Jeremiah 29

Kamba (Mbivilia) 1956

← Chapter 28 Jump to: Chapter 30 →

1Ii nĩsyo ndeto sya valũa ũla mwathani Yelemia e Yelusaleme watwaĩe ala matialile ma atumĩa ala mataviwe, na athembi, na athani, na andũ onthe, ala Nevukatilesa wamatwaie me atave kuma Yelusaleme kũthi Mbaviloni

2(yĩla mũsumbĩ Yekonia, na inyia wake maminĩte kuma Yelusaleme vamwe na ala avakũe, na anene me mbee ũsumbĩnĩ ma Yuta na Yelusaleme, na ndũĩka, na atwii),

3na kw’oko kwa Elasa mwana wa Savani, na Ngemalia mwana wa Ilikia (ũla Nzetekia mũsumbĩ wa Yuta wamũtũmie Mbaviloni kwa Nevukatilesa mũsumbĩ wa Mbaviloni), akyasya,

4Ũũ nĩw’o Yeova wa nguthu, Ngai wa Isilaeli, ũnũũmea onthe ala mataviwe, ala namatwaĩthisye me atave kuma Yelusaleme kũthi Mbaviloni:

5Akai nyũmba, mũsyĩkale; na vandai mĩũnda, mũye ũsyao wayo.

6Twaai aka, mũsyae ivĩsĩ na eĩtu; na matwaĩei ana menyu aka, na nenganei eĩtu menyu, nĩ kana masyae ivĩsĩ na eĩtu: na ingĩvĩai kw’o, na mũikaoleke.

7Na manthai mũuo wa ndũa vala namũtwaĩthisye mwĩ atave, na voyai Yeova kwondũ wayo; nũndũ mũuonĩ wayo inyw’ĩ mũkeethĩwa na mũuo

8Nũndũ ũũ nĩw’o Yeova wa nguthu, Ngai wa Isilaeli, ũnũkwasya; Athani menyu ala me katĩ wenyu, na menyu ala maaũasya, matikamũkenge; o na mũikethukĩĩsye ndoto syenyu ila mũotaa.

9Nũndũ nĩmamwathanĩaa movũngũ syĩtwanĩ yakwa: ndyaamatũma, easya ũu Yeova.

10Nũndũ ũũ nĩw’o Yeova ũnũkwasya, Myaka mĩongo mũonza yeanĩa kwondũ wa Mbaviloni, ngamũkĩa, na kwĩanĩsya ndeto yakwa nzeo kwenyu ya kũtuma mũsyoka vaa.

11Nũndũ nĩnĩsĩ mosũanĩo ala nĩsũanĩaa kwondũ wenyu, easya Yeova, mosũanĩo ma mũuo, na ti ma ũthũku, kũmũnenga wĩkwatyo mũminũkĩlyo wenyu.

12Na mũkeengaĩla, na mũkathi kũmboya, na ngamwĩthukĩĩsya.

13Na mũkamantha nyie, na kũmbona, yĩla mwĩmantha na ngoo yenyu yonthe.

14Na ngooneka kwenyu, easya Yeova, na ngamũtũnga mume kũtavwanĩ kwenyu, na ngamũmban’ya kuma mbaĩnĩ syonthe na kũndũ kw’onthe kũla namũlũngĩlĩĩlye, easya ũu Yeova; na ngamũete ĩngĩ vandũ vala natumie mumw’a vo mũtwawe mwĩ atave.

15Nĩkwĩthĩwa nĩmũneenete atĩĩ, Yeova nĩwatũkĩlĩlye athani ku Mbaviloni;

16ũũ nĩw’o Yeova ũnũkwasya ũndũ wa mũsumbĩ ũla wĩkalĩte kĩvĩlanĩ kya ũsumbĩ kya Ndaviti, na ũndũ wa andũ onthe ala matwĩe ndũanĩ ĩno, ana‐a‐ĩthe menyu ala mataathi me atave vamwe nenyu;

17ũũ nĩw’o Yeova wa nguthu ũnũkwasya: Sisya, ngamaetee ũvyũ, na yũa, na mũimũ, na ngamatw’ĩkĩthya ta makũyũ mathũku, ala matatonya kũĩka, nũndũ wa kũthũka kwamo.

18Na ngamaatĩĩa na ũvyũ, na yũa, na mũimũ, na ngamanengane mekangw’e kũũ na kũũ mosumbĩnĩ onthe ma nthĩ, methĩwe kĩumo, na ũseng’yo, na ma kũtimbwa, na ma kũvũthĩĩw’a, mbaĩnĩ syonthe vala namalũngĩlĩĩlye;

19nĩkwĩthĩwa matyaaĩthukĩĩsya ndeto syakwa, easya Yeova, ila natũmie athũkũmi makwa ala athani kwoo nasyo, ngyũkĩla tene, ngĩmatũma; ĩndĩ mũtyaaĩthukĩĩsya, easya ũu Yeova.

20Ĩthukĩĩsyei ĩndĩ ndeto ya Yeova, inyw’onthe ala mwataviwe, ala namũlũngilye mume Yelusaleme kũthi Mbaviloni.

21Ũũ nĩw’o Yeova wa nguthu, Ngai wa Isilaeli, ũnũkwasya, ũndũ wa Aavu mwana wa Kolaia, na ũndũ wa Nzetekia mwana wa Maaseia, ala mamwathanĩaa ũvũngũ syĩtwanĩ yakwa: Sisya, ngamanengane kw’okonĩ kwa Nevukatilesa mũsumbĩ wa Mbaviloni; na akamoaa mũmene na metho menyu;

22na kwondũ woo kũkaneenwa kĩumo nĩ onthe ma Yuta ala mataviwe ala me Mbaviloni, makyasya, Yeova nakũtw’ĩkĩthye ta Nzetekia na ta Aavu, ala mũsumbĩ wa Mbaviloni wamavĩvisye na mwaki;

23nĩkwĩthĩwa nĩmekĩte ũtumanu nthĩnĩ wa Isilaeli, na kwĩka ũlaalai na iveti sya atũi moo, na nĩmaneenete ndeto sya ũvũngũ syĩtwanĩ yakwa, ila ndaameaĩa; na ninyie ũla wĩsĩ, na nĩ ngũsĩ, easyu ũu Yeova.

24Na ũndũ wa Semaia ũla Mũneelami ũkaneena, ũkyasya,

25Ũũ nĩw’o Yeova wa nguthu, Ngai wa Isilaeli, ũnũũneena, akyasya, Nũndũ nũtwaĩte mavalũa syĩtwanĩ yaku mwene kwa andũ onthe ma Yelusaleme, na kwa Nzevania, mwana wa mũthembi Maaseia, na kwa athembi onthe, ũkyasya,

26Yeova nũkũtw’ĩkĩthĩtye mũthembi vandũ va mũthembi Yeoiata, nĩ kana vethĩwe anene nyũmbanĩ ya Yeova, kwondũ wa kĩla mũndũ ũla ũkwetwe nĩ ndũũka, na kwĩtw’ĩkĩthya mwene mwathani, nĩ kana ũmwĩkĩe ĩla mĩtĩnĩ ya kwoveea maũũ na ĩla ya ngingo.

27Kwondũ wa ũu, nũndũ wa kĩ ndwaamũkan’ya Yelemia wa Anathothi, ũla wĩtw’ĩte mwathani kwenyu,

28nũndũ nũtũmanĩte kwitũ Mbaviloni, akyasya, Ĩvinda ya kũtavwa nĩ ĩasa: akai nyũmba, mũsyĩkale; na vandai mĩũnda, mũĩsae ũsyao wayo?

29Na mũthembi Nzevania asoma valũa ũsu matũnĩ ma mwathani Yelemia.

30Nĩvo ĩndĩ ndeto ya Yeova yamũkĩe Yelemia, ĩkĩmwĩa,

31Tũmana kwa onthe ala mataviwe, ũkyasya, Ũũ nĩw’o Yeova ũnũkwasya ũndũ wa Semaia ũla Mũneelami: Nũndũ Semaia nĩwamwathanĩe, na ndyaamũtũma, na nũmũĩkĩĩthĩtye ũvũngũ;

32kwondũ wa ũu Yeova easya atĩĩ, Sisya, ngakũna Semaia ũla Mũneelami, na ũsyao wake; ndakethĩwa na mũndũ mũũme wa kwĩkala andũnĩ aa, o na ndakona ũseo ũla ngameka andũ makwa, easya Yeova, nĩkwĩthĩwa nũneeneete Yeova ndeto sya ũng’endu.

← Chapter 28 Jump to: Chapter 30 →