2 Kings 12

Kamba (Mbivilia) 1956

← Chapter 11 Jump to: Chapter 13 →

1Yeoasi ambĩlĩlya kũsumbĩka mwaka wa mũonza wa kũsumbĩka kwa Yeu; na asumbĩka myaka mĩongo ĩna Yelusaleme: na syĩtwa ya inyia wake eetawa Nzivia wa ku Mbeeli‐sieva.

2Na Yeoasi eekaa ũla Yeova wonaa wĩ ũseo mĩthenya yake yonthe ĩla mũthembi Yeoiata wamũmanyĩisye.

3Ĩndĩ kũla kũndũ kũtũlu kũtyaavetwa; andũ nĩmaendeeaa na kũthemba na kũtoeesya ũvani kũla kĩndũ kũtũlu.

4Na Yeoasi amea athembi, Mbesa syonthe sya syĩndũ ila ivathĩtwe syĩthĩwe ntheu ila ietawe nyũmbanĩ ya Yeova, mbesa ila itethasya wĩa, o mbesa sya andũ kwĩanana na kĩla mũndũ ũndũ ũtalĩlwe, na mbesa syonthe ila mũndũ o na wĩva ũsũanĩaa ngoonĩ aete nyũmbanĩ ya Yeova,

5athembi masyose, kĩla mũndũ kuma kwa ũla wĩsene nake; na makatũngĩĩa kũndũ kũvũthũku kwa nyũmba, o vala vakoneka ũomboku.

6Ĩndĩ kweethĩiwe, mwaka wa mĩongo ĩlĩ na ĩtatũ wa kũsumbĩka kwa mũsumbĩ Yeoasi athembi matyaĩ manatũngĩĩa kũndũ kũvũthũku kwa nyũmba.

7Nĩvo ĩndĩ mũsumbĩ Yeoasi wamwĩtie mũthembi Yeoiata, na athembi ala angĩ, na amakũlya, Nũndũ wa kĩ mũtiũtũngĩĩa kũndũ kũvũthũku kwa nyũmba? Yu kwondũ wa ũu mũtikose mbesa ingĩ kwa ala mwĩsene namo, ĩndĩ inenganei kwondũ wa ala moomboku ma nyũmba.

8Na athembi meetĩkĩla matikosa mbesa ingĩ kuma kwa andũ, o na matikatũngĩĩa kũndũ kũvũthũku kwa nyũmba.

9Ĩndĩ mũthembi Yeoiata oosa ĩsandũkũ, na atonya ĩima ngunĩkonĩ yayo, na ayia ũtee wa kĩthembeo, ngalĩ ya kw’oko kwa aũme, vala mũndũ ũlikĩlaa nyũmbanĩ ya Yeova: na athembi ala masũvĩaa me mwalyonĩ meekĩa nthĩnĩ wayo mbesa syonthe ila syaetiwe nyũmbanĩ ya Yeova.

10Na kweethĩwa, yĩla moonie kwaĩ mbesa mbingĩ ĩsandũkũnĩ, mũandĩki wa mũsumbĩ na mũthembi mũnene mambata, na meekĩa mbesa ila syoonekie nyũmbanĩ ya Yeova mũvukonĩ na maitala.

11Na mbesa ila syathimiwe manengane mokonĩ ma ala matethasya wĩa, ala masyaĩĩasya nyũmba ya Yeova: na maĩva aseũvya ma mbwaũ na aki, ala matethasya wĩa nyũmbanĩ ya Yeova,

12o na aki ma mavia na asũvya ma mavia, na kwondũ wa kũthooa mĩtĩ na mavia masũvye ma kũtũngĩĩa kũndũ kũvũthũku kwa nyũmba ya Yeova, na kwondũ wa syonthe ila syaumiwe sya kũtũngĩĩa nyũmba.

13Ĩndĩ kũtyaaseũvw’a kwondũ wa nyũmba ya Yeova ikombe sya vetha, kana mĩkasi, kana masaani manene, kana masoo, kana mĩio o na yĩva ya thaavu, kana mĩio ya vetha, na mbesa ila syaetiwe nyũmbanĩ ya Yeova;

14nũndũ isu syanengiwe ala matethasya wĩa, na matũngĩĩa nyũmba ya Yeova nasyo.

15O na ĩngĩ matyaatalana na andũ, ala mamanengie mbesa isu kw’okonĩ kwoo mamanenge ala matethasya wĩa; nũndũ matethasya na kĩthito.

16Mbesa sya nthembo kwondũ wa mavĩtyo, na mbesa sya nthembo kwondũ wa naĩ, ityaaetwe nyũmbanĩ ya Yeova: syaĩ sya athembi.

17Nĩvo ĩndĩ Aasaeli mũsumbĩ wa Silia wambatie, na okita na Ngathi, na amĩkwata; na Aasaeli eelekelya ũthyũ kũthi Yelusaleme.

18Na Yeoasi mũsumbĩ wa Yuta oosa syĩndũ syonthe ivathĩtwe syĩthĩwe ntheu ila Yeosavati na Yeolamu na Aasia, aaĩthe make, asumbĩ ma Yuta, mavathĩte syĩthĩwe ntheu, na syĩndũ syake mwene ila ivathĩtwe syĩthĩwe ntheu, na thaavu w’onthe ũla woonekie mothwiinĩ maie ma nyũmba ya Yeova, na ma nyũmba ya mũsumbĩ, na amũtwaĩa Aasaeli mũsumbĩ wa Silia: na aeka Yelusaleme.

19Na ĩndĩ meko ala angĩ ma Yoasi, na w’onthe ũla wekaa, ti maandĩke ĩvukunĩ ya maũndũ ma mavinda ma asumbĩ ma Yuta?

20Na athũkũmi make mookĩla, na mamũsamĩa, na mamũkũnĩa Yoasi nyũmbanĩ yĩtawa Milo, nzĩanĩ ĩla ĩelete Silila.

21Nũndũ Yosakali mwana wa Simeathi, na Yeosavatu mwana wa Someli, athũkũmi make, mamũkũna, na akw’a; na mamũthika vamwe na aaĩthe make ndũanĩ ya Ndaviti: na Amasia mwana wake asumbĩka vandũ vake.

← Chapter 11 Jump to: Chapter 13 →