Jeremiah 34

Kamba (Mbivilia) 1956

← Chapter 33 Jump to: Chapter 35 →

1Ndeto ĩla yamũkĩe Yelemia kuma kwa Yeova, yĩla Nevukatilesa mũsumbi wa Mbaviloni, na ita syake syonthe, na mosumbĩ onthe ma nthĩ ala masumbĩkĩtwe nĩwe, na ngo syonthe sya andũ, mokitaa na Yelusaleme, na ndũa syonthe syayo, ĩkĩmwĩa,

2Ũũ nĩw’o Yeova, Ngai wa Isilaeli, ũnũkwasya, Enda ũneene na Nzetekia mũsumbĩ wa Yuta, noimũtavya, Ũũ nĩw’o Yeova ũnũkwasya, Sisya, nganengane ndũa ĩno kw’okonĩ kwa mũsumbĩ wa Mbaviloni, nake akamĩvĩvya na mwaki:

3naku ndũkavonoka kuma kw’okonĩ kwake, ĩndĩ ndũkatĩa kũkwatwa, na kũnenganwe kw’okonĩ kwake; na metho maku makoona metho ma mũsumbĩ wa Mbaviloni, na akaneena naku kanyw’a kwa kanyw’a, naku ũkathi Mbaviloni.

4Ĩndĩ ĩw’a ndeto ya Yeova, we Nzetekia mũsumbĩ wa Yuta: Ũũ nĩw’o Yeova ũnũkwasya ũndũ waku, Ndũkoawa na ũvyũ;

5ũkakw’a wĩ na mũuo; na makakũtoeesya o ũndũ matoeesye aaĩthe maku, o asumbĩ ma tene ala masumbĩkie mbee waku; na makakũmetea, makyasya, A! Mwĩaĩi! Nũndũ nĩnĩneenete ndeto ĩno, easya ũu Yeova.

6Nĩvo ĩndĩ mwathani Yelemia wamũtavisye Nzetekia mũsumbĩ wa Yuta ndeto isu syonthe e Yelusaleme,

7yĩla ita sya mũsumbĩ wa Mbaviloni syokitaa na Yelusaleme, na ndũa syonthe sya Yuta ila syatialile, Lakisi na Aseka; nũndũ isu syĩ syoka nĩsyatialile syĩ ndũa mbiie katĩ wa ndũa sya Yuta.

8Ndeto ĩla yamũkĩe Yelemia kuma kwa Yeova, ĩtina wa mũsumbĩ Nzetekia kũtianĩa ũtianĩo na andũ onthe ala maĩ Yelusaleme, kũtavan’ya ũthasyo kwoo;

9kana kĩla mũndũ nathasye mũthũkũmi wake mũndũ mũũme, na kĩla mũndũ mũthũkũmi wake mwĩĩtu, ethĩwa nĩ mũndũ mũũme Mũevelania kana mũndũ mũka Mũevelania; mũndũ ndakamũtw’ĩkĩthye ngombo, o Mũyuti mwana‐a‐ĩthe.

10Na anene onthe me mbee ũsumbĩnĩ na andũ onthe meeka ũu, ala malikĩte ũtianĩonĩ, kana kĩla ũmwe nathasye mũthũkũmi wake mũndũ mũũme, na kĩla ũmwe mũthũkũmi wake mwĩĩtu, mũndũ o na wĩva ndakamatw’ĩkĩthye ngombo ĩngĩ; nĩmeewie na mamathasya:

11ĩndĩ ĩtina maalyũka, na matũnga athũkũmi na athũkũmi eĩtu, ala mamathaĩtye, na mamaete ũkombonĩ methĩwe athũkũmi na athũkũmi eĩtu.

12Kwondũ wa ũu ndeto ya Yeova yamũkia Yelemia kuma kwa Yeova, ĩkyasya,

13Ũũ nĩw’o Yeova, Ngai wa Isilaeli, ũnũkwasya: Nĩnatianĩe ũtianĩo na aaĩthe menyu mũthenya ũla namaumisye nthĩ ya Misili, kuma nyũmbanĩ ya ũkombo, ngyasya,

14Myaka mũonza yathela mwĩthaasya kĩla mũndũ mwana‐a‐ĩthe wake Mũevelania, ũla wathooiw’e kwaku, na nũkũthũkũmĩte myaka thanthatũ, ũkamũthasya aume kwaku: ĩndĩ aaĩthe menyu matyaambĩthukĩĩsya, kana kũtea matũ moo.

15Na yu nĩmweealyũlĩte na kwĩka ũla nonaa wĩ ũseo, ũndũ wa kũtavan’ya ũthasyo kĩla mũndũ kwa mũtũi wake; na nĩmwatianĩĩte ũtianĩo mbee wakwa nyũmbanĩ ĩla yĩtanĩaw’a na syĩtwa yakwa:

16ĩndĩ mwaalyũka na kũyĩuma syĩtwa yakwa, na mwatũnga kĩla mũndũ mũthũkũmi wake, na kĩla mũndũ mũthũkũmi wake mwĩĩtu, ala mwamathaĩtye maende o vala mekwenda; na mwamaete ũkombonĩ, methĩwe kwenyu athũkũmi na athũkũmi eĩtu.

17Kwondũ wa ũu Yeova easya atĩĩ: Mũtyaambĩthukĩĩsya, mũtavan’ye ũthasyo, kĩla mũndũ kwa mwana‐a‐ĩthe, na kĩla mũndũ kwa mũtũĩ wake: sisya, nĩngũtavan’ya kwenyu ũthasyo wa ũvyũ, na mũimũ, na yũa, easya ũu Yeova; na ngatuma mwĩkangw’a kũũ na kũũ mosumbĩnĩ onthe ma nthĩ.

18Na nganengane andũ ala mavĩtisye ũtianĩo wakwa, ala mataaĩanĩsya ndeto sya ũtianĩo ũla matianĩe nakwa, yĩla matũaanisye kala kasaũ myondo ĩlĩ na mavĩtĩla katĩ wa myondo yako;

19anene me mbee ũsumbĩnĩ ma Yuta, na anene me mbee ũsumbĩnĩ ma Yelusaleme, na avakũe, na athembi, na andũ onthe ma ĩ nthĩ, ala mavĩtĩle katĩ wa myondo ya kala kasaũ;

20ngamanengane mokonĩ ma amaitha moo, na mokonĩ ma ala mamanthaa mathayũ moo; na simba syoo ikethĩwa lĩu wa nyũnyi sya yayaya, na wa nyamũ sya nthĩ.

21Na Nzetekia mũsumbĩ wa Yuta na anene make me mbee ũsumbĩnĩ ngamanengane mokonĩ ma amaitha moo, na mokonĩ ma ala mamanthaa mathayũ moo, na mokonĩ ma ita sya mũsumbĩ wa Mbaviloni, ala mambatie kuma kwenyu.

22Sisya, ngeeaa, na kũmatũnga ndũanĩ ĩno, easya ũu Yeova; na makamyũkita na kũmyosa, na kũmĩvĩvya na mwaki: na ngatw’ĩkĩthya ndũa sya Yuta maanzo, ite mũndũ witũa.

← Chapter 33 Jump to: Chapter 35 →