2 Kings 23

Kamba (Mbivilia) 1956

← Chapter 22 Jump to: Chapter 24 →

1Na mũsumbĩ atũmana, na mamũmbanĩsya atumĩa onthe ma Yuta na Yelusaleme.

2Na mũsumbĩ ambata nyũmbanĩ ya Yeova, na vamwe nake andũ onthe ma Yuta na onthe ala matwĩe Yelusaleme, na athembi, na athani, na andũ onthe, anini o na anene: na asoma matũnĩ moo ndeto syonthe sya ĩvuku ya ũtianĩo yĩla yĩnoonekie nyũmbanĩ ya Yeova.

3Na mũsumbĩ aũngama vakuvĩ na kĩtuĩ, na atianĩa ũtianĩo mbee wa Yeova, kana akamũatĩĩaa Yeova, na kũkwataa mĩao yake, na mokũsĩ make, na myamũlo yake, na ngoo yake yonthe, na thayũ wake w’onthe, na kũlũlũmĩlya ndeto sya ũtianĩo ũũ ila iandĩkĩtwe ĩvukunĩ yĩĩ: na andũ onthe maũngamĩa ũtianĩo.

4Na mũsumbĩ amwĩaĩa Ilikia mũthembi mũnene, na athembi ma nguthu ya kelĩ, na asũvĩi ma mwalyonĩ, maumaalye kuma ĩkalũnĩ ya Yeova mĩio yonthe ĩla yaseũvĩw’e Mbaali, na Asela, na nguthu yonthe ya ĩtunĩ; na amĩvĩvĩsya ũtee wa Yelusaleme isesinĩ sya Kitiloni, na akua mũu wayo kũvika Mbethi‐eli.

5Na amaveta athembi ma mĩvw’anano, ala maiĩtwe nĩ asumbĩ ma Yuta matoeeasye ũvani kũla kũndũ kũtũlu ndũanĩ sya Yuta, na kũndũ kũla kũthyũlũlũkĩte Yelusaleme ngalĩ syonthe; o na ala matoeeasya Mbaali ũvani, o na syũa, na mwei, na nguthu sya ndata, na nguthu yonthe ya ĩtunĩ.

6Na aumya Asela nyũmbanĩ ya Yeova, ootwaa ũtee wa Yelusaleme, kũvika kalũsĩnĩ ka Kitiloni, na oovĩvĩsya kalũsĩnĩ ka Kitiloni, na ootumbatumba watw’ĩka kĩtoo, na ekya kĩtoo kyaw’o mbũanĩ sya ana ma andũ.

7Na aomboa nyũmba sya aũme ala meekaa naĩ na aũme ala angĩ, ala maĩ nyũmbanĩ ya Yeova, vala aka matumĩaa ngũa sya kũsũnzũlya nyũmbanĩ sya Asela.

8Na aumya athembi onthe ndũanĩ sya Yuta, na avukĩthya kũndu kũtũlu kũla athembi matoeeasya ũvani, kuma Ngeva kũvika Mbeeli‐sieva; na aomboa kũla kũndũ kũtũlu kwa mbingĩlo ila syaĩ ũlikĩlonĩ mbingĩlonĩ wa Yosua ngavana wa ndũa, kũla kwaĩ ngalĩ ya kw’oko kwa aka mbingĩlonĩ ya ndũa.

9Ĩndĩ athembi ma kũla kũndũ kũtũlu matyambataa kĩthembeonĩ kya Yeova kĩla kĩ Yelusaleme, ĩndĩ maĩsĩaa kĩmũtũ kĩte ĩlawa katĩ wa ana‐a‐asa moo.

10Na avukĩthya Tovethi, vandũ kyandanĩ kya ana ma Inomu, nĩ kana mũndũ o na wĩva ndakavĩtĩlye mwana wake kana mwĩĩtu wake mwakinĩ kwondũ wa Moleki.

11Na aveta mbalasi ila asumbĩ ma Yuta manengete syũa, ũlikĩlonĩ wa nyũmba ya Yeova, vakuvĩ na kasũmba ka mũsũvĩi Nathani‐meleki, kala kaĩ ũtee; na avĩvya makasya ma syũa na mwaki.

12Na ithembeo ila syaĩ kĩalanĩ kya kasũmba ke ĩũlũ ka Aasu, ila asumbĩ ma Yuta maseũvĩtye, na ithembeo ila Manase waseũvĩtye nthĩnĩ wa nza syelĩ sya nyũmba ya Yeova, mũsumbĩ aiomboanga, na kwitumbatumba syume vo, na ekya kĩtoo kyasyo kalũsĩnĩ ka Kitiloni.

13Na kũndũ kũtũlu kũla kwaĩ mbee wa Yelusaleme, kũla kwaĩ ngalĩ ya kw’oko kwa aũme kwa kĩĩma kya wanangĩko, kũla Solomoni mũsumbĩ wa Isilaeli wakie kwondũ wa Asetolethi ngai ya Asitoni ya ũthatyo, na kwondũ wa Kemosi ngai ya Moavi ya ũthatyo, na kwondũ wa Milikomu ngai ya ana ma Amimoni ya ũthatyo, nĩkw’o mũsumbĩ wathũkisye.

14Na atũlanga ituĩ ilungu, na atema Aselimu yavalũka, na ausũsya kũndũ kwasyo mavĩndĩ ma andũ.

15O na ĩngĩ kĩthembeo kĩla kyaĩ Mbethi‐eli, na vandũ vatũlu Yelovoamu mwana wa Nevati waseũvisye, ũla wavĩtĩthisye Isilaeli, o kĩthembeo kyu na vala vandũ vatũlu aiomboanga; na avĩvya vala vandũ vatũlu na avatumbatumba vatw’ĩka kĩtoo, na avĩvya Asela.

16Na yĩla Yosia wethyũũie, esa kwona ngunga vala vathikawa akw’ũ ila syaĩ vu kĩĩmanĩ; na atũmana na aumya mavĩndĩ ngunganĩ isu, na amavĩvĩsya kĩthembeonĩ, na akĩvukĩthya kwĩanana na ndeto ya Yeova ĩla mũndũ wa Ngai watavanisye, ũla watavanisye maũndũ asu.

17Nĩvo ĩndĩ wakũlilye, Ũlilikan’yo ũũ ũla ngwona nĩ mwaũ? Na andũ ma ndũa mamũtavya, Nĩ ngunga ya mũndũ wa Ngai vala vathikawa akw’ũ, ũla waumie Yuta, na atavan’ya maũndũ aa ala weeka kĩthembeonĩ kya Mbethi‐eli.

18Na asya, Naekwe; mũndũ ndakathamye mavĩndĩ make. Kwondũ wa ũu maekana na mavĩndĩ make, vamwe na mavĩndĩ ma mwathani ũla waumie Samalia.

19O na nyũmba syonthe sya kũndũ kũtũlu kũla kwaĩ ndũanĩ sya Samalia, kũla asumbĩ ma Isilaeli maseũvĩtye makĩthatya Yeova, Yosia aveta, na asyĩka kwĩanana na meko onthe ala ũneekie ku Mbethi‐eli.

20Na ooaĩa athembi onthe ma kũla kũndũ kũtũlu ala maĩ kw’o ithembeonĩ, na avĩvĩsya mavĩndĩ ma andũ ĩũlũ wasyo; na asyoka Yelusaleme.

21Na mũsumbĩ eeaĩa andũ onthe, akĩmea, Lilikanai vasaka kwondũ wa Yeova Ngai wenyu, o tondũ kũandĩkĩtwe ĩvukunĩ yĩĩ ya ũtianĩo.

22Nĩ w’o, kũtyaalilikanwa vasaka ta ũsu kuma mĩthenya ya asili ala masilanasya Isilaeli, o na mĩthenya yonthe ya asumbĩ ma Isilaeli, o na ya asumbĩ ma Yuta;

23ĩndĩ mwaka wa ĩkũmi na nyanya wa kũsumbĩka kwa Yosia vasaka ũsu walilikanwa kwondũ wa Yeova ku Yelusaleme.

24Na ĩngĩ ala mesene na maveva, na ala mombasya ithitũ, na telavimu, na mĩvw’anano, na mothatyo onthe ala moonekie nthĩ ya Yuta na ku Yelusaleme, Yosia aveta, nĩ kana alũlũmĩlye ndeto sya mĩao ila iandĩkĩtwe ĩvukunĩ yĩla mũthembi Ilikia wonie nyũmbanĩ ya Yeova.

25Na vatyaĩ mũsumbĩ ũngĩ mbee wake wailyĩ take, ũla wamwĩthyũũĩe Yeova na ngoo yake yonthe, na thayũ wake w’onthe, na vinya wake w’onthe, kwĩanana na mĩao yonthe ya Mose: o na ĩtina wake vatyaaũkĩla ũngĩ wailyĩ take.

26Ĩndĩ vamwe na ũu, Yeova ndaaĩthyũaa atie wai wa ũthilĩku wake mũnene, ũla ũthatu wake wakanĩe Yuta naw’o, nũndũ wa mothatyo onthe ala Manase wamũthatĩtye namo.

27Na Yeova asya, Ngaumya Yuta nao nĩmatwae vala ndatonya kũmona, o tondũ naumisye Isilaeli, na ngekya ndũa ĩno ĩla nĩnyuvĩte, o Yelusaleme, na nyũmba ĩla naneenie ũndũ wayo, Syĩtwa yakwa yĩkeethĩwa vo.

28Na ĩndĩ meko ala angĩ ma Yosia, na w’onthe ũla wekaa, ti maandĩke ĩvukunĩ ya maũndũ ma mavinda ma asumbĩ ma Yuta?

29Mĩthenyanĩ yake Valao‐neko mũsumbĩ wa Misili ambata kũvika ũsĩnĩ wa Euvalati okite na mũsumbĩ wa Asuli: na mũsumbĩ Yosia aenda okite nake; na Valao‐neko amũaĩa ku Mekito, yĩla wamwonie.

30Na athũkũmi make mamũkua na ĩkasya e mũkw’ũ kuma Mekito, na mamũete Yelusaleme, na mamũthika ngunganĩ yake mwene vala vathikawa akw’ũ. Na andũ ma nthĩ ĩsu mamwosa Yeoaasi mwana wa Yosia, na mamwĩtĩkĩsya mauta, na mamũtw’ĩkĩthya mũsumbĩ vandũ va ĩthe wake.

31Yeoaasi aĩ wa myaka mĩongo ĩlĩ na ĩtatũ yĩla wambĩlĩlye kũsumbĩka; na asumbĩka myei ĩtatũ Yelusaleme: na syĩtwa ya inyia wake eetawa Amutali mwĩĩtu wa Yelemia wa ku Livina.

32Na eekaa ũla Yeova wonaa wĩ ũthũku, kwĩanana na w’onthe ũla aaĩthe make meekaa.

33Na Valao‐neko amwova ku Livila nthĩ ya Amathi, nĩ kana ndakasumbĩke Yelusaleme; na aumĩthya nthĩ koti wa talendi ĩana sya vetha, na talendi ya thaavu.

34Na Valao‐neko amũtw’ĩkĩthya Eliakimu mwana wa Yosia mũsumbĩ vandũ va Yosia ĩthe wake, na aalyũla syĩtwa yake etawe Yeoiakimu: ĩndĩ amumya Yeoaasi vo; nake aenda Misili, na akw’ĩa kw’o.

35Na Yeoiakimu amũnengae Valao ũla vetha na thaavu; ĩndĩ amyumĩthya nthĩ koti anengane mbesa kwĩanana na mwĩao wa Valao: vetha na thaavu ũsu amaumĩthasya andũ ma ĩ nthĩ na vinya, kĩla ũmwe kwĩanana na koti wake, amũnenge Valao‐neko.

36Yeoiakimu aĩ wa myaka mĩongo ĩlĩ na ĩtano yĩla wambĩlĩlye kũsumbĩka; na asumbĩka myaka ĩkũmi na ũmwe Yelusaleme: na syĩtwa ya inyia wake eetawa Nzevita mwĩĩtu wa Vetaia wa ku Luma.

37Na eekaa ũla Yeova wonaa wĩ ũthũku, kwĩanana na w’onthe ũla aaĩthe make meekaa.

← Chapter 22 Jump to: Chapter 24 →