2 Kings 3

Kamba (Mbivilia) 1956

← Chapter 2 Jump to: Chapter 4 →

1Na ĩndĩ Yeolamu mwana wa Aavu ambĩlĩlya kũsumbĩka Isilaeli ku Samalia mwaka wa ĩkũmi na nyanya wa kũsumbĩka kwa Yeosavati mũsumbĩ wa Yuta, na asumbĩka myaka ĩkũmi na ĩlĩ.

2Na eekaa ũla Yeova wonaa wĩ ũthũku, ĩndĩ ti ta ĩthe wake, na ta inyia wake; nũndũ nĩwavetie kĩtuĩ kya Mbaali kĩla ĩthe wake waseũvĩtye.

3Ĩndĩ o na ũu alũman’ya na naĩ sya Yelovoamu mwana wa Nevati, ila wavĩtĩthĩtye Isilaeli nasyo; ndaaitia.

4Na ĩndĩ Mesa mũsumbĩ wa Moavi aĩ mũĩthya wa malondu; na amũnengae mũsumbĩ wa Isilaeli tũtena twa malondu ngili ĩana, na ndũũme ngili ĩana, o na maw’ĩa.

5Ĩndĩ kweethĩwa, yĩla Aavu wakwie, mũsumbĩ wa Moavi amũng’endea mũsumbĩ wa Isilaeli.

6Na mũsumbĩ Yeolamu auma Samalia ĩvinda yĩu, na oomban’ya Isilaeli onthe.

7Na athi atũmana kwa Yeosavati mũsumbĩ wa Yuta, akĩmwĩa, Mũsumbĩ wa Moavi nũng’endeete: ũkathi vamwe nakwa tũkite na Moavi kaũnĩ? Na asya, Ngambata: nyie nĩilyĩ o taku, na andũ makwa ta andũ maku, na mbalasi syakwa ta mbalasi syaku.

8Na amũkũlya, Twĩambata na nzĩa yĩva? Na amũsũngĩa, Nzĩa ya weũ wa Etomu.

9Na ĩndĩ mũsumbĩ wa Isilaeli athi, na mũsumbĩ wa Yuta, na mũsumbĩ wa Etomu; na mathi melingĩlĩte kyalo kya mĩthenya mũonza: na kũtyaĩ manzĩ ma ĩ nguthu, o na ma nyamũ ila syamaatĩĩe.

10Na mũsumbĩ wa Isilaeli asya, Ĩiaa! Nũndũ Yeova nĩwĩtĩte asumbĩ aa atatũ mombane vamwe amanengane kw’okonĩ kwa Moavi.

11Ĩndĩ Yeosavati akũlya, Vati mwathani wa Yeova vaa, nĩ kana tũmũkũlye Yeova na kanyw’a wake? Na ũmwe wa athũkũmi ma mũsumbĩ wa Isilaeli asũngĩa na asya, Elisa mwana wa Savati e vaa, ũla wetĩkĩasya moko ma Eliya manzĩ.

12Na Yeosavati asya, Ndeto ya Yeova yĩ nake. Kwondũ wa ũu mũsumbĩ wa Isilaeli na Yeosavati na mũsumbĩ wa Etomu matheea vala ũĩ.

13Na Elisa amwĩa mũsumbĩ wa Isilaeli, Nĩ ũndũ naku wa kĩ? Enda kwa athani ma ĩthe waku, na athani ma inyia waku. Na mũsumbĩ wa Isilaeli amwĩa, Aiee; nũndũ Yeova nĩwĩtĩte asumbĩ aa atatũ mombane vamwe amanengane kw’okonĩ kwa Moavi.

14Na Elisa asya, O tondũ Yeova wa nguthu wĩ thayũ, ũla nĩũngamaa mbee wake, nĩ w’o, kethĩwa ti atĩ nĩngwona Yeosavati mũsumbĩ wa Yuta ta mũndũ, ndisisya kwelekela ngalũko ĩla ũĩ we, kana ũkwona.

15Ĩndĩ yu ndetee mũndũ wĩsĩ kũinga mbeve. Na kweethĩwa, yĩla mũingi ũsu waingaa, kw’oko kwa Yeova kwooka ĩũlũ wake.

16Na asya, Ũũ nĩw’o Yeova ũnũkwasya, Ĩnzai mĩtaũ mwandanĩ ũũ wusũe.

17Nũndũ ũũ nĩw’o Yeova ũnũkwasya, Mũtikona kĩseve, o na mũtikona mbua; ĩndĩ mwanda ũũ ũkausũa manzĩ, na mũkanyusaa, inyw’ĩ na indo syenyu na nyamũ syenyu.

18Na ũu no ũndũ ũvũthũ methonĩ ma Yeova: nake akanengane Amoavi nao kw’okonĩ kwaku.

19Na mũkakũne kĩla ndũa mbiie, na kĩla ndũa yĩ vata, na mũkateme kĩla mũtĩ mũseo, na kũlinda nthongo syonthe sya manzĩ, na kũthũkya kĩla kĩlungu kĩseo kya nthĩ na mavia.

20Na kweethĩwa kĩoko, ta ĩvinda ya kũthemba nthembo, sisya, kwooka manzĩ na nzĩa ya Etomu, na nthi yausũa manzĩ.

21Na ĩndĩ yĩla Amoavi onthe meewie atĩ asumbĩ mambatĩte mokite nao, meeyũmbanĩsya, onthe ala maĩ matonya kwĩkĩa mĩio ya kaũ, o na ala akũangũ, na maũngama mũvakanĩ.

22Na mookĩla kĩoko tene, na syũa yaatha ĩũlũ wa manzĩ, na Amoavi moona manzĩ me mbee woo me matune ta nthakame:

23na masya, ĩno nĩ nthakame; asumbĩ nĩmanangĩtwe vate ndĩi, na nĩmoaĩte kĩla mũndũ mũtindan’ya wake: yu kwondũ wa ũu, Moavi, endai mũtavonĩ.

24Na yĩla mavikie mwakonĩ wa maeema wa Isilaeli, Aisilaeli mookĩla na makũna Amoavi, mũvaka makũka mbee woo; na maendeea na malika ĩ nthĩ makũnĩte Amoavi.

25Na mavalũkya i ndũa nthĩ; na kĩla kĩlungunĩ kĩseo kya nthĩ mekya kĩla mũndũ ĩvia yake, na makyusũsya; na malinda nthongo syonthe sya manzĩ, na mavalũkya mĩtĩ yonthe mĩseo, mũvaka Kili‐alesethio yoka matialilye mavĩa mayo; ĩndĩ ala mekasya mavia na ikũtha mamĩthyũlũlũka, na mamĩkũna.

26Na yĩla mũsumbĩ wa Moavi wonie kana kaũ nũvyũvie kwake athi na andũ maana mũonza ala makũaa ũvyũ, mavũthũe nzĩa mavike kwa mũsumbĩ wa Etomu; ĩndĩ matyaatonya.

27Na ĩndĩ oosa ĩkithathi yake yĩla yaaĩle kũsumbĩka vandũ vake, na ayĩthemba ũvainĩ yĩthĩwe nthembo ya kũvĩvw’a. Na kwaĩ ũthatu mũnene ĩũlũ wa Isilaeli: na mamũtia, na masyoka nthĩ yoo ene.

← Chapter 2 Jump to: Chapter 4 →