2 Kings 19

Kamba (Mbivilia) 1956

← Chapter 18 Jump to: Chapter 20 →

1Na kweethĩwa yĩla mũsumbĩ Esekia wewie ũu, atembũanga ngũa syake, na eekĩa makunia, na alika nyũmbanĩ ya Yeova.

2Na atũma Eliakimu, ũla waĩ mũsyaĩĩsya wa andũ ma nyũmba, na mũandĩki Sevina, na atumĩa ma athembi, meekĩte makunia, kwa mwathani Isaia mwana wa Amosu.

3Nao mamwĩa, Ũũ nĩw’o Esekia ũnũkwasya, Ũmũnthĩ nĩ mũthenya wa thĩna, na wa ũkanw’a, na wa kũvũthw’a; nũndũ twana nĩtũvikĩte kũsyawa, na vati vinya wa kũsyaa.

4Nokwĩthĩwa Yeova Ngai waku, akeew’a ndeto syonthe sya Lavi‐sake ũla mũsumbĩ wa Asuli vwana wake ũmũtũmĩte amũvũthĩĩsye Ngai wĩ thayũ, na akakan’ya ndeto ila Yeova Ngai waku wĩw’ĩte: kwondũ wa ũu ũkĩlya mboya yaku kwondũ wa ũtialo ũla ũtialĩte.

5Kwondũ wa ũu athũkũmi ma mũsumbĩ Esekia mathi kwa Isaia.

6Na Isaia amea, Ũũ nĩw’o mwĩmũtavya vwana wenyu, Ũũ nĩw’o Yeova ũnũkwasya, Ndũkakĩe ndeto ila wĩw’ĩte, ila athũkũmi ma mũsumbĩ wa Asuli manumangĩte nasyo.

7Sisya, ngeekĩa veva nthĩnĩ wake, na akeew’a maũvoo, na akasyoka nthĩ yake mwene; na ngatũma avalũkw’a na ũvyũ e nthĩ yake mwene.

8Kwondũ wa ũu Lavi‐sake asyoka, an amwĩthĩa mũsumbĩ wa Asuli akyũkita na ndũa ya Livina; nũndũ aĩ aneew’a kana nĩwumĩte vu Lakisi.

9Na yĩla wewie kũineenwa ũndũ wa Tiliaka mũsumbĩ wa Ethiovia, Sisya, nĩwumaalĩte okite naku, atũma atũmwa ĩngĩ kwa Esekia, akyasya,

10Ũũ nĩw’o mwĩmũtavya Esekia mũsumbĩ wa Yuta, ũkĩmwĩa, Ngai waku ũla ũmwĩkwatasya ndakakũkenge, aikwĩa, Yelusaleme ndĩkanenganwe kw’okonĩ kwa mũsumbĩ wa Asuli.

11Sisya, nĩwĩw’ĩte ũndũ asumbĩ ma Asuli mekĩte nthĩ syonthe, ũndũ wa kũsyananga vyũ: naku ũkavonokw’a?

12Ngai sya mbaĩ nĩsyaivonokisye, ila aasa makwa masyanangie, Ngosani, na Aalani, na Lesevu, na ana ma Eteni ala maĩ Telasali?

13Aĩva mũsumbĩ wa Amathi, na mũsumbĩ wa Alivati, na mũsumbĩ wa ndũa ya Sevalivaimu, na ya Ena, na ya Iva?

14Na Esekia oosa valũa kuma mokonĩ ma ala matũmiwe, na oosoma; na Esekia ambata nyũmbanĩ ya Yeova, na ootambũũkĩsya mbee wa Yeova.

15Na Esekia avoya mbee wa Yeova, na asya, Ame Yeova, Ngai wa Isilaeli, ũla wĩkalaa ĩũlũ wa akeluvi, nue Ngai, o we wĩ weka, wa mosumbĩ onthe me nthĩ; nue woombie ĩtu na nthĩ.

16Tea kũtũ kwaku, ame Yeova, wĩw’e; salukya metho maku, ame Yeova, wone; na ĩw’a ndeto sya Senakelivu, ila ũmũtũmĩte nasyo avũthĩĩsye Ngai wĩ thayũ,

17Nĩ w’o, Yeova, asumbĩ ma Asuli nĩmanangĩte i mbaĩ na nthĩ syasyo,

18na nĩmekĩtye ngai syoo mwakinĩ; nũndũ ityaĩ ngai, ĩndĩ nĩ wĩa wa moko ma andũ, o mĩtĩ na mavia; kwondũ wa ũu nĩmasyanangĩte.

19Yu kwondũ wa ũu, ame Yeova Ngai waitũ, nĩngũkwĩsũva, tũtangĩĩe kuma kwokonĩ kwake, nĩ kana mosumbĩ onthe ma nthĩ mamanye atĩ we Yeova nue Ngai wĩ weka.

20Nĩvo ĩndĩ Isaia mwana wa Amosu watũmanie kwa Esekia, akyasya, Ũu nĩw’o Yeova, Ngai wa Isilaeli, ũnũkwasya, Nĩkwĩthĩwa nũmboyete ũndũ wa Senakelivu mũsumbĩ wa Asuli, nĩnĩkwĩw’ĩte.

21Ĩno nĩyo ndeto ĩla Yeova ũneenete ũndũ wake: Mwĩĩtu mũtheu wa Saioni nũkũvũthĩtye na nũkũthekeeete mũno; mwĩĩtu wa Yelusaleme nũkũthingithangĩsye mũtwe wake.

22Nũũ ũla ũvũthĩĩsye na kũmũumanga? Na nũũ ũla ũmũkĩlĩlye wasya waku na kũmũkĩlĩlya metho maku ĩũlũ? No Ũla Mũtheu wa Isilaeli.

23Nũvũthĩĩsye Mwĩaĩi na makanyw’a ma atũmwa maku, na nũneenete, Nĩnambatĩte nĩ na wingĩ wa makasya makwa iĩmanĩ ĩũlũ, kũvika Levanoni nthĩnĩ; na ngatũla mĩkũũ ĩla mĩasa ya vo, na mĩsonovali mĩseo ya vo; na ngalika vandũ vake va ũkoma vala va nthĩnĩ mbee, o mũtitũ wa mũũnda wake ũla ũsyaaa mũno.

24Nĩnĩnzĩte na kũnyw’a manzĩ maeni, na ngang’alĩthya mbũsĩ syonthe sya Misili na nyaĩĩ syakwa.

25Ndwaaĩw’a ũndũ neekie ũndũ ũsu tene mũno, na naseũvya ũu kuma tene tene? Na yu nĩnĩtw’ĩkĩthĩtye, atĩ nĩ ũndũ waku kwananga ndũa mbiie syĩthĩwe ivumbu sya moomboe.

26Kwondũ wa ũu ala maitwĩe maĩ na vinya o mũnini, mateva na mathokoana; mailyĩ nyeki sya kĩsesi, na nyũnyi nziũ, ta nyeki nyũmbanĩ ĩũlũ, na ta lĩu wa mbaa ngetha ũla wũmanĩlĩtw’e ũtanamba kwĩana.

27Ĩndĩ nĩnĩsĩ kwĩkala nthĩ kwaku, na kumaala kwaku, na kũsyoka kwaku, na kũnthilĩkĩla kwaku.

28Nũndũ wa kũnthilĩkĩla, na nĩkwĩthĩwa wĩnenevyo waku nũvikĩte matũnĩ makwa, kwondũ wa ũu ngeekĩa kavaloi kakwa manyiũũnĩ maku, na mũkwa wakwa ilomonĩ syaku, na ngakũthyũũa ũsyokele nzĩa ĩla ũnesĩle.

29Na ũũ ũkeethĩwa wonan’yo kwaku: mwaka ũũ mũkaya metĩkĩa, na mwaka wa kelĩ mathongooo mamo; na mwaka wa katatũ vandai, na mũiketha, na vandai mĩũnda ya mĩsavivũ, mũye ũsyao wayo.

30Na ũtialo ũla mũvonoku wa nyũmba ya Yuta ũkatambũũkya mĩi ĩngĩ ĩlikĩte nthĩ, na kũsyaa ũsyao welekele ĩũlũ.

31Nũndũ ũtialo ũkauma Yelusaleme, na ala makavonoka makauma kĩĩmanĩ kya Saioni: kĩwĩu kya Yeova kĩkeanĩsya ũndũ ũsu.

32Kwondũ wa ũu Yeova easya ũndũ wa mũsumbĩ wa Asuli atĩĩ, Ndakalika ndũanĩ ĩno, o na ndakamĩkya mũsyĩ, o na ndakoka mbee wayo na ngao, o na ndakamyũmbĩĩa kĩvumbu.

33Na nzĩa ĩla ũnookie nayo, akasyokela o yo, na ndakalika ĩ ndũanĩ, easya ũu Yeova.

34Nũndũ ngamĩsesea ndũa ĩno nĩmĩtangĩĩe, kwondũ wakwa mwene, na kwondũ wa mũthũkũmi wakwa Ndaviti.

35Na kweethĩwa ũtukũ ũsu, mũlaĩka wa Yeova aumaala, na akũna andũ ngili ĩana na mĩongo nyanya na itano mwakonĩ wa maeema wa Aasuli: na yĩla andũ maamũkie kĩoko tene, sisya, asu onthe maĩ simba.

36Kwondũ wa ũu Senakelivu mũsumbĩ wa Asuli ookĩla, na aenda na asyoka kwake, na atũa Nĩneva.

37Na kweethĩwa, aithaithĩa nyũmbanĩ ya Nisiloki ngai yake, Atalameleki na Saleseli ana make mamũkũna na ũvyũ: na maindũka mathi nthĩ ya Alalati. Na Esaliatoni mwana wake asumbĩka vandũ vake.

← Chapter 18 Jump to: Chapter 20 →