2 Kings 18

Kamba (Mbivilia) 1956

← Chapter 17 Jump to: Chapter 19 →

1Na ĩndĩ kweethĩwa mwaka wa katatũ wa kũsumbĩka kwa Osea mwana wa Ela mũsumbĩ wa Isilaeli, Esekia mwana wa Aasu mũsumbĩ wa Yuta ambĩlĩlya kũsumbĩka.

2Aĩ wa myaka mĩongo ĩlĩ na ĩtano yĩla wambĩlĩlye kũsumbĩka; na asumbĩka myaka mĩongo ĩlĩ na kenda Yelusaleme: na syĩtwa ya inyia wake eetawa Avi mwĩĩtu wa Nzekalia.

3Na eekaa ũla Yeova wonaa wĩ ũseo, kwĩanana na w’onthe ũla Ndaviti ĩthe wake wekaa.

4Aveta kũla kũndũ kũtũlu, na atũlanga ituĩ, na atema Asela wavalũka: na atilanga ilungu nzoka ya ũthuku ĩla Mose waseũvisye; nũndũ kũvika mĩthenya ĩsu ana ma Isilaeli mamĩtoeeasya ũvani; na amĩta Neusitani.

5Amũĩkĩĩaa Yeova, Ngai wa Isilaeli; ũndũ o na ĩtina wake vatyaĩ ũmwe wailyĩ take katĩ wa asumbĩ onthe ma Yuta, o na katĩ wa ala maĩ mbee wake.

6Nũndũ alũmanĩtye na Yeova; ndaaeka kũmũatĩĩa, ĩndĩ nĩwakwataa mĩao yake, ĩla Yeova wamwĩaĩe Mose.

7Na Yeova aĩ nake; o kũla waendaa nĩwaathimĩkaa: na amũng’endea mũsumbĩ wa Asuli, o na ndaamũthũkũma.

8Akũna Avilisiti kũvika Ngasa na mĩvaka yayo, kuma mwakonĩ mũtũlu wa mũnyoolo wa asyaĩĩsya kũvika ndũa mbiie.

9Na kweethĩwa mwaka wa kana wa kũsumbĩka kwa mũsumbĩ Esekia, ũla waĩ mwaka wa mũonza wa kũsumbĩka kwa Osea mwana wa Ela mũsumbĩ wa Isilaeli, Salimaneseli mũsumbĩ wa Asuli ambata okite na Samalia, na amĩthyũlũlũka amĩtw’ĩkanĩsya.

10Na myaka ĩtatũ yathela mamĩkwata; mwaka wa thanthatũ wa kũsumbĩka kwa Esekia, ũla waĩ mwaka wa kenda wa kũsumbĩka kwa Osea mũsumbĩ wa Isilaeli, nĩw’o Samalia yakwatiwe.

11Na mũsumbĩ wa Asuli amatwaa Isilaeli ku Asuli, na amekalya ku Aalaa, na ũtee wa Avoli, ũsĩ wa Ngosani, na ndũanĩ sya Ametia,

12nĩkwĩthĩwa matyaaĩw’a wasya wa Yeova Ngai woo, ĩndĩ mavĩtĩsye ũtianĩo wake, o w’onthe ũla Mose mũthũkũmi wa Yeova weaie, na malea kũwĩw’a, kana kũwĩka.

13Na ĩndĩ mwaka wa ĩkũmi na ĩna wa kũsumbĩka kwa mũsumbĩ Esekĩa, Senakelivu mũsumbĩ wa Asuli ambata okite na ndũa syonthe mbiie sya Yuta, na aikwata.

14Na Esekia mũsumbĩ wa Yuta atũmana kwa mũsumbĩ wa Asuli ku Lakisi, akĩmwĩa, Nĩnĩvĩtĩtye; syoka ũekane nakwa: kĩla wĩmbaĩkya ngakua. Na mũsumbĩ wa Asuli amũtw’ĩa Esekia mũsumbĩ wa Yuta talendi maana atatũ sya vetha na talendi mĩongo ĩtatũ sya thaavu.

15Na Esekia amũnenga vetha w’onthe ũla woonekie nyũmbanĩ ya Yeova, na mothwiinĩ maie nyũmbanĩ ya mũsumbĩ.

16Ĩvinda yĩu Esekia oombũa thaavu mĩomonĩ ya ĩkalũ ya Yeova, na ituĩnĩ ila Esekia mũsumbĩ wa Yuta wavw’ĩkĩte naw’o, na amũnenga mũsumbĩ wa Asuli.

17Na mũsumbĩ wa Asuli atũma Talitani na Lavi‐salisi na Lavisake kuma Lakisi mathi Yelusaleme kwa mũsumbĩ Esekia me na ita nene. Na mambata na mavika Yelusaleme. Na mavika, mathi na maũngama vakuvĩ na mũtaũ wa ndia yĩ ngalĩ ya ĩũlũ, ĩla yĩ lelũnĩ ũelete kĩsesinĩ kya mũthambya wa ngũa.

18Na yĩla mamwĩtie mũsumbĩ, maumaalĩlwe nĩ Eliakimu mwana wa Ilikia, ũla waĩ mũsyaĩĩsya wa andũ ma nyũmba, na mũandĩki Sevina, na Yoa mwana wa Asavu ũla mũandĩki wa maũndũ.

19Na Lavi‐sake amea, Mũtavyei Esekia yu, Ũũ nĩw’o mũsumbĩ mũnene, mũsumbĩ wa Asuli, ũnũkwasya, Wĩkwatyo ũũ nĩ mwaũ ũla wĩkwatĩtye?

20Nũkwasya (ĩndĩ nĩ ndeto sya mana), Ve ũtw’ĩo na vinya wa kaũ. Yu wĩkwatasya ũũ, nũndũ nũng’endee nyie?

21Yu, sisya, wĩkwatĩtye ndata ya mũangi ũũ mũkanyange, nayo nĩ Misili; ĩla ethĩwa mũndũ nũkwĩvandĩĩa nayo, ĩkatema kw’oko kwake, na ĩkĩkũtonya: now’o Valao mũsumbĩ wa Misili ũilyĩ kwa onthe ala mamũĩkĩĩaa.

22Ĩndĩ ethĩwa mwĩmbĩa, Ithyĩ nĩtũũmũĩkĩĩa Yeova Ngai waitũ; tiwe ũla Esekia ũvetete kũndũ kwake kũtũlu na ithembeo syake, na nũtavĩtye Yuta na Yelusaleme, Mũkathaithe mbee wa kĩthembeo kĩĩ Yelusaleme?

23Yu kwondũ wa ũu, nĩngũkwĩsũva, nenga vwana wakwa mũsumbĩ wa Asuli ngwatĩlĩlyo, na ngakũnenga mbalasi ngili ili, ethĩwa a vaku nũtonya kũtũlya andũ ĩũlũ wasyo.

24Ũtonya ata ĩndĩ kũthyũũa ũthyũ wa kavuteni ũmwe wa ala anini mbee ma athũkũmi ma vwana wakwa, na kwĩkwatya Misili ĩkũnenge makasya na andũ ma ũtũlaa mbalasi?

25Na yu nĩnambatĩte nde na Yeova nũkite na vandũ vaa nĩvanange? Yeova ambĩie, Ambata ũkite na nthĩ ĩsu, ũmyanange.

26Nĩvo ĩndĩ Eliakimu mwana wa Ilikia, e na Sevina, na Yoa, mamwĩie Lavi‐sake, Nĩngũkwĩsũva, neena na athũkũmi maku na kĩthyomo kya Asilia; nũndũ nĩtũũkĩmanya: na ndũkaneene naitũ na kĩthyomo kya Ayuti, matũnĩ ma ala me ũvainĩ.

27Ĩndĩ Lavi‐sake amakũlya, Vwana wakwa nũndũmĩte kwa vwana waku, na kwaku, nĩneene ndeto ii? Ndandũmĩte kwa andũ ala mekalaa ũvainĩ, maye mai moo ene, na manyw’e maumao moo ene vamwe nenyu?

28Nĩvo ĩndĩ Lavi‐sake waũngamie, na aneena na wasya mũnene na kĩthyomo kya Ayuti, na aneena, akyasya, Ĩthukĩĩsyei ndeto ya mũsumbĩ mũnene, mũsumbĩ wa Asuli.

29Ũũ nĩw’o mũsumbĩ ũnũkwasya, Esekia ndakamũkenge; nũndũ ndakatonya kũmũvonokya kuma kw’okonĩ kwake:

30o na Esekia ndakamũĩkĩĩthye Yeova, akyasya, Yeova ndakatĩa kũtũvonokya, na ndũa ĩno ndĩkanenganwe kw’okonĩ kwa mũsumbĩ wa Asuli.

31Mũtikamwĩthukĩĩsye Esekia: nũndũ ũũ nĩw’o mũsumbĩ wa Asuli ũnũkwasya, Seũvyai mũuo nakwa, na mũkyumaala mũke vala nĩĩ; na mũiĩsaa kĩla ũmwe wa mũsavivũ wake, na kĩla ũmwe wa mũkũyũ wake, na mũkĩnyusaa kĩla ũmwe manzĩ ma kĩthima kyake mwene;

32kũvika yĩla nĩũka na kũmũtwaa nthĩ ĩilyĩ ta nthĩ ĩno yenyu, nthĩ yĩ lĩu wa mbaa ngetha na mbinyu mbĩthĩ, nthĩ yĩ lĩu na mĩũnda ya mĩsavivũ, nthĩ yĩ mĩthata na ũkĩ wa nzũkĩ, nĩ kana mwĩkale na thayũ, na ti kũkw’a: na mũtikamwĩthukĩĩsye Esekia, yĩla ũnũkũmũkikya, akyasya, Yeova akatũvonokya.

33Kwĩ ngai o na yĩva ya i mbaĩ yaavonokya nthĩ yayo kuma kw’okonĩ kwa mũsumbĩ wa Asuli?

34Ngai sya Amathi, na sya Alivati iĩva? Ngai sya Sevalivaimu, na sya Ena, na sya Iva iĩva? Nivonoketye Samalia kuma kw’okonĩ kwakwa?

35Nĩ syĩva katĩ wa ngai syonthe sya nthĩ, ila ivonoketye nthĩ yasyo kuma kw’okonĩ kwakwa, nĩ kana Yeova avonokye Yelusaleme kuma kw’okonĩ kwakwa?

36Ĩndĩ andũ mavindya ki, na matyaamũsũngĩa ndeto; nũndũ mwĩao wa mũsumbĩ waĩtye, Mũtikamũsũngĩe.

37Nĩvo ĩndĩ Eliakimu mwana wa Ilikia, ũla waĩ mũsyaĩĩsya wa andũ ma nyũmba, na mũandĩki Sevina, na Yoa mwana wa Asavu ũla mũandĩki wa maũndũ, mathi kwa Esekia matembũangĩte ngũa syoo na mamũtavya ndeto sya Lavi‐sake.

← Chapter 17 Jump to: Chapter 19 →