Jeremiah 35

Kamba (Mbivilia) 1956

← Chapter 34 Jump to: Chapter 36 →

1Ndeto ĩla yamũkĩe Yelemia kuma kwa Yeova mĩthenya ya Yeoiakimu mwana wa Yosia, mũsumbĩ wa Yuta, ĩkĩmwĩa.

2Enda nyũmbanĩ ya Alekavi, ũneene nao, na kũmaete nyũmbanĩ ya Yeova, kasũmbanĩ kamwe ka nthĩnĩ, na kũmanenga mbinyu ya ũnyw’a.

3Nĩvo ĩndĩ noosie Yaasania mwana wa Yelemia, mwana wa Avasinia, na ana‐a‐ĩthe make, na ana make onthe, na nyũmba yonthe ya Alekavi;

4na namaete nyũmbanĩ ya Yeova, kasũmbanĩ ka ana ma Aananu mwana wa Ikitalia mũndũ wa Ngai, kala kaĩ vakuvĩ na kasũmba ka anene me mbee ũsumbĩnĩ, kala kaĩ ĩũlũ wa kasũmba ka Maaseia mwana wa Salumu, mũsũvĩi wa mwalyonĩ.

5Nakwa naia mbee wa ana ma nyũmba ya Alekavi mbakũli syusĩe mbinyu, na ikombe; na namea, Nyw’ai mbinyu.

6Ĩndĩ masya, Tũtikanyw’a mbinyu; nũndũ Yonatavu mwana wa Lekavi, asa waitũ, atwĩaĩe, akyasya, Mũtikaanyw’e mbinyu, inyw’ĩ, kana ana menyu, tene na tene:

7o na mũtikaake nyũmba, kana kũvũĩa mbeũ, kana kũvanda mũũnda wa mĩsavivũ, kana kwĩthĩwa naw’o; ĩndĩ mĩthenya yenyu yonthe mũkatũaa maeemanĩ; nĩ kana mwĩkalae thayũ mĩthenya mingĩ nthĩ ĩla mũtũaa mwĩ aeni.

8Na nĩtweewie wasya wa Yonatavu mwana wa Lekavi, asa waitũ, ũndũnĩ w’onthe ũla watwĩaĩe, atĩ tũtikaanyw’e mbinyu mĩthenya yaitũ yonthe, ithyĩ, kana iveti sitũ, kana ana maitũ, kana eĩtu maitũ;

9kana kwaka nyũmba twĩkalae nthĩnĩ wasyo; o na tũti na mũũnda wa mĩsavivũ, kana mũũnda, kana mbeũ:

10ĩndĩ nĩtwĩkalaa maeemanĩ, na kwĩw’aa, na kwĩkaa kwĩanana na w’onthe ũla Yonatavu asa waitũ watwĩaĩe.

11Ĩndĩ kweethĩwa yĩla Nevukatilesa mũsumbĩ wa Mbaviloni wambatie na kũlika nthĩ ĩno, nĩvo twaisye, Ũkai, tũende Yelusaleme tũkĩĩte ita sya Akalitei, na tũkĩĩte ita sya Asilia; kwondũ wa ũu nĩtwĩkalaa Yelusaleme.

12Nĩvo ĩndĩ ndeto ya Yeova yamũkĩe Yelemia, ĩkyasya,

13Ũũ nĩw’o Yeova wa nguthu, Ngai wa Isilaeli, ũnũkwasya: Enda, ũmakũlye andũ ma Yuta na ala matwĩe Yelusaleme, Mũtikwenda kwosa ũmanyĩsyo mwĩthukĩĩsye ndeto syakwa? Easya ũu Yeova.

14Ndeto sya Yonatavu mwana wa Lekavi, ila wameaĩe ana make, matikaanyw’e mbinyu, nikwĩanĩw’a; na kũvika mũnthĩ ũũ matinyusaa nongi, nũndũ nĩmew’aa mwĩano wa ĩthe woo. Ĩndĩ nĩnĩneenete nenyu, ngyũkĩla tene na ngĩneena; na mũtyaambĩthukĩĩsya.

15O na nĩnĩtũmĩte kwenyu athũkũmi makwa onthe athani, ngyũkĩla tene na ngĩmatũma, ngyasya, Syokai yu kĩla mũndũ kuma mũendelenĩ wake mũthũku, mũlũngalye meko menyu, na mũtikaatĩĩe ngai ingĩ mwithũkũme, na mũkekalaa nthĩ ĩla namũnengie inyw’ĩ na aaĩthe menyu: ĩndĩ mũtyaatea matũ menyu, kana kũmbĩthukĩĩsya.

16Nĩkwĩthĩwa ana ma Yonatavu mwana wa Lekavi nĩmeanĩsye mwĩao wa ĩthe woo ũla wameaĩe, ĩndĩ andũ aa matyaambĩthukĩĩsya;

17kwondũ wa ũu Yeova, Ngai wa nguthu, Ngai wa Isilaeli, easya: Sisya, ngaetee Yũta na onthe ala matwĩe Yelusaleme ũthũku w’onthe ũla namaneenee; nũndũ nĩnĩneenete nao, ĩndĩ matyaaĩw’a; na nĩnĩmetĩte, ĩndĩ matyaaĩtĩka.

18Na Yelemia atavya nyũmba ya Alekavi, Ũũ nĩw’o Yeova wa nguthu, Ngai wa Isilaeli, ũnũkwasya: Nĩkwĩthĩwa nĩmweewie mwĩao wa Yonatavu ĩthe wenyu, na kũkwata mawĩaĩo make onthe, na kwĩka kwĩanana na w’onthe ũla wamwĩaĩe;

19kwondũ wa ũu Yeova wa nguthu, Ngai wa Isilaeli, easya: Yonatavu mwana wa Lekavi ndakaĩwa nĩ mũndũ mũũme wa kũũngama mbee wakwa tene na tene.

← Chapter 34 Jump to: Chapter 36 →