2 Kings 7

Kamba (Mbivilia) 1956

← Chapter 6 Jump to: Chapter 8 →

1Na Elisa asya, Ĩw’ai ndeto ya Yeova: ũũ nĩw’o Yeova ũnũkwasya, Ũnĩ ta ĩvinda yĩĩ kĩthimo kya mũtu mũvinyũ kĩkathoow’a na sekeli, na ithimo ilĩ sya mbaale na sekeli, mbingĩlonĩ ya Samalia.

2Nĩvo ĩndĩ kavuteni ũla mũsumbĩ wekwatĩlaa kw’oko kwake wasũngĩie mũndũ wa Ngai, na amwĩa, Sisya, o na kethĩwa Yeova akaseũvya mbũthi ĩtunĩ, ũndũ ũsu nũtonya kwĩthĩwa? Na amũsũngĩa, Sisya, ũkawona na metho maku, ĩndĩ ndũkaya.

3Na ĩndĩ kwaĩ andũ ana mawaĩte mangũ ku ũlikĩlonĩ mbingĩlonĩ: na maneenan’ya ũmwe na ũla ũngĩ, Twĩĩkala vaa mũvaka twĩkw’a nĩkĩ?

4Ethĩwa twĩasya, Nĩtũũlika ndũanĩ, yũa yĩ ndũanĩ, na tũkakw’ĩa vo; na ethĩwa tũkekala vaa tũvindĩtye, no twĩkw’a. Kwondũ wa ũu ĩndĩ ũkai, na tũvalũke mokonĩ ma nguthu ya Asilia: ethĩwa nĩmeũtũeka twĩ thayũ, tũkekala thayũ; na ethĩwa nĩmekũtũaa, no twĩkw’a.

5Na mookĩla kwĩ ũmithi, maende mwakonĩ wa maeema wa Asilia; na yĩla mavikie ũtee wa mwako wa maeema wa Asilia, kaĩ, kũtyaĩ mũndũ vo.

6Nũndũ Mwĩaĩi nĩwatumie nguthu ya Asilia yĩw’a kĩtuu kya makasya, na kĩtuu kya mbalasi, o kĩtuu kya nguthu nene: na maneenan’ya ene kwa ene, Kaĩ, mũsumbĩ wa Isilaeli nũmaandĩkĩte asumbĩ ma Aititi na asumbĩ ma Amisili, matũvithũkĩe.

7Kwondũ wa ũu mookĩla na makĩa kwĩ ũmithi, na matia maeema moo, na mbalasi syoo, na mang’oi moo, o mwako wa maeema ũndũ wailyĩ, na makĩa matangĩĩe thayũ woo.

8Na yĩla asu mawaĩte mangũ mavikie ũtee wa mwako wa maeema, malika ĩeemanĩ yĩmwe, na maya na manyw’a, na makua kumya vo vetha, na thaavu, na ngũa, na mathi na maivitha; na masyoka, na malika ĩeemanĩ yĩngĩ, na makua kumya o na vo, na mathi na maivitha.

9Nĩvo ĩndĩ maneenanisye ene kwa ene, Tũtikwĩka nesa; ũmũnthĩ nĩ mũthenya wa ũvoo mũseo, na ithyĩ nĩtũvindĩtye: ethĩwa twĩĩkala kũvika kĩoko kũikya, ũsilĩlo ũkatũvikĩla; kwondũ wa ũu ĩndĩ ũkai, tũende tũtavye andũ ma nyũmba ya mũsumbĩ:

10Kwondũ wa ũu mooka na meeta mũsũvĩi wa mũomonĩ wa ndũa; na matavan’ya, makyasya, Twavika mwako wa maeema wa Asilia, na, kaĩ, kũtiĩĩ mũndũ vo, o na wasya wa mũndũ, ĩndĩ no mbalasi syovetwe, na mang’oi movetwe, na maeema o ũndũ mailyĩ.

11Na ameta asũvĩi; na matavya andũ ma nyũmba ya mũsumbĩ me nthĩnĩ.

12Na mũsumbĩ ookĩla ũtukũ, na amea athũkũmi make, Nĩngũmwon’ya yu ũndũ Asilia matwĩkĩte. Nĩmesĩ twĩ na nzaa; kwondũ wa ũu nĩmaumĩte mwakonĩ wa maeema mevithe kĩthekanĩ, makyasya, Yĩla meuma ndũanĩ, tũkamakwata me thaũ, na tũilika ndũanĩ.

13Na ũmwe wa athũkũmi make asũngĩa, na asya, Nĩngũkwĩsũva, amwe nĩmose mbalasi itano sya ila itialĩte, ila itialĩtw’e ndũanĩ (sisya, isu no ta ĩkomano yonthe ya Isilaeli yĩla yĩtialĩte nthĩnĩ wayo; sisya, isu no ta ĩkomano yonthe ya Isilaeli yĩla yĩminĩtwe); na tũtũmanei twone.

14Kwondũ wa ũu moosa makasya elĩ me na mbalasi; na mũsumbĩ atũmana maatiĩe nguthu ya Asilia, akyasya, Endai mũsisye.

15Na mamaatĩĩa kũvika Yolotani: na, kaĩ, nzĩa yonthe yausũĩte ngũa na mĩio, ĩla Asilia malekangilye mekalaatĩte. Na atũmwa masyoka, na matavya mũsumbĩ.

16Na andũ maumaala, na matava mwakonĩ wa maeema wa Asilia. Na kwondũ wa ũu kĩthimo kya mũtu mũvinyu wathoow’a sekeli, na ithimo ilĩ sya mbaale sekeli, kwĩanana na ndeto ya Yeova.

17Na mũsumbĩ aia kavuteni ũla wekwatĩlaa kw’oko kwake ethĩwe akĩsũvĩa mbingĩlo: na andũ mamũkinyangĩa mbingĩlonĩ, na akw’a o tondũ mũndũ wa Ngai ũnaisye, ũla ũnaneenie yĩla mũsumbĩ ũnatheeie vala ũĩ.

18Na kweethĩwa o tondũ mũndũ wa Ngai ũnatavĩtye mũsumbĩ, akyasya, Ithimo ilĩ sya mbaale sekeli, na kĩthimo kya mũtu mũvinyu sekeli, kũkeethĩwa ũu ũnĩ ta ĩvinda yĩĩ mbingĩlonĩ ya Samalia;

19na kavuteni ũsu asũngĩa mũndũ wa Ngai, na amwĩa, Yu, sisya, o na kethĩwa Yeova akaseũvya mbũthi ĩtunĩ, ũndũ ta ũsu nũtonya kwĩthĩwa? Na amũsũngĩa, Sisya, ũkawona na metho maku, ĩndĩ ndũkaya;

20kweethĩiwe o w’o kwake; nũndũ andũ nĩmamũkinyangĩe mbingĩlonĩ, na akw’a.

← Chapter 6 Jump to: Chapter 8 →