2 Kings 16

Kamba (Mbivilia) 1956

← Chapter 15 Jump to: Chapter 17 →

1Mwaka wa ĩkũmĩ na mũonza wa kũsumbĩka kwa Veka mwana wa Lemalia, Aasu mwana wa Yothamu mũsumbĩ wa Yuta ambĩlĩlya kũsumbĩka.

2Aasu aĩ wa myaka mĩongo ĩlĩ yĩla wambĩlĩlye kũsumbĩka; na asumbĩka myaka ĩkũmi na thanthatũ Yelusaleme: na ndaaĩka ũla Yeova wonaa wĩ ũseo, o tondũ Ndaviti ĩthe wake wekaa.

3Ĩndĩ nĩwaendaa mũendelenĩ wa asumbĩ ma Isilaeli, ĩĩ, na avĩtĩlya mwana wake mwakinĩ, kwĩanana na mothatyo ma mbaĩ, ila Yeova wailũngilye mbee wa ana ma Isilaeli.

4Na athembaa na kũtoeeasya ũvani kũla kũndũ kũtũlu, na iĩmanĩ, na ĩtina wa kĩla mũtĩ mwĩũ.

5Nĩvo ĩndĩ Lesini mũsumbĩ wa Silia na Veka mwana wa Lemalia mũsumbĩ wa Isilaeli mambatie Yelusaleme mokite: na mamũthyũlũlũka Aasu mamũtw’ĩkanĩsya, ĩndĩ matyaatonya kũmũkĩlya vinya.

6Ĩvinda yĩu Lesini mũsumbĩ wa Silia atũngĩa Silia mũsyĩ wa Elathi, na alũngya Ayuti ku Elathi; na Asilia mooka Elathi, na matũa kw’o, kũvika ũmũnthĩ.

7Kwondũ wa ũu Aasu atũma atũmwa kwa Tikilathi‐vileseli mũsumbĩ wa Asuli, akĩmwĩa, Nyie nĩ mũthũkũmi waku na mwana waku: ambata, ũndangĩĩe kuma kw’okonĩ kwa mũsumbĩ wa Silia, na kuma kw’okonĩ kwa mũsumbĩ wa Isilaeli, ala mambũkĩlĩĩle mokite nakwa.

8Na Aasu oosa vetha na thaavu ũla woonekete nyũmbanĩ ya Yeova, na mothwiinĩ maie nyũmbanĩ ya mũsumbĩ, na amũtwaĩa mũsumbĩ wa Asuli wĩthĩwe mũthĩnzĩo.

9Na mũsumbĩ wa Asuli amwĩthukĩĩsya; na mũsumbĩ wa Asuli ambata okite na Ndamasiku, na amĩkwata, na atwaa andũ mayo me atave Kili, na amũaa Lesini.

10Na mũsumbĩ Aasu athi Ndamasiku akomane na Tikilathi‐vileseli mũsumbĩ wa Asuli, na oona kĩthembeo kĩla kyaĩ Ndamasiku; na mũsumbĩ Aasu amũtwaĩa mũthembi Uliya mwakĩlwe wa kĩthembeo, na ngelekan’yo yakyo, kwĩanana na wĩa w’onthe wakyo.

11Na mũthembi Uliya aaka kĩthembeo: kwĩanana na w’onthe ũla mũsumbĩ Aasu wamũtũmĩe kuma Ndamasiku, now’o mũthembi Uliya wakĩseũvisye eteele kũka kwa mũsumbĩ Aasu kuma Ndamasiku.

12Na yĩla mũsumbĩ wokie kuma Ndamasiku, mũsumbĩ oona kĩthembeo: na mũsumbĩ athengeea kĩthembeo, na athemba ĩũlũ wakyo.

13Na avĩvya nthembo yake ya kũvĩvw’a na nthembo yake ya mũtu, na eta nthembo yake ya kũnyuwa, na aminzangĩsya nthakame ya nthembo syake sya mũuo, ĩũlũ wa kĩthembeo.

14Na kĩthembeo kya ũthuku, kĩla kyaĩ mbee wa Yeova, akyumya ngalĩ ya mbee ya nyũmba, kuma katĩ wa kĩthembeo kyake na nyũmba ya Yeova, na akĩkĩa ngalĩ ya ĩũlũ ya kĩthembeo kyake.

15Na mũsumbĩ Aasu amwĩaĩa mũthembi Uliya, akĩmwĩa, Ĩũlũ wa kĩthembeo kĩnene vĩvĩasya nthembo ya kũvĩvw’a ya kĩoko, na nthembo ya mũtu ya wĩoo, na nthembo ya kũvĩvw’a ya mũsumbĩ, na nthembo yake ya mũtu, vamwe na nthembo ya kũvĩvw’a ya andũ onthe ma ĩ nthĩ, na nthembo yoo ya mũtu, na nthembo syoo sya kũnyuwa; na minzangĩasya ĩũlũ wakyo nthakame yonthe ya nthembo ya kũvĩvw’a, na nthakame yonthe ya nthembo ya kũtonywa: ĩndĩ kĩthembeo kya ũthuku kĩkeethĩwa kyakwa kya ũkũlasya nakyo.

16Ũu nĩw’o mũthembi Uliya wekie, kwĩanana na w’onthe ũla mũsumbĩ Aasu weaie.

17Na mũsumbĩ Aasu oombũa mavava ma ala matina na aumya kĩndũ kya kũthambĩa ĩũlũ wamo, na atheesya ũla ũkanga wume ĩũlũ wa nzaũ sya ũthuku ila syaĩ ungu waw’o, na awia nthĩ vandũ vaseũvye na mavia.

18Na kĩkukumwa kwondũ wa mũthenya wa savato kĩla maakĩte nyũmbanĩ, na vandũ va ũtee va ũlikĩla mũsumbĩ, aalyũla kwĩthĩwe ngalĩ ya nthĩnĩ ya nyũmba ya Yeova, nũndũ wa mũsumbĩ wa Asuli.

19Na ĩndĩ meko ala angĩ ma Aasu ala wekaa, ti maandĩke ĩvukunĩ ya maũndũ ma mavinda ma asumbĩ ma Yuta?

20Na Aasu akoma vamwe na aaĩthe make, na athikwa vamwe na aaĩthe make ndũanĩ ya Ndaviti: na Esekia mwana wake asumbĩka vandũ vake.

← Chapter 15 Jump to: Chapter 17 →