2 Kings 9

Kamba (Mbivilia) 1956

← Chapter 8 Jump to: Chapter 10 →

1Na mwathani Elisa eeta ũmwe wa ana ma athani, na amwĩa, Ĩvotoe kĩnyunyu kyaku, nokyosa sũva ũũ wa mauta kw’okonĩ kwaku, ũende Lamothi‐ngileati.

2Na wavika kw’o, mũmanthe Yeu mwana wa Yeosavati mwana wa Nimisi, noilika, ũmũkĩlye kuma katĩ wa ana‐a‐ĩthe make, noienda nake kasũmbanĩ ke nthĩnĩ.

3Nĩvo ĩndĩ wĩosa sũva wa mauta, noimwĩtĩkĩsya mũtwe, na mwĩe, Ũũ nĩw’o Yeova ũnũkwasya, Nĩnakwĩtĩkĩsya mauta wĩthĩwe mũsumbĩ wa Isilaeli. Na ĩndĩ vingũa mũomo, ũkũke, na ndũkekale.

4Kwondũ wa ũu ũ mwanake, o ũsu mwanake mwathani, aenda Lamothi‐ngileati.

5Na yĩla wavikie, sisya, makavuteni ma nguthu mekalĩte nthĩ; na asya, Nĩ na ũtũmane kwaku, we kavuteni. Na Yeu akũlya, Kwa wĩva wa ithyonthe? Na asũngĩa, Kwaku, we kavuteni.

6Na ookĩla, na alika nyũmbanĩ; na amwĩtĩkĩsya mauta mũtwe, na amwĩa, Ũũ nĩw’o Yeova, Ngai wa Isilaeli, ũnũkwasya, Nĩnĩkwĩtĩkĩĩtye mauta wĩthĩwe mũsumbĩ wa andũ ma Yeova, o Isilaeli.

7Na ũkakũne nyũmba ya Aavu vwana waku, nĩ kana nĩĩvanĩsye nthakame ya athũkũmi makwa athani, na nthakame ya athũkũmi onthe ma Yeova, kw’okonĩ kwa Yeseveli.

8Nũndũ nyũmba yonthe ya Aavu ĩkaanangwa; na ngaveta kwa Aavu kĩla mwana mũũme, na ũla wĩĩthĩwa mwove na ũla wĩĩthĩwa ate mwove nthĩnĩ wa Isilaeli.

9Na ngatw’ĩkĩthya nyũmba ya Aavu ta nyũmba ya Yelovoamu mwana wa Nevati, na ta nyũmba ya Mbaasa mwana wa Aiya.

10Na ngitĩ ikamũĩa Yeseveli kĩlungunĩ kya nthĩ kya Yesileeli, na kũtikethĩwa ũmwe wa kũmũthika. Na avingũa mũomo, na akũka.

11Nĩvo ĩndĩ Yeu wamaumaalĩle athũkũmi ma mwĩaĩi wake: na ũmwe amũkũlya, Nĩ kũseo? Mũndũ ũsu wa ndũũka wũkie vala ũĩ nũndũ wa kĩ? Na amea, Nĩmwĩsĩ mũndũ ũsu na ũndũ kũneena kwake kwĩĩilyĩ.

12Na mwĩa, Nĩ ũvũngũ; tũtavye oyu. Na asya, Aneena nakwa ũna na ũna, akĩmbĩa, Ũũ nĩw’o Yeova ũnũkwasya, Nĩnĩkwĩtĩkĩĩtye mauta wĩthĩwe mũsumbĩ wa Isilaeli.

13Nĩvo ĩndĩ meekalaatile, na moosa kĩla mũndũ ngũa yake, na masia ungu wake me mbasyanĩ ĩũlũ, na mavuva soo, makyasya, Yeu nĩ mũsumbĩ.

14Kwondũ wa ũu Yeu mwana wa Yeosavati mwana wa Nĩmisi amũsamĩa Yolamu. (Na ĩndĩ Yolamu nĩwasũvĩĩte Lamothi‐ngileati, we na Isilaeli onthe, nũndũ wa Aasaeli mũsumbĩ wa Silia;

15ĩndĩ mũsumbĩ Yolamu aĩ anasyoka akavoee ku Yesileeli mawũkite ala mamũkitĩte, yĩla wokitaa na Aasaeli mũsumbĩ wa Silia.) Na Yeu asya, Ethĩwa kwenda kwenyu kũilyĩ ũũ, mũtikaeke ĩndĩ ũmwe avonoke kuma ndũanĩ, aende akatavan’ye ũvoo ku Yesileeli.

16Kwondũ wa ũu Yeu akuwa nĩ ĩkasya, na athi Yesileeli; nũndũ Yolamu akomete kw’o. Na Aasia mũsumbĩ wa Yuta aĩ anatheea kũmũsisya Yolamu.

17Na ĩndĩ mũsyaĩĩsya nĩwaũngamĩte mwakonĩ mũtũlu wa mũnyoolo ku Yesileeli, na esa kwona nguthu ya Yeu okanĩtye nayo, na asya, Nĩngwona nguthu. Na Yolamu asya, Osa mũndũ ũtũlaa mbalasi, noimũtũma amĩthaũe, nake nakakũlye, Nĩ mũuo?

18Kwondũ wa ũu ũmwe athi atũlĩte mbalasi amũthaũe, na asya, Ũũ nĩw’o mũsumbĩ ũnũkwasya, Nĩ mũuo? Na Yeu asya, Wĩ ũndũ mwau na mũuo? Syoka ĩtina wakwa. Na ũla mũsyaĩĩsya atavan’ya, akyasya, Mũtũmwa avika vala maĩ, ĩndĩ ndeũsyoka.

19Na ĩndĩ atũma ũngĩ wa kelĩ atũlĩte mbalasi, ũla nake wavikie vala maĩ, na asya, Ũũ nĩwo mũsumbĩ ũnũkwasya, Nĩ mũuo? Na Yeu asũngĩa, Wĩ ũndũ mwaũ na mũuo? Syoka ĩtina wakwa.

20Na mũsyaĩĩsya atavan’ya, akyasya, Avika o vala maĩ, na ndeũsyoka: na mũtwaĩle nĩ ta mũtwaĩle wa Yeu mwana wa Nimisi; nũndũ nũtwĩate ta mũndũ wa ndũũka.

21Na Yolamu asya, Ovai ĩkasya. Na moova ĩkasya yake ya kaũ. Na Yolamu mũsumbĩ wa Isilaeli na Aasia mũsumbĩ wa Yuta maumaala, kĩla ũmwe e ĩkasyanĩ yake, na maumaala mamũthaũe Yeu, na mamwĩthĩa kĩlungunĩ kya nthĩ kya Navothi Mũyesileeli.

22Na kweethĩwa, yĩla Yolamu wonie Yeu, akũlya, Nĩ mũuo, Yeu? Na asũngĩa, Mũuo mwaũ, ĩvinda yĩla ũmalwaya wa inyia waku Yeseveli na mooi make maingĩvĩte ũu?

23Na Yolamu athyũũa moko make, na akĩa, na amwĩa Aasia, Kwĩ ũkengani, we Aasia.

24Na Yeu akoota ũta wake na vinya wake w’onthe, na aathĩla Yolamu katĩ wa ituo syake; na mũsyĩ wakuthũkĩla ngoonĩ yake, na ang’uthũka ĩkasyanĩ yake.

25Nĩvo ĩndĩ Yeu wamũtavisye Mbitikali kavuteni wake, Mũkĩlye, noimwĩkya kĩlungunĩ kya mũũnda wa Navothi Mũyesileeli; nũndũ lilikana yĩla nyie naku twaendanasya vamwe tũkuĩtwe twĩ ĩtina wa Aavu ĩthe wake, ũndũ Yeova waiie mũio ũũ ĩũlũ wake:

26Vate ndĩi nĩnonete ĩoo nthakame ya Navothi, na nthakame ya ana make, easya ũu Yeova; na ngakũĩvĩa kĩlungunĩ kĩĩ kya nthĩ, easya ũu Yeova. Yu kwondũ wa ũu mwose noimwĩkya kĩlungunĩ kĩĩ kya nthĩ, kwĩanana na ndeto ya Yeova.

27Ĩndĩ yĩla Aasia mũsumbĩ wa Yuta wonie ũu, akũka na nzĩa ĩvĩtĩle nyũmba yĩ mũũndanĩ. Na Yeu amũatĩĩa, na asya, Mũkũnei nake e ĩkasyanĩ: na mamũkũnĩa kyambatonĩ kya Nguli, ĩla yĩ vakuvĩ na Ivileamu. Na akĩĩa Mekito, na akw’ĩa kw’o.

28Na athũkũmi make mamũkua e ĩkasyanĩ kũvika Yelusaleme, na mamũthika ngunganĩ yake vala vathikawa akw’ũ vamwe na aaĩthe make ndũanĩ ya Ndaviti.

29Na mwaka wa ĩkũmi na ũmwe wa kũsumbĩka kwa Yolamu mwana wa Aavu, Aasia ambĩlĩlya kũsumbĩka Yuta.

30Na yĩla Yeu wavikie Yesileeli, Yeseveli eew’a ũu; na avaka metho make langi, na eekĩa kĩmanza mũtwe wake, na asyaĩlya mbũthinĩ.

31Na yĩla Yeu walikaa mbingĩlonĩ, asya, Nĩ mũuo, we Nzimili, mũai wa vwana waku?

32Na ang’elelya ũthyũ wake mbũthinĩ, na akũlya, Nũũ ũla wĩ ngalĩ yakwa? Nũũ? Na avakũe elĩ kana atatũ mamũkunĩkĩla.

33Nake asya, Mwĩkyei nthĩ. Na ĩndĩ mamwĩkya nthĩ; na nthakame ĩmwe yake yatalĩkangĩla ũvai, na mbalasi: nake amũangan’ya na maũũ.

34Na yĩla walikile, aya na anyw’a; na asya, Sisyai yu mũndũ mũka ũũ mũumanĩe, na mũimwĩnzĩa nthĩ; nũndũ nĩ mwĩĩtu wa mũsumbĩ.

35Na mathi mamwĩnzĩe nthĩ; ĩndĩ matyaamwĩthĩa ate o kĩng’ala, na nyaĩĩ, na itaa sya moko make.

36Kwondũ wa ũu masyoka, na mamũtavya. Nake asya, Ĩno nĩyo ndeto ya Yeova, ĩla waneenie na kanyw’a wa mũthũkumĩ wake Eliya Mũtisivi, akyasya, Kĩlungunĩ kya nthĩ kya Yesileeli ngiti ikaya nyama sya mwĩĩ wa Yeseveli;

37na kimba kya Yeseveli kĩkeethĩwa ta vũũ ĩũlũ wa mũũnda kĩlungunĩ kya nthĩ kya Yesileeli, nĩ kana matikaaneene, Ũũ nĩwe Yeseveli.

← Chapter 8 Jump to: Chapter 10 →