Jeremiah 16

Kamba (Mbivilia) 1956

← Chapter 15 Jump to: Chapter 17 →

1Na ĩngĩ ndeto ya Yeova yambũkĩa, ĩkyasya,

2Ndũkaaĩtwaĩe mũka, kana kwĩthĩwa na ana kana eĩtu, vandũ vaa.

3Nũndũ ũũ nĩw’o Yeova ũnũkwasya ũndũ wa ana na ũndũ wa eĩtu ala masyaĩwe vandũ vaa, na ũndũ wa aainyia moo ala mamasyaĩe, na ũndũ wa aaĩthe moo ala mamasyaĩe nthĩ ĩno:

4Makakw’a ikw’ũ nthũku: maikametewa, o na maikenzĩwa nthĩ; makethĩwa ta vũũ ĩũlũ wa nthĩ; na makooawa na ũvyũ, na yũa; na simba syoo ikethĩwa lĩu wa nyũnyi sya yayaya, na wa nyamũ sya nthĩ.

5Nũndũ ũũ nĩw’o Yeova ũnũkwasya, Ndũkalike nyũmbanĩ ya kũĩĩa, o na ndũkathi kũmeta, kana kũmaĩĩa; nĩnumĩtye mũuo wakwa kwa andũ aa, o ũseo wĩ wendo na tei mwololo, easya ũu Yeova.

6Anene na anini makakw’ĩa nthĩ ĩno; matikenzĩwa nthĩ, o na andũ matikamaĩĩa, kana kwĩtemanga, kana kwĩyenza ũvaa kwondũ woo;

7o na andũ matikatilan’ya kĩmũtũ kwondũ woo makĩĩa, mamakiakisye ũndũ wa akw’ũ; o na andũ matikamanenga kĩkombe kya ũkiakisyo manyw’e ũndũ wa ĩthe woo kana ũndũ wa inyia woo.

8O na ndũkalike nyũmbanĩ ya kũvokea mboka wĩkale nao, kũya na kũnyw’a.

9Nũndũ ũũ nĩw’o Yeova wa nguthu, Ngai wa Isilaeli, ũnũkwasya: Sisya, ngaekethya vandũ vaa wasya wa kũtheka na wasya wa ũtanu, wasya wa mũtwaani na wasya wa mũtwawa, mũsyaĩtye na metho menyu mĩthenyanĩ yenyu.

10Na kũkeethĩwa, yĩla wĩmon’ya andũ aa ndeto ii syonthe, na makakũkũlya, Nũndũ wa kĩ Yeova ũtũneeneete ũthũku ũũ w’onthe? Kana ũthũku witũ nĩ mwaũ? Kana naĩ yaitũ ĩla twamũvĩtanĩsye Yeova Ngai waitũ nĩ myaũ?

11Nĩvo ĩndĩ ũkamea, Yeova easya, Nĩkwĩthĩwa aaĩthe menyu nĩmandiĩte, na kũatĩĩa ngai ingĩ, na kwithũkũma, na kwithaitha, na kũndia, na matyaakwata mĩao yakwa;

12na inyw’ĩ nĩmwĩkĩte ũthũku kũvĩtũka aaĩthe menyu; nũndũ, sisya, nĩmũendaa kĩla mũndũ akĩatĩĩa ngũlũ sya ngoo yake nthũku, kwondũ wa ũu mũimbĩthukĩĩasya:

13kwondũ wa ũu ngamwĩkya mume nthĩ ĩno mũende nthĩ ĩla mũtaamanya, inyw’ĩ kana aaĩthe menyu; na kw’o mũkathũkũmĩa ngai ingĩ mũthenya na ũtukũ; nũndũ ndikamwon’ya ũseo.

14Kwondũ wa ũu, sisya, mĩthenya nĩyũkĩte, easya Yeova, ĩla kũikaneenwa ĩngĩ, O tondũ Yeova wĩ thayũ, ũla waumisye ana ma Isilaeli Misili;

15ĩndĩ, O tondũ Yeova wĩ thayũ, ũla waetie ana ma Isilaeli kũmaumya nthĩ yĩ ngalĩ ya ĩũlũ, na kuma nthĩ syonthe vala wamalũngĩlĩĩlye. Na ngamaete ĩngĩ nthĩ yoo ĩla nanengie aaĩthe moo.

16Sisya, ngatũmana atei aingĩ na makamatea, easya ũu Yeova; na ĩtina ngatũmana asyĩmi aingĩ, na makamasyĩma maume kĩla kĩĩmanĩ, na kuma kĩla kalĩma, na kuma mĩvatĩnĩ ya mavia.

17Nũndũ metho makwa nĩmasyaĩĩtye mĩendele yoo yonthe; ti mĩvithe ũthyũnĩ wakwa, o na ũthũku woo ti mũvithe ũndũ ndatonya kũwona.

18Na ũndũ wa mbee ngaĩva ũthũku woo na naĩ syoo kũndũ kwĩlĩ, nũndũ nĩmathũkĩtye nthĩ yakwa na simba sya syĩndũ syoo imenetwe, na kusũsya ũtiĩwa wakwa na mothatyo moo.

19Ame Yeova, vinya wakwa, na ngome yakwa yĩ vinya, na wĩvitho wakwa mũthenya wa thĩna, mbaĩ ikooka vala ũĩ kuma itulunĩ sya nthĩ, na ikasya, Aaĩthe maitũ matyaatiĩwa kĩndũ no movũngũ, o kĩndũ kya mana na syĩndũ ila ite na ũuno.

20Mũndũ akeeseũvĩsya ngai, nasyo ti ngai?

21Kwondũ wa ũu, sisya, ngamamanyĩthya, no ĩvinda yĩĩ yĩmwe ngamamanyĩthya kw’oko kwakwa na vinya wakwa; na makamanya kana syĩtwa yakwa nĩ Yeova.

← Chapter 15 Jump to: Chapter 17 →