2 Kings 22

Kamba (Mbivilia) 1956

← Chapter 21 Jump to: Chapter 23 →

1Yosia aĩ wa myaka nyanya yĩla wambĩlĩlye kũsumbĩka; na asumbĩka myaka mĩongo ĩtatũ na ũmwe ku Yelusaleme: na syĩtwa ya inyia wake eetawa Yetita mwĩĩtu wa Ataia wa ku Mbosikathi.

2Na eekaa ũla Yeova wonaa wĩ ũseo, na aendaa mũendelenĩ w’onthe wa ĩthe wake Ndaviti, na ndaaathũka ngalĩ ya kw’oko kwa aũme kana kw’oko kwa aka.

3Na kweethĩwa mwaka wa ĩkũmi na nyanya wa kũsumbĩka kwa mũsumbĩ Yosia, mũsumbĩ atũma Savani, mwana wa Asaliia mwana wa Mesulamu, mũandĩki, nyũmbanĩ ya Yeova, akĩmwĩa,

4Ambata kwa Ilikia mũthembi mũnene, nĩ kana atale mbesa ila ietawe nyũmbanĩ ya Yeova, ila asũvĩi ma mwalyonĩ mombanĩtye kuma andũnĩ:

5na mainengane kw’okonĩ kwa athũkũmi ala masiasya nyũmba ya Yeova; nao nĩmanenge athũkũmi ala me nyũmbanĩ ya Yeova, sya kũtũngĩĩa kũndũ kũvũthũku kwa nyũmba,

6nao nĩ aseũvya ma mbwaũ, na aki, na aki ma mavia, na sya kũthooa mĩtĩ na mavia masũvye ma kũtũngĩĩa ĩ nyũmba.

7Ĩndĩ matyaatalana nao ũndũ wa mbesa ila inenganiwe kw’okonĩ kwoo; nũndũ nĩmatethisye na kĩthito.

8Na Ilikia mũthembi mũnene amwĩa mũandĩki Savani, Nĩnoona yĩla ĩvuku ya mĩao nyũmbanĩ ya Yeova. Na Ilikia amũnenga Savani yĩla ĩvuku, nake ayĩsoma.

9Na mũandĩki Savani amũkĩa mũsumbĩ, na amũetee mũsumbĩ uvoo, na asya, Athũkũmi maku nĩmatulũlĩte mbesa ila syoonekie nyũmbanĩ, na mainenganĩte kw’okonĩ kwa athũkũmi ala masyaĩĩasya nyũmba ya Yeova.

10Na mũandĩki Savani amũtavya mũsumbĩ, akyasya, Mũthembi Ilikia nũnengete ĩvuku. Na Savani ayĩsomea mbee wa mũsumbĩ.

11Na kweethĩwa, yĩla mũsumbĩ waminie kwĩw’a ndeto sya ĩvuku ya mĩao, atembũanga ngũa syake.

12Na mũsumbĩ eeaia mũthembi Ilikia, na Aikamu mwana wa Savani, na Akivoli mwana wa Mikaia, na mũandĩki Savani, na Asaia mũthũkũmi wa mũsumbĩ, akĩmea,

13Endai, mũkakũlye Yeova kwondũ wakwa, na kwondũ wa andũ, na kwondũ wa Yuta onthe, ũndũ wa ndeto sya ĩvuku yĩĩ yĩla yonekete; nũndũ ũthilĩku wa Yeova nĩ mũnene ũla ũtwakanĩe, nĩkwĩthĩwa aaĩthe maitũ matyaaĩthukĩĩsya ndeto sya ĩvuku yĩĩ, makeka kwĩanana na w’onthe ũla ũandĩkĩtwe ũndũ witũ.

14Kwondũ wa ũu mũthembi Ilikia, na Aikamu, na Akivoli, na Savani, na Asaia, maenda kwa mwathani Ulita, kĩveti kya Salumu mwana wa Tikiva, mwana wa Aliasi, mũsũvĩi wa ngũa (nake atwĩe Yelusaleme ũtũinĩ wa kelĩ); na maneena nake.

15Na amea, Ũũ nĩw’o Yeova, Ngai wa Isilaeli, ũnũkwasya: Mũtavyei mũndũ ũla ũmũtũmie kwakwa,

16Ũũ nĩw’o Yeova ũnũkwasya, Sisya, ngaetee vandũ vaa ũthũku, na andũ ala matwĩe vaa, o ndeto syonthe sya ĩvuku yĩla mũsumbĩ wa Yuta ũsomete.

17Nĩkwĩthĩwa nĩmandiĩte, na nĩmatoeesye ngai ingĩ ũvani, nĩ kana manthatye na wĩa w’onthe wa moko moo, kwondũ wa ũu ũthilĩku wakwa ũkakanĩa vandũ vaa, na ndũkavoeka.

18Ĩndĩ mũsumbĩ wa Yuta, ũla ũmũtũmie mũkũlye kwa Yeova, ũũ nĩw’o mwĩmwĩa, Ũũ nĩw’o Yeova, Ngai wa Isilaeli, ũnũkwasya: Ũndũ wa ndeto ila wĩw’ĩte,

19nĩkwĩthĩwa ngoo yaku ĩnaĩ mbololo, na weenyivya vala ve Yeova, yĩla ũneewie ũla naneenie ĩũlũ wa vandũ vaa, na ĩũlũ wa andũ ala matwĩe vaa, atĩ makatw’ĩka wanangĩko na kĩumo, na nũtembũangĩte ngũa syaku, na kũĩa mbee wakwa; o nakwa nĩnĩkwĩw’ĩte, easya ũu Yeova.

20Kwondũ wa ũu, sisya ngakũmban’ya wĩthĩwe vamwe na aaĩthe maku, na ũkoomban’wa mbũanĩ yaku na mũuo, o na metho maku matikona ũthũku w’onthe ũla ngaete ĩũlũ wa vandũ vaa. Na mamũtũngĩa mũsumbĩ ũvoo.

← Chapter 21 Jump to: Chapter 23 →