2 Kings 24

Kamba (Mbivilia) 1956

← Chapter 23 Jump to: Chapter 25 →

1Na mĩthenyanĩ yake Nevukatilesa mũsumbĩ wa Mbaviloni ambata, na Yeoiakimu atw’ĩka mũthũkũmi wake myaka ĩtatũ: na ĩndĩ eealyũla na amũng’endea.

2Na Yeova atũma nguthu sya Akalitei syũkite nake, na nguthu sya Asilia, na nguthu sya Amoavi, na nguthu sya ana ma Amimoni, na aitũma syũkite na Yuta imyanange, kwĩanana na ndeto ya Yeova, ĩla waneenie na makanyw’a ma athũkũmi make athani.

3Nĩ w’o, kwondũ wa mwĩao wa Yeova ũu nĩwookie ĩũlũ wa Yuta, amaumya amatwae vala ũtatonya kũmona nũndũ wa naĩ sya Manase, kwĩanana na w’onthe ũla wekaa,

4o na ũndũ wa nthakame ite na ĩvĩtyo ila wetĩkisye; nũndũ ausũisye Yelusaleme nthakame ite na ĩvĩtyo: na Yeova ndaaĩtĩkĩla kũekea.

5Na ĩndĩ meko ala angĩ ma Yeoiakimu, na w’onthe ũla wekaa, ti maandĩke ĩvukunĩ ya maũndũ ma mavinda ma asumbĩ ma Yuta?

6Na ĩndĩ Yeoiakimu akoma na aaĩthe make; na Yeoiakini mwana wake asumbĩka vandũ vake.

7Na mũsumbĩ wa Misili ndaaũka ĩngĩ kuma nthĩ yake; nũndũ mũsumbĩ wa Mbaviloni nĩwosete, kuma kalũsĩnĩ ka Misili kũvika ũsĩ wa Euvalati, yonthe ĩla yaĩ ya mũsumbĩ wa Misili.

8Yeoiakini aĩ wa myaka ĩkũmi na nyanya yĩla wambĩlĩlye kũsumbĩka; na asumbĩka Yelusaleme myei ĩtatũ: na syĩtwa ya inyia wake eetawa Neusita mwĩĩtu wa Elinathani wa ku Yelusaleme.

9Na eekaa ũla Yeova wonaa wĩ ũthũku, kwĩanana na w’onthe ũla ĩthe wake wekaa.

10Ĩvinda yĩu athũkũmi ma Nevukatilesa mũsumbĩ wa Mbaviloni mambata Yelusaleme, na ndũa yathyũlũlũkwa ĩtw’ĩkanĩw’e.

11Na Nevukatilesa mũsumbĩ wa Mbaviloni ooka ndũanĩ ĩsu, yĩla athũkũmi make mamĩtw’ĩkanĩasya;

12na Yeoiakini mũsumbĩ wa Yuta amumaalĩla mũsumbĩ wa Mbaviloni, we, na inyia wake, na athũkũmi make, na anene make me mbee ũsumbĩnĩ, na anene ma kwake: na mũsumbĩ wa Mbaviloni amwosa mwaka wa nyanya wa kũsumbĩka kwake.

13Na akua aumya vo mothwii maie onthe ma nyũmba ya Yeova, na mothwii maie ma nyũmba ya mũsumbĩ, na atilanga mĩio yonthe ya thaavu ilungu, ĩla Solomoni mũsumbĩ wa Isilaeli waseũvĩtye ĩkalũnĩ ya Yeova, o tondũ Yeova waneenie.

14Na atwaa ma Yelusaleme onthe, na anene onthe me mbee ũsumbĩnĩ, na ngũmbaũ nene syonthe, o ala atave ngili ĩkũmi, na ndũĩka syonthe na atwii; vatĩ ũmwe waatiwa, ate o ala ngya ki ma andũ ma ĩ nthĩ.

15Na amũtwaa Yeoiakini Mbaviloni; na inyia wa mũsumbĩ, na iveti sya mũsumbĩ, na anene ma kwake, na andũ ala me ndaĩa ma nthĩ, amatwaa me atave kuma Yelusaleme kũvika Mbaviloni.

16Na andũ onthe me ũtonyi, o ngili mũonza, na ngili ya ndũĩka na atwii, onthe me vinya na mesĩ kaũ, asu nao mũsumbĩ wa Mbaviloni amatwaa Mbaviloni me atave.

17Na mũsumbĩ wa Mbaviloni amũtw’ĩkĩthya Matania, mwana‐a‐ĩthe wa ĩthe wa Yeoiakini, mũsumbĩ vandũ vake, na aalyũla syĩtwa yake etawe Nzetekia.

18Nzetekia aĩ wa myaka mĩongo ĩlĩ na ũmwe yĩla wambĩlĩlye kũsumbĩka; na asumbĩka myaka ĩkũmi na ũmwe ku Yelusaleme: na syĩtwa ya inyia wake eetawa Amutali mwĩĩtu wa Yelemia wa ku Livina.

19Na eekaa ũla Yeova wonaa wĩ ũthũku, kwĩanana na w’onthe ũla Yeoiakimu wekaa.

20Nũndũ kwondũ wa ũthatu wa Yeova ũndũ ũsu nĩweekĩkie Yelusaleme na Yuta, kũvika yĩla wamekisye maume mbee wake. Na Nzetekia amũng’endea mũsumbĩ wa Mbaviloni.

← Chapter 23 Jump to: Chapter 25 →