2 Kings 21

Kamba (Mbivilia) 1956

← Chapter 20 Jump to: Chapter 22 →

1Manase ai wa myaka ĩkũmi na ĩlĩ yĩla wambĩlĩlye kũsumbĩka; na asumbĩka myaka mĩongo ĩtano na ĩtano Yelusaleme; na syĩtwa ya inyia wake eetawa Evisiva.

2Na eekaa ũla Yeova wonaa wĩ ũthũku, akĩatĩĩa mothatyo ma mbaĩ ila Yeova wailũngilye mbee wa ana ma Isilaeli.

3Nũndũ nĩwatũngĩĩie ĩngĩ kũla kũndũ kũtũlu kũla Esekia ĩthe wake wanangĩte; na ookĩlya ithembeo kwondũ wa Mbaali, na aseũvya Asela, o tondũ Aavu mũsumbĩ wa Isilaeli wekaa, na athaithaa nguthu yonthe ya ĩtunĩ, na kũmĩthũkũmaa.

4Na aaka ithembeo nyũmbanĩ ya Yeova, ĩla Yeova waisye ũndũ wayo, Ngekalya syĩtwa yakwa Yelusaleme.

5Na aaka nthĩnĩ wa nza syelĩ sya nyũmba ya Yeova ithembeo kwondũ wa nguthu yonthe ya ĩtunĩ.

6Na avĩtĩlya mwana wake mwakinĩ, na aingasya nyũnyi, na eekaa maũndũ ma mowe, na akũlasya ala mesene na maveva, na oombasya ithitũ: eekaa mũno ũla Yeova wonaa wĩ ũthũku, akĩmũthatya.

7Na aũngamya mũvw’anano mwasũvye wa Asela, ũla waseũvĩtye, nyũmbanĩ ĩla Yeova wamũtavisye Ndaviti na Solomoni mwana wake ũndũ wayo, Nyũmbanĩ ĩno, o na Yelusaleme, ĩla nĩnyuvĩte katĩ wa mbaĩ syonthe sya Isilaeli, ngekalya syĩtwa yakwa tene na tene;

8o na ndikangangya maũũ ma Isilaeli ĩngĩ kuma nthĩ ĩla nanengie aaĩthe moo, ethĩwa no makasũvĩaa kwĩka w’onthe ũla nameaĩe, na kwĩanana na mĩao yonthe ĩla Mose mũthũkũmi wakwa wameaĩe.

9Ĩndĩ matyaaĩthukĩĩsya: na Manase amasesenga meke ũthũku kũvĩtũka mbaĩ ila Yeova waanangie mbee wa ana ma Isilaeli.

10Na Yeova aneena na kanyw’a wa athũkũmi make athani, akyasya,

11Nĩkwĩthĩwa Manase mũsumbĩ wa Yuta nĩwĩkĩte mothatyo aa, na nĩwĩkĩte naĩ kwĩ w’onthe ũla Aamoli meekaa, ala maĩ mbee wake, na nũvĩtĩthĩtye o na Yuta ũndũ wa mĩvw’anano yake;

12kwondũ wa ũu, ũũ nĩw’o Yeova, Ngai wa Isilaeli, ũnũkwasya, Sisya, nĩngũetee Yelusaleme na Yuta ũthũku, ũndũ o ũla ũkew’a ũvoo waw’o matũ make elĩ makasĩĩlĩla.

13Na ngatambũũkya ĩũlũ wa Yelusaleme ũlii wa kũthima wa Samalia, na kavilũ ka nyũmba ya Aavu; na ngakuta Yelusaleme o tondũ mũndũ ũkutaa ĩsaani, aiyĩkuta, na kũyĩkuluman’ya.

14Na ngaveta ũtialo wa ũtiĩwa wakwa, na kũmanengane kw’okonĩ kwa amaitha moo; na makatw’ĩka mbuta na mũtavo kwa amaitha moo onthe;

15nĩkwĩthĩwa nĩmekĩte ũla nonaa wĩ ũthũku, na manthatya, kuma mũthenya ũla aaĩthe moo maumie Misili, kũvika ũmũnthĩ.

16O na ĩngĩ Manase etĩkisye nthakame nyingĩ mũno ite na ĩvĩtyo, kũvika ausũsya Yelusaleme kuma ngalĩ ĩmwe kũvika ĩla ĩngĩ; eka naĩ yake ĩla wavĩtĩthisye Yuta nayo, akĩka ũla Yeova wonaa wĩ ũthũku.

17Na ĩndĩ meko ala angĩ ma Manase, na w’onthe ũla wekaa, na naĩ yake ĩla wavĩtisye, ti maandĩke ĩvukunĩ ya maũndũ ma mavinda ma asumbĩ ma Yuta?

18Na Manase akoma na aaĩthe make, na athikwa mũũndanĩ wa nyũmba yake mwene, mũũndanĩ wa Usa: na Amoni mwana wake asumbĩka vandũ vake.

19Amoni aĩ wa myaka mĩongo ĩlĩ na ĩlĩ yĩla wambĩlĩlye kũsumbĩka; na asumbĩka myaka ĩlĩ Yelusaleme: na syĩtwa ya inyia wake eetawa Mesulemethi mwĩĩtu wa Aalusi wa ku Yotiva.

20Na eekaa ũla Yeova wonaa wĩ ũthũku, o tondũ Manase ĩthe wake wekaa.

21Na aendaa mũendelenĩ w’onthe ũla ĩthe wake waendaa naw’o, na athũkũmaa mĩvw’anano ĩla ĩthe wake wathũkũmaa, na kũmĩthaithaa:

22na aeka Yeova, Ngai wa aaĩthe make, na ndaendaa nzĩanĩ ya Yeova.

23Na athũkũmi ma Amoni mamũsamĩa, na mooaĩa ũ mũsumbĩ nyũmbanĩ yake mwene.

24Ĩndĩ andũ ma nthĩ ĩsu mamoaa onthe ala mamũsamĩĩte mũsumbĩ Amoni; na andũ ma nthĩ ĩsu mamũtw’ĩkĩthya Yosia mwana wake mũsumbĩ vandũ vake.

25Na ĩndĩ meko ala angĩ ma Amoni ala wekaa, ti maandĩke ĩvukunĩ ya maũndũ ma mavinda ma asumbĩ ma Yuta?

26Na athikwa ngunganĩ yake vala vathikawa akw’ũ mũũndanĩ wa Usa: na Yosia mwana wake asumbĩka vandũ vake.

← Chapter 20 Jump to: Chapter 22 →