2 Kings 5

Kamba (Mbivilia) 1956

← Chapter 4 Jump to: Chapter 6 →

1Na ĩndĩ Naamani kavuteni wa nguthu ya mũsumbĩ wa Silia, aĩ mũndũ wĩ nguma kwa vwana wake, na wa kũtaĩwa, nĩkwĩthĩwa Yeova nĩwanengete Silia kũkĩlya vinya ũndũ wake: o na aĩ ngũmbaũ nene, ĩndĩ awaĩte mangũ.

2Na Asilia meethĩiwe maumaalile nguthu, nguthu, na makaete kelĩtu ke katave kuma nthĩ ya Isilaeli; na kathũkũmaa kĩveti kya Naamani.

3Na kamwĩa vivi wako, Nenda kethĩwa mwĩaĩi wakwa e vala ve mwathani ũla wĩ Samalia! Ethĩwa amũvosya ĩndĩ mangũ make.

4Na ũmwe alika, na amũtavya mwĩaĩi wake, akĩmwĩa, Kelĩtu kala ka nthĩ ya Isilaeli kaisye ũna na ũna.

5Na mũsumbĩ wa Silia asya, Enda yu, na ngamũtwaĩa mũsumbĩ wa Isilaeli valũa. Na athi, na akua talendi ĩkũmi sya vetha, na ilungu ngili thanthatũ sya thaavu, na ngũa sya ũkũan’ya makũan’ya ĩkũmi.

6Na amũetee mũsumbĩ wa Isilaeli ũla valũa, akĩmwĩa, Na yu yĩla valũa ũũ wĩkũvikĩa, sisya, nĩnĩtũmĩte Naamani mũthũkũmi wakwa kwaku, nĩ kana ũmũvosye mangũ make.

7Na kweethĩwa, yĩla mũsumbĩ wa Isilaeli wasomie valũa, atembũanga ngũa syake, na asya, Nyie nĩ Ngai, nũae na kũthayũũkya, ũndũ mũndũ ũũ ũnũũtũmana kwakwa nĩvosye mũndũ mangũ make? Ĩndĩ nĩngũmwĩsũva, sũanĩai mwone ũndũ ũnũũnthea.

8Na kweethĩwa, yĩla Elisa mũndũ wa Ngai wewie kana mũsumbĩ wa Isilaeli nũtembũangĩte ngũa syake, atũmana kwa mũsumbĩ, akĩmũkũlya, Nũndũ wa kĩ ũnatembũangie ngũa syaku? Nĩoke yu vala nĩĩ, na akamanya ve mwathani nthĩnĩ wa Isilaeli.

9Kwondũ wa ũu Naamani ooka e na mbalasi syake na makasya make, na aũngama mũomonĩ wa nyũmba ya Elisa.

10Na Elisa atũma mũtũmwa vala ũĩ, akĩmwĩa, Enda ũthambe ũsĩnĩ wa Yolotani mavinda mũonza, na mwĩĩ waku ũkakũsyokea, na ũkeethĩwa mũtheu.

11Ĩndĩ Naamani aĩ mũthatu, na athi, na asya, Sisya, nĩsũanĩaa, nde ndĩi ya kũmbumaalĩla, na kũũngama, na kwĩkaĩla syĩtwa ya Yeova Ngai wake, na kũvĩtĩlya kw’oko kwake ĩũlũ wa vala vandũ, na kũvosya ũla ũwaĩte mangũ.

12Avana na Vaalivali mbũsĩ sya Ndamasiku ti nzeo kwĩ iw’ũ syonthe sya Isilaeli? Nditonya kũthambĩa nthĩnĩ wasyo, na ngeethĩwa mũtheu? Kwondũ wa ũu eethyũũa na athi athatĩte mũno.

13Na athũkũmi make mathengeea, na maneena nake, na masya, Asa wakwa, kethĩwa mwathani akũtavya wĩke ũndũ ũnene, ndwĩthĩwa weeka? Ti kavaa mũno ĩndĩ, akĩkwĩa, Thamba, nokĩthea?

14Nĩvo ĩndĩ watheeie, na eethika mavinda mũonza ũsĩnĩ wa Yolotani, kwĩanana na ndeto ya mũndũ wa Ngai; na mwĩĩ wake wasyoka wekala ĩngĩ ta mwĩĩ wa kana kanini, na aĩ mũtheu.

15Na amũsyokea mũndũ wa Ngai, we na nguthu yake yonthe, na ooka, na aũngama mbee wake; na asya, Sisya yu, nĩnĩsĩ vati Ngai nthĩ yonthe, ate o nthĩnĩ wa Isilaeli: yu kwondũ wa ũu, nĩngũkwĩsũva, osa mũthĩnzĩo wa mũthũkũmi waku.

16Ĩndĩ asya, O tondũ Yeova wĩ thayũ, ũla nĩũngamaa mbee wake, ndikosa o na ũmwe. Na amũthing’ĩĩsya ose; ĩndĩ alea.

17Na Naamani asya, Ethĩwa ti ũu, ĩndĩ, nĩngũkwĩsũva, mũthũkũmi waku nanengwe mũthanga wa mĩio ĩtonya kũkuwa nĩ nyũmbũ ilĩ; nũndũ mũthũkũmi waku kuma yu ndakathembea ngai ingĩ ate o Yeova, nthembo ya kũvĩvw’a kana nthembo ya kũtonywa.

18Yeova naekee mũthũkũmi waku ũndũnĩ ũũ: yĩla vwana wakwa wĩlikaa nyũmbanĩ ya Limoni athaithe vo, na akĩkwatĩla kw’oko kwakwa, na ngĩkunamya nyũmbanĩ ya Limoni, yĩla ngekunamya nyũmbanĩ ya Limoni, Yeova naekee mũthũkũmi waku ũndũnĩ ũsu.

19Na amwĩa, Enda na ũvoo. Kwondũ wa ũu auma vala ũĩ athi vandũ vaasanga.

20Ĩndĩ Ngeasi, mũthũkũmi wa Elisa mũndũ wa Ngai, asya, Sisya, vwana wakwa nĩwamũeka Naamani ũũ Mũsilia, ailea kwosa mokonĩ make kĩla waetie: o tondũ Yeova wĩ thayũ, ngasemba nĩmũvikile, na ngyosa kĩndũ kwake.

21Na ĩndĩ Ngeasi amũvikĩla Naamani. Na yĩla Naamani wonie mũndũ asembete amũvikĩlĩte, auma ĩkasyanĩ amũthaũe, na akũlya, Nĩ kũseo?

22Nake asũngĩa, Nĩ kũseo. Vwana wakwa nĩwandũma, akyasya Sisya, oyu kwooka anake elĩ ma ana ma athani kuma nthĩ yĩ iĩma ya Evalaimu; manenge, nĩngũkwĩsũva, talendi ya vetha, na ngũa sya ũkũan’ya makũan’ya elĩ.

23Na Naamani asya, Endeew’a nĩ kwosa talendi ilĩ. Na amũingĩĩsya, na ova talendi ilĩ sya vetha mĩvukonĩ ĩlĩ, vamwe na ngũa sya ũkũan’ya makũan’ya elĩ, na amaĩkya athũkũmi make elĩ; na mamĩkua me mbee wake.

24Na yĩla wavikie kĩĩmanĩ, amyosa kuma mokonĩ moo, na amia nyũmbanĩ, na aeka andũ asu mathi, na maenda.

25Ĩndĩ alika, na aũngama mbee wa vwana wake. Na Elisa amwĩa, Wauma va, Ngeasi? Na asya, Mũthũkũmi waku ndaathi vandũ.

26Na amũkũlya, Ngoo yakwa ndĩnaendan’ya naku, yĩla mũndũ ũsu wĩtulũlile atia ĩkasya yake akũthaũe? Nĩ ĩvinda ya kwosa mbesa, na kwosa ngũa, na mĩũnda ya mĩthata na mĩũnda ya mĩsavivũ, na malondu na ng’ombe, na athũkũmi aũme na athũkũmi eĩtu?

27Kwondũ wa ũu mangũ ma Naamani makalũman’ya naku, na ũsyao waku tene na tene. Na auma mbee wake eũvĩtw’e nĩ mangũ ta ĩa.

← Chapter 4 Jump to: Chapter 6 →