2 Kings 15

Kamba (Mbivilia) 1956

← Chapter 14 Jump to: Chapter 16 →

1Mwaka wa mĩongo ĩlĩ na mũonza wa kũsumbĩka kwa Yelovoamu mũsumbĩ wa Isilaeli, Asalia mwana wa Amasia mũsumbĩ wa Yuta ambĩlĩlya kũsumbĩka.

2Aĩ wa myaka ĩkũmi na thanthatũ yĩla wambĩlĩlye kũsumbĩka; na asumbĩka myaka mĩongo ĩtano na ĩlĩ Yelusaleme: na syĩtwa ya inyia wake eetawa Yekolia wa ku Yelusaleme.

3Na eekaa ũla Yeova wonaa wĩ ũseo, kwĩanana na w’onthe ũla ĩthe wake Amasia wekaa.

4Ĩndĩ kũla kũndũ kũtũlu kũtyaavetwa: andũ nĩmaendeeaa na kũthemba na kũtoeesya ũvani kũla kũndũ kũtũlu.

5Na Yeova akũna mũsumbĩ, na eethĩwa na mangũ kũvika mũthenya wa kĩkw’ũ kyake, na ekalaa nyũmbanĩ e weka. Na Yothamu mwana wa mũsumbĩ aĩ mũsyaĩĩsya wa andũ ma nyũmba, akĩsilany’a andũ ma ĩ nthĩ.

6Na ĩndĩ meko ala angĩ ma Asalia, na w’onthe ũla wekaa, ti maandĩke ĩvukunĩ ya maũndũ ma mavinda ma asumbĩ ma Yuta?

7Na Asalia akoma na aaĩthe make; na mamũthika vamwe na aaĩthe make ndũanĩ ya Ndaviti: na Yothamu mwana wake asumbĩka vandũ vake.

8Mwaka wa mĩongo ĩtatũ na nyanya wa kũsumbĩka kwa Asalia mũsumbĩ wa Yuta, Nzekalia mwana wa Yelovoamu asumbĩka Isilaeli ku Samalia myei thanthatũ.

9Na eekaa ũla Yeova wonaa wĩ ũthũku, o tondũ aaĩthe make meekaa: ndaatia naĩ sya Yelovoamu mwana wa Nevati, ila wavĩtĩthisye Isilaeli nasyo.

10Na Salumu mwana wa Yavesi amũsamĩa, na amũkũna andũ mene, na amũaa, na asumbĩka vandũ vake.

11Na ĩndĩ meko ala angĩ ma Nzekalia, sisya, nĩmaandĩkĩtwe ĩvukunĩ ya maũndũ ma mavinda ma asumbĩ ma Isilaeli.

12Ĩno nĩyo ndeto ya Yeova ĩla waneenie na Yeu, akĩmwĩa, Ana maku kũvika nzyawa ya kana makekala kĩvĩlanĩ kya ũsumbĩ kya Isilaeli. Na o ũu weethĩwa.

13Salumu mwana wa Yavesi ambĩlĩlya kũsumbĩka mwaka wa mĩongo ĩtatũ na kenda wa kũsumbĩka kwa Usia mũsumbĩ wa Yuta; na asumbĩka vandũ va mwei ku Samalia.

14Na Menaemu mwana wa Kati ambata kuma Tilisa, na avika Samalia, na akũnĩa Salamu mwana wa Yavesi ku Samalia, na amũaa, na asumbĩka vandũ vake.

15Na ĩndĩ meko ala angĩ ma Salumu, na kũsamĩa kwake kũla wasamie, sisya nĩmaandĩkĩtwe ĩvukunĩ ya maũndũ ma mavinda ma asumbĩ ma Isilaeli.

16Nĩvo ĩndĩ Menaemu wakũnie Tivisa, na onthe nthĩnĩ wayo, na mĩvaka yayo, kuma Tilisa; nĩkwĩthĩwa matyaamũvingũĩa, kwondũ wa ũu amĩkũna; na aka onthe nthĩnĩ wayo ala aito amataũa.

17Mwaka wa mĩongo ĩtatũ na kenda wa kũsumbĩka kwa Asalia mũsumbĩ wa Yuta, Menaemu mwana wa Kati ambĩlĩlya kũsumbĩka Isilaeli, na asumbĩka myaka ĩkũmi Samalia.

18Na: eekaa ũla Yeova wonaa wĩ ũthũku mĩthenya yake yonthe ndaatia naĩ sya Yelovoamu mwana wa Nevati, ila wavĩtĩthisye Isilaeli nasyo.

19Na kwooka Vulu mũsumbĩ wa Asuli okite na nthĩ ĩsu; na Menaemu amũnenga Vulu talendi ngili sya vetha, nĩ kana kw’oko kwake kwĩthĩwe vamwe nake kũmũlũlũmĩlya ũsumbĩ kw’okonĩ kwake.

20Na Menaemu amaumĩthya Isilaeli mbesa isu na vinya, o athwii onthe me nguma kĩla mũndũ sekeli mĩongo ĩtano sya vetha, anenge mũsumbĩ wa Asuli. Kwondũ wa ũu mũsumbĩ wa Asuli eetulũla asyoka, na ndaaĩkala kw’o nthĩ ĩsu.

21Na ĩndĩ meko ala angĩ ma Menaemu, na w’onthe ũla wekaa, tĩ maandĩke ĩvukunĩ ya maũndũ ma mavinda ma asumbĩ ma Isilaeli?

22Na Menaemu akoma na aaĩthe make; na Vekaia mwana wake asumbĩka vandũ vake.

23Mwaka wa mĩongo ĩtano wa kũsumbĩka kwa Asalia mũsumbĩ wa Yuta, Vekaia mwana wa Menaemu ambĩlĩlya kũsumbĩka Isilaeli ku Samalia, na asumbĩka myaka ĩlĩ.

24Na eekaa ũla Yeova wonaa wĩ ũthũku: ndaatia naĩ sya Yelovoamu mwana wa Nevati, ila wavĩtĩthisye Isilaeli nasyo.

25Na Veka mwana wa Lemalia, kavuteni wake, amũsamĩa, na amũkũnĩa ku Samalia, nthĩnĩ wa nyũmba nene yĩ kĩemo yĩ nyũmbanĩ ya mũsumbĩ, vamwe na Alikovu na Alie; na vamwe nake kwaĩ andũ mĩongo ĩtano ma Angileati: na amũaa, na asumbĩka vandũ vake.

26Na ĩndĩ meko ala angĩ ma Vekaia, na w’onthe ũla wekaa, sisya, nĩmaandĩkĩtwe ĩvukunĩ ya maũndũ ma mavinda ma asumbĩ ma Isilaeli.

27Mwaka wa mĩongo ĩtano na ĩlĩ wa kũsumbĩka kwa Asalia mũsumbĩ wa Yuta, Veka mwana wa Lemalia ambĩlĩlya kũsumbĩka Isilaeli ku Samalia, na asumbĩka myaka mĩongo ĩlĩ.

28Na eekaa ũla Yeova wonaa wĩ ũthũku: ndaatia naĩ sya Yelovoamu mwana wa Nevati, ila wavĩtĩthisye Isilaeli nasyo.

29Mĩthenyanĩ ya Veka mũsumbĩ wa Isilaeli, Tikilathi‐vileseli mũsumbĩ wa Asuli ooka, na akwata ndũa sya Iyoni, na Aveli‐mbethi‐maaka, na Yanoa, na Ketesi, na Asoli, na Ngileati, na Ngalilii, nthĩ yonthe ya Navitali; na amatwaa me atave Asuli.

30Na Osea mwana wa Ela amũsamĩa Veka mwana wa Lemalia, na amũkũna, na amũaa, na asumbĩka vandũ vake, mwaka wa mĩongo ĩlĩ wa kũsumbĩka kwa Yothamu mwana wa Usia.

31Na ĩndĩ meko ala angĩ ma Veka, na w’onthe ũla wekaa, sisya, nĩmaandĩkĩtwe ĩvukunĩ ya maũndũ ma mavinda ma asumbĩ ma Isilaeli.

32Mwaka wa kelĩ wa kũsumbĩka kwa Veka mwana wa Lemalia mũsumbĩ wa Isilaeli, Yothamu mwana wa Usia mũsumbĩ wa Yuta ambĩlĩlya kũsumbĩka.

33Aĩ wa myaka mĩongo ĩlĩ na ĩtano yĩla wambĩlĩlya kũsumbĩka; na asumbĩka myaka ĩkũmi na thanthatũ Yelusaleme: na syĩtwa ya inyia wake eetawa Yelusa mwĩĩtu wa Nzatoki.

34Na eekaa ũla Yeova wonaa wĩ ũseo; nĩwekaa kwĩanana na w’onthe ũla ĩthe wake Usia wekaa.

35Ĩndĩ kũla kũndũ kũtũlu kũtyaavetwa: andũ nĩmaendeeaa na kũthemba na kũtoeesya ũvani kũla kũndũ kũtũlu. Nĩwakie mbingĩlo ya ngalĩ ya ĩũlũ ya nyũmba ya Yeova.

36Na ĩndĩ meko ala angĩ ma Yothamu, na w’onthe ũla wekaa, ti maandĩke ĩvukunĩ ya maũndũ ma mavinda ma asumbĩ ma Yuta?

37Mĩthenyanĩ ĩsũ Yeova ambĩlĩlya kũtũma Lesini mũsumbĩ wa Silia, na Veka mwana wa Lemalia, mokite na Yuta.

38Na Yothamu akoma na aaĩthe make, na athikwa vamwe na aaĩthe make ndũanĩ ya Ndaviti ĩthe wake: na Aasu mwana wake asumbĩka vandũ vake.

← Chapter 14 Jump to: Chapter 16 →