2 Kings 17

Kamba (Mbivilia) 1956

← Chapter 16 Jump to: Chapter 18 →

1Mwaka wa ĩkũmi na ĩlĩ wa kũsumbĩka kwa Aasu mũsumbĩ wa Yuta, Osea mwana wa Ela ambĩlĩlya kũsumbĩka Isilaeli ku Samalia, na asumbĩka myaka kenda.

2Na eekaa ũla Yeova wonaa wĩ ũthũku, ĩndĩ ti ta asumbĩ ma Isilaeli ala maĩ mbee wake.

3Salimaneseli mũsumbĩ wa Asuli ambata okite nake; na Osea atw’ĩka mũthũkũmi wake, na amumĩasya mũvothi.

4Na mũsumbĩ wa Asuli amanya kana Osea nũmũsamĩaa; nũndũ nĩwatũmĩte atũmwa kwa So mũsumbĩ wa Misili, na ndaamũtwaĩa mũsumbĩ wa Asuli mũvothi, o tondũ wekaa kĩla mwaka: kwondũ wa ũu mũsumbĩ wa Asuli amũvingĩa, na amwova kolokolonĩ.

5Nĩvo ĩndĩ mũsumbĩ wa Asuli wambatie aianganga nthĩ yonthe, na avika Samalia, na amĩthyũlũlũka amĩtw’ĩkanĩsya myaka ĩtatũ.

6Mwaka wa kenda wa kũsumbĩka kwa Osea, mũsumbĩ wa Asuli akwata Samalia, na atwaa Isilaeli ku Asuli, na amaia ku Aalaa, na ũtee wa Avoli, ũsĩ wa Ngosani, na ndũanĩ sya Ametia.

7Na kweethĩiwe ũu, nũndũ ana ma Isilaeli nĩmamũvĩtanĩsye Yeova Ngai woo, ũla wamaumisye nthĩ ya Misili kuma ĩtheo wa kw’oko kwa Valao mũsumbĩ wa Misili, na nĩmakĩaa ngai ingĩ,

8na maendaa myamũlonĩ ya mbaĩ, ila Yeova wailũngilye mbee wa ana ma Isilaeli, na ya asumbĩ ma Isilaeli ĩla matw’ĩte.

9Na ana ma Isilaeli nĩmamwĩkaa Yeova Ngai woo na kĩmbithĩ maũndũ ala mataĩ maseo: na meeyakĩa kũndũ kũtũlu ndũanĩ syoo syonthe, kuma mwakonĩ mũtũlu wa mũnyoolo wa asyaĩĩsya kũvika ĩla ndũa mbiie;

10na meeũngamĩĩsya ituĩ na Aselimu kĩla kĩĩmanĩ kĩtũlu, na ĩtina wa kĩla mũtĩ mwĩũ;

11na kũu matoeeasya ũvani kũndũ kw’onthe kũtũlu, o tondũ mbaĩ ila Yeova wavetie mbee woo syeekaa; na meeka maũndũ mathũku makĩthatya Yeova;

12na mathũkũmaa mĩvw’anano, ĩla Yeova wamatavisye ũndũ wayo, Mũtikaaĩke ũndũ ũũ.

13Ĩndĩ Yeova akũsĩĩaa Isilaeli, na Yuta, na kanyw’a wa kĩla mwathani, na wa kĩla mwoni, akĩmea, Ĩthyũũei mũtie mĩendele yenyu mĩthũku, na mũikwata mĩao yakwa na myamũlo yakwa, kwĩanana na mĩao yonthe ĩla neeaĩe aaĩthe menyu, na ĩla natũmie kwenyu na makanyw’a ma athũkũmi makwa athani.

14Ĩndĩ o na ũu w’onthe, matyaaĩtĩkĩla kwĩw’a, ĩndĩ moomya ngingo syoo, o ta ngingo sya aaĩthe moo, ala mataaĩtĩkĩla Yeova Ngai woo.

15Na malea myamũlo yake, na ũtianĩo wake ũla watianĩe na aaĩthe moo, na mokũsĩ make ala wamakũsĩĩe; na maatĩĩaa maũndũ ma mana, na matw’ĩka andũ mate kĩĩĩ, na maatĩĩaa mbaĩ ila syamathyũlũlũkĩte, ila Yeova wameaĩe ũndũ wasyo atĩ matikeke tasyo.

16Na matia mĩao yonthe ya Yeova Ngai woo, na meeseũvĩsya mĩvw’anano ya syĩndũ ila matwekethetye, o tũsaũ twĩlĩ, na maseũvya Asela, na mathaithaa nguthu yonthe ya ĩtunĩ, na mathũkũmaa Mbaali.

17Na mavĩtĩlasya ana moo na eĩtu moo mwakinĩ, na kũaũasya, na kwĩkaa maũndũ ma mowe, na meethoosya kwĩkaa ũla Yeova wonaa wĩ ũthũku, makĩmũthatya.

18Kwondũ wa ũu Yeova amathatĩa Isilaeli mũno, na amaumya amatwae vala ũtatonya kũmona: vati ĩmwe yaatiala ate o mbaĩ ya Yuta yoka.

19O na Yuta matyaakwata mĩao ya Yeova Ngai woo, ĩndĩ maendaa myamũlonĩ ya Isilaeli ĩla matw’ĩte.

20Na Yeova alea ũsyao w’onthe wa Isilaeli, na amathĩn’ya, na amanengane kw’okonĩ kwa anangi, kũvika amekya vala ũtatonya kũmona.

21Nũndũ nĩwavenie nyũmba ya Ndaviti Isilaeli; na mamũtw’ĩkĩthya Yelovoamu mwana wa Nevati mũsumbĩ: na Yelovoamu aingĩĩsya Isilaeli matikaatĩĩe Yeova, na amavĩtĩthya naĩ nene.

22Na ana ma Isilaeli maendaa naĩnĩ syonthe sya Yelovoamu ila wekaa; matyaaitia;

23kũvika Yeova amatwaa Isilaeli vala ũtatonya kũmona, o tondũ waneenie na kanyw’a wa athũkũmi make onthe athani. Kwondũ wa ũu Isilaeli maumw’a nthĩ yoo ene matwawa Asuli kũvika ũmũnthĩ.

24Na mũsumbĩ wa Asuli aete andũ kuma Mbaviloni, na kuma Kutha, na kuma Ava, na kuma Amathi na Sevalivaimu, na amaia ndũanĩ sya Samalia vandũ va ana ma Isilaeli; na makwata Samalia yĩthĩwe yoo, na matũa ndũanĩ syayo.

25Na kweethĩwa, makyambĩlĩlya kũtũa kw’o, matyaakĩa Yeova: kwondũ wa ũu Yeova atũma mĩnyambũ katĩ woo, ila yooaie amwe moo.

26Kwondũ wa ũu maneena na mũsumbĩ wa Asuli, makĩmwĩa, Mbai ila watwaie, na wasia ndũanĩ sya Samalia, ityĩsĩ mĩao ya ngai ya ĩ nthĩ: kwondũ wa ũu nĩtũmĩte mĩnyambũ katĩ wasyo, na, sisya, nĩnĩũmoaa, nũndũ matyĩsĩ mĩao ya ngai ya ĩ nthĩ.

27Nĩvo ĩndĩ mũsumbĩ wa Asuli weaie, akyasya, Tũngai kw’o ũmwe wa athembi ala mwaumisye kw’o; na nĩmaende na kũtũa kw’o, nake amamanyĩsye mĩao ya ngai ya nthĩ ĩsu.

28Kwondũ wa ũu ũmwe wa athembi ala matavĩte kuma Samalia ooka na atũa Mbethi‐eli, na amamanyĩsya ũndũ maĩle kũkĩa Yeova.

29Ĩndĩ kĩla mbaĩ yaseũvya ngai syayo ene, na yasyĩkĩa nyũmbanĩ sya kũndũ kũtũlu kũla Asamalia maseũvĩtye, kĩla mbaĩ ndũanĩ syayo vala yatwĩe.

30Na andũ ma Mbaviloni maseũvya Sukothi‐mbenothi, na andũ ma Kutha maseũvya Nelikali, na andũ ma Amathi maseũvya Asima,

31na Aavi maseũvya Niviasi na Talitaki; na Asevalivai mavĩvya syana syoo na mwaki kwondũ wa Atalameleki na Anameleki, ngai sya Sevalivaimu.

32O ta ũu makĩa Yeova, na meenyuvĩa kuma katĩ woo ene athembi ma kũla kũndũ kũtũlu, ala mathembaa kwondũ woo nyũmbanĩ sya kũla kũndũ kũtũlu.

33Nĩmakĩaa Yeova, na mathũkũmaa ngai syoo ene, kwĩanana na maũndũ ma mbaĩ ila maumiw’e katĩ wasyo yĩla mataviwe.

34Kũvika ũmũnthĩ maatĩĩa ũndũ ũsu wa tene: matikĩaa Yeova, o na matyĩkaa kwĩanana na myamũlo yoo, kana motw’ĩo moo, kana kũatĩĩa mĩao kana kũatĩĩa mwĩao ũla Yeova weaĩe ana ma Yakovo, ũla wamũtw’ĩĩe syĩtwa ya Isilaeli;

35ũla Yeova watianĩe ũtianĩo nao, na ameaĩa, akĩmea, Mũtikakĩe ngai ingĩ, o na mũtikasyĩkunamĩsye, o na kwithũkũma, o na kwithembea:

36ĩndĩ Yeova, ũla wamumisye nthĩ ya Misili na vinya mũnene na kw’oko kũtambũũku, nĩwe mũkakĩaa, na mũkamwĩkunamĩasya, na nĩwe mũkamũthembeaa:

37na myamũlo na motw’ĩo, na mĩao na mwĩao, ala waandĩkie kwondũ wenyu, mwĩsũvĩa kwĩkaa tene na tene; na mũtikakĩe ngai ingĩ:

38na ũtianĩo ũla natianĩe nenyu mũtikolwe nĩw’o; o na mũtikakĩe ngai ingĩ:

39ĩndĩ mũkamũkĩae Yeova Ngai wenyu; nake akamumasya mokonĩ ma amaitha menyu onthe.

40Ĩndĩ matyaaĩthukĩĩsya, ĩndĩ meekaa o tondũ meekaa tene.

41O ta ũu mbaĩ isu nĩsyamũkĩaa Yeova, na nĩsyathũkũmaa mĩvw’anano yoo myasũvye; syana syasyo o ta ũu, na nzũkũlũ syasyo, o tondũ aaĩthe masyo meekaa, now’o syĩkaa kũvika ũmũnthĩ.

← Chapter 16 Jump to: Chapter 18 →