2 Kings 14

Kamba (Mbivilia) 1956

← Chapter 13 Jump to: Chapter 15 →

1Mwaka wa kelĩ wa kũsumbĩka kwa Yoasi mwana wa Yoaasi mũsumbĩ wa Isilaeli Amasia mwana wa Yoasi mũsumbĩ wa Yuta ambĩlĩlya kũsumbĩka.

2Aĩ wa myaka mĩongo ĩlĩ na ĩtano yĩla wambĩlĩlye kũsumbĩka; na asumbĩka myaka mĩongo ĩlĩ na kenda Yelusaleme: na syĩtwa ya inyia wake eetawa Yeoatini wa ku Yelusaleme.

3Na eekaa ũla Yeova wonaa wĩ ũseo, ĩndĩ ti ta Ndaviti ĩthe wake: nĩwekaa kwĩanana na w’onthe ũla Yoasi ĩthe wake wekaa.

4Ĩndĩ kũla kũndũ kũtũlu kũtyaavetwa: andũ mĩmathembaa na kũtoeeasya ũvani kũla kũndũ kũtũlu.

5Na kweethĩwa, o yĩla ũsumbĩ walũlũmĩlw’e kw’okonĩ kwake, ooaa athũkũmi make ala mooaie mũsumbĩ ĩthe wake:

6ĩndĩ syana sya oaani asu ndaasyũaa; kwĩanana na ũla ũandĩkĩtwe ĩvukunĩ ya mĩao ya Mose, o tondũ Yeova weaie, akyasya, Aaithe matikoaawe kwondũ wa syana, o na syana itikoaawe kwondũ wa aaĩthe; ĩndĩ kĩla mũndũ akusae kwondũ wa naĩ yake mwene.

7Nĩwoaĩe andũ ma Etomu ngili ĩkũmi Kyandanĩ kya Mũnyũ, na akwata ĩvia ya Sela na kaũ, na eeta syĩtwa yayo Yokitheeli, kũvika ũmũnthĩ.

8Nĩvo ĩndĩ Amasia watũmie atũmwa kwa Yeoasi, mwana wa Yeoaasi mwana wa Yeu, mũsumbĩ wa Isilaeli, akĩmwĩa, Ũka, twonane ũthyũ kwa ũthyũ.

9Na Yeoasi mũsumbĩ wa Isilaeli atũmana kwa Amasia mũsumbĩ wa Yuta, akyasya, Thangila ũla waĩ Levanoni watũmana kwa mũkũũ ũla waĩ Levanoni, ũkyasya, Mũnenge mwana wakwa mwĩĩtu waku ethĩwe mũka wake; na nyamũ mbai ĩla yaĩ Levanoni yavĩta, na yakinyanga ũla thangila.

10Nĩ w’o, nũkũnĩte Etomu, na ngoo yaku nĩnĩkũkĩlĩtye: ĩkathĩĩe ũndũnĩ ũsu, nokĩkala kwaku; nũndũ wa kĩ ĩndĩ ũkwĩlikya maũndũnĩ ma kwĩyĩka naĩ, nĩ kana ũvalũke, o we, wĩ na Yuta?

11Ĩndĩ Amasia ndaaĩtĩkĩla kwĩthukĩĩsya. Kwondũ wa ũu Yeoasi mũsumbĩ wa Isilaeli ambata; nake na Amasia mũsumbĩ wa Yuta moonanĩa ũthyũ kwa ũthyũ ku Mbethi‐semesi, ĩla ya Yuta.

12Na Yuta makũnwa nĩ Isilaeli; na makũka kĩla mũndũ athi ĩeemanĩ yake.

13Na Yeoasi mũsumbĩ wa Isilaeli amũkwatĩa Amasia mũsumbĩ wa Yuta, mwana wa Yeoasi mwana wa Aasia, ku Mbethi‐semesi, na avika Yelusaleme, na aomboanga ũvai wa Yelusaleme kuma mbingĩlonĩ ya Evalaimu kũvika mbingĩlonĩ ya kĩkotonĩ, mĩkono maana ana.

14Na oosa thaavu w’onthe na vetha, na mĩio yonthe ĩla yoonekie nyũmbanĩ ya Yeova, na mothwiinĩ maie ma nyũmba ya mũsumbĩ, o na andũ ma ngwatĩlĩlyo, na asyoka Samalia.

15Na ĩndĩ meko ala angĩ ma Yeoasi ala wekaa, na vinya wake mũnene, na ũndũ wokitie na Amasia mũsumbĩ wa Yuta, ti maandĩke ĩvukunĩ ya maũndũ ma mavinda ma asumbĩ ma Isilaeli?

16Na Yeoasi akoma na aaĩthe make, na athikwa Samalia vamwe na asumbĩ ma Isilaeli; na Yelovoamu mwana wake asumbĩka vandũ vake.

17Na Amasia mwana wa Yoasi mũsumbĩ wa Yuta ekala thayũ ĩtina wa kĩkw’ũ kya Yeoasi mwana wa Yeoaasi mũsumbĩ wa Isilaeli myaka ĩkũmi na ĩtano.

18Na ĩndĩ meko ala angĩ ma Amasia, ti maandĩke ĩvukunĩ ya maũndũ ma mavinda ma asumbĩ ma Yuta?

19Na mamũsamĩĩa ku Yelusaleme; na akĩĩa Lakisi: ĩndĩ matũmanie aatĩĩwe ku Lakisi, na mamũaĩa kw’o.

20Na mamũete akuĩtwe nĩ mbalasi; na athikwa Yelusaleme vamwe na aaĩthe make ndũanĩ ya Ndaviti.

21Na andũ onthe ma Yuta moosa Asalia, ũla waĩ wa myaka ĩkũmi na thanthatũ, na mamũtw’ĩkĩthya mũsumbĩ vandũ va ĩthe wake Amasia.

22Na atũngĩĩa Elathi, na amĩtũnga kwa Yuta ĩtina wa mũsumbĩ ĩakoma na aaĩthe make.

23Mwaka wa ĩkũmi na ĩtano wa kũsumbĩka kwa Amasia mwana wa Yoasi mũsumbĩ wa Yuta, Yelovoamu mwana wa Yoasi mũsumbĩ wa Isilaeli ambĩlĩlya kũsumbĩka Samalia, na asumbĩka myaka mĩongo ĩna na ũmwe.

24Na eekaa ũla Yeova wonaa wĩ ũthũku: ndaatia naĩ syonthe sya Yelovoamu mwana wa Nevati, ila wavĩtĩthisye Isilaeli nasyo.

25Atũnga mũvaka wa Isilaeli kuma ũlikĩlonĩ wa Amathi kũvika ũkanga wĩ Alava, kwĩanana na ndeto ya Yeova, Ngai wa Isilaeli, ĩla waneenie na kanyw’a wa mũthũkũmi wake mwathani Yona mwana wa Amitai, ũla waĩ wa mũsyĩ wa Ngathi‐eevieli.

26Nũndũ Yeova nĩwonie thĩna wa Isilaeli kana waĩ ũũ mũno; nũndũ kũtyaĩ ũmwe mwove kana ũte mwove, o na kũtyaĩ mũtethya wa Isilaeli.

27Na Yeova ndaaneena atĩ akavuta syĩtwa ya Isilaeli yumw’e ĩtheo wa ĩtu; ĩndĩ amatangĩĩa na kw’oko kwa Yelovoamu mwana wa Yoasi.

28Na ĩndĩ meko ala angĩ ma Yelovoamu na w’onthe ũla wekaa, na vinya wake mũnene, ũndũ wokitie, na ũndũ watũngĩe Isilaeli Ndamasiku, na Amathi, ila syatwĩe sya Yuta, ti maandĩke ĩvukunĩ ya maũndũ ma mavinda ma asumbĩ ma Isilaeli?

29Na Yelovoamu akoma na aaĩthe make, o vamwe na asumbĩ ma Isilaeli; na Nzekalia mwana wake asumbĩka vandũ vake.

← Chapter 13 Jump to: Chapter 15 →