter 24 Jump to: