Jeremiah 25

Kamba (Mbivilia) 1956

← Chapter 24 Jump to: Chapter 26 →

1Ndeto ĩla yamũkĩe Yelemia ũndũ wa andũ onthe ma Yuta, mwaka wa kana wa kũsumbĩka kwa Yeoiakimu mwana wa Yosia, mũsumbĩ wa Yuta (mwaka ũsu nĩw’o wa mbee wa kũsumbĩka kwa Nevukatilesa mũsumbĩ wa Mbaviloni),

2ĩla mwathani Yelemia wamatavisye andũ onthe ma Yuta, na onthe ala matwĩe Yelusaleme, akyasya:

3Kuma mwaka wa ĩkũmi na ĩtatũ wa Yosia mwana wa Amoni, mũsumbĩ wa Yuta, o na kũvika mũnthĩ ũũ, myaka ĩsu mĩongo ĩlĩ na ĩtatũ, ndeto ya Yeova nĩyambũkĩaa, nakwa naneenaa nenyu, ngyũkĩla tene na ngĩneena; ĩndĩ mũtyaaĩthukĩĩsya.

4Na Yeova nũtũmĩte kwenyu athũkũmi make onthe athani, akyũkĩla tene na kũmatũma (ĩndĩ mũtyaaĩthukĩĩsya, kana kũtea matũ menyu mwĩw’e),

5akyasya, Syokai yu kĩla ũmwe kuma mũendelenĩ wake mũthũku, na kuma ũthũkunĩ wa meko menyu, mwĩkalae nthĩ ĩla Yeova wamũnengie inyw’ĩ na aaĩthe menyu, kuma tene na kũvika tene na tene;

6na mũikaatĩĩe ngai ingĩ mwithũkũme, na kwithaitha, na mũikanthatye na wĩa wa moko menyu, nakwa ndikamwĩka ũndũ ũthũku.

7Ĩndĩ mũtyaambĩthukĩĩsya, easya ũu Yeova; nĩ kana mũnthatye na wĩa wa moko menyu na kwĩyĩka ũthũku.

8Kwondũ wa ũu Yeova wa nguthu easya atĩĩ: Nĩkwĩthĩwa mũtyaaĩthukĩĩsya ndeto syakwa,

9sisya, ngatũmana na kwosa mĩvĩa yonthe ya ngalĩ ya ĩũlũ, easya Yeova, na ngatũmana kwa Nevukatilesa mũsumbĩ wa Mbaviloni, mũthũkũmi wakwa, na kũmaete mokite na nthĩ ĩno, na ala mamĩtwĩe, na mbaĩ ii syonthe ithyũlũlũkĩte ngalĩ syonthe; na ngasyananga vyũ, na kwitw’ĩkĩthya ũseng’yo, na sya kũtimbwa, na mawanangĩko ma tene na tene.

10O na ũndũ ũngĩ ngaumya kwoo wasya wa kũtheka na wasya wa ũtanu, wasya wa mũtwaani na wasya wa mũtwawa, wasya wa mavia ma kũthia, na kyeni kya taa.

11Na nthĩ ĩno yonthe ĩkeethĩwa nthei, na ũseng’yo; na mbaĩ ii ikathũkũma mũsumbĩ wa Mbaviloni myaka mĩongo mũonza.

12Na kũkeethĩwa, myaka mĩongo mũonza yathela, ngakũna mũsumbĩ wa Mbaviloni, na mbaĩ ĩsu, na nthĩ ya Akalitei, ũndũ wa ũthũku wayo, na ngamĩtw’ĩkĩthya nthei tene na tene, easya ũu Yeova.

13Ngamĩetee nthĩ ĩsu ndeto syakwa syonthe ĩla naneenie ĩũlũ wayo, o ũndũ w’onthe ũla ũandĩkĩtwe ĩvukunĩ yĩĩ, ũla Yelemia wathanĩe mbaĩ syonthe,

14Nũndũ mbaĩ nyingĩ na asumbĩ anene. Makamatw’ĩkĩthya ngombo, o mo; na ngamaĩva kwĩanana na meko moo, na kwĩanana na wĩa wa moko moo.

15Nũndũ ũũ nĩw’o Yeova, Ngai wa Isilaeli, ũnũũmbĩa: Osa kĩkombe kĩĩ kya mbinyu ya ũthilĩku kĩ kw’okonĩ kwakwa, na kũnyw’ĩthya mbaĩ syonthe ila ngakũtũma kwasyo.

16Na makanyw’a, na kũlũa kũũ na kũũ, na kwĩthĩwa na ndũũka, nũndũ wa ũvyũ ũla ngatũma katĩ woo.

17Nĩvo ĩndĩ noosie kĩkombe kw’okonĩ kwa Yeova, na nainyw’ĩthya mbaĩ syonthe, ila Yeova wandũmie kwasyo:

18nasyo nĩ, Yelusaleme, na ndũa sya Yuta, na asumbĩ masyo, na anene me mbee ũsumbĩnĩ masyo, kwitw’ĩkĩthya maanzo, na ũseng’yo, na sya kũtimbwa, na kĩumo, o ũndũ kũilyĩ ũmũnthĩ;

19na Valao mũsumbĩ wa Misili, na athũkũmi make, na anene make me mbee ũsumbĩnĩ, na andũ make onthe;

20na andũ onthe ala mavulanĩte, na asumbĩ onthe ma nthĩ ya Usi, na asumbĩ onthe ma nthĩ ya Avilisiti, na Asikeloni, na Ngasa, na Ekiloni, na ũtialo wa Asitoti;

21na Etomu, na Moavi, na ana ma Amimoni;

22na asumbĩ onthe ma Tile, na asumbĩ onthe ma Sitoni, na asumbĩ ma kĩthama kĩla kĩ mũingo wa ũkanga;

23na Ndetani, na Tema, na Mbusi, na onthe ala menzetwe ithũkũ mĩtwe;

24na asumbĩ onthe ma Alavia, na asumbĩ onthe ma andũ mavulanĩte ala matwĩe weũnĩ;

25na asumbĩ onthe ma Nzimili, na asumbĩ onthe ma Elamu, na asumbĩ onthe ma Ametia;

26na asumbĩ onthe ma ngalĩ ya ĩũlũ, kũasa na vakuvĩ, ũmwe na ũmwe; na mosumbĩ onthe ma nthĩ, ala me ĩũlũ wa nthĩ: na mũsumbĩ wa Sesaki akanyw’a ĩtina woo.

27Na ũkamea, Ũũ nĩw’o Yeova wa nguthu, Ngai wa Isilaeli, ũnũkwasya: Nyw’ai, mũtoone, na kũtavĩka, na kũvalũka, na kũlea kũkĩla ĩngĩ, nũndũ wa ũvyũ ũla ngatũma katĩ wenyu.

28Na kũkeethĩwa, malea kwosa kĩkombe kw’okonĩ kwaku manyw’e, nĩvo ĩndĩ wĩmea, Ũũ nĩw’o Yeova wa nguthu ũnũkwasya: No mũvaka mũnyw’e.

29Nũndũ, sisya, nĩngwambĩlĩlya kwĩka ũthũku ndũanĩ ĩla yĩtanĩaw’a na syĩtwa yakwa; na inyw’ĩ mũkatĩa kũkũnwa? Mũtikaekwa mũte akũne; nũndũ ngeetĩsya andũ onthe ũvyũ ala matwĩe nthĩ, easya ũu Yeova wa nguthu.

30Kwondũ wa ũu mathanĩe ndeto ii syonthe, na kũmea, Yeova akaluma e ĩũlũ, na kumya wasya wake wĩkalonĩ wake mũtheu; akalumĩla na vinya ĩĩthya yake; akamokĩlĩlya onthe ala matwĩe nthĩ wasya mũnene, o ta wa ala makinyangaa nzavivũ.

31Kĩlonzo kĩkavika kĩtulu kya nthĩ; nũndũ Yeova e na ngananĩo na i mbaĩ; akasilĩla mĩĩ yonthe: na ũndũ wa ala athũku, akamanengane moawe na ũvyũ, easya ũu Yeova.

32Ũũ nĩw’o Yeova wa nguthu ũnũkwasya, Sisya, ũthũku ũkaendaa kuma mbaĩnĩ kũvika mbaĩnĩ, na kĩuutani kĩnene kĩkookĩlw’a kuma itulunĩ sya nthĩ.

33Na mũthenya ũsu ala oae ma Yeova makethĩwa kuma ngalĩ ĩmwe ya nthĩ kũvika ngalĩ ĩla ĩngĩ ya nthĩ: matikametewa, kana kũmbanw’a, kana kwĩnzĩwa nthĩ; makethĩwa ta vũũ ĩũlũ wa nthĩ.

34Kayai, inyw’ĩ aĩthi, na kũĩa; ĩyalalyei mũunĩ, inyw’ĩ anene ma ndĩthya; nũndũ mĩthenya ya kũawa kwenyu na ya kũnyaĩĩkw’a kwenyu nĩ mĩviku ki, na mũkavalũka ta mũio mũseo.

35Na aĩthi matikethĩwa na nzĩa ya kũkĩĩla, kana mũnene wa ndĩthya nzĩa ya kũvonokela.

36Wasya wa kĩĩo kya aĩthi, na kũkaya kwa ũla mũnene wa ndĩthya! Nũndũ Yeova nũnũkwananga kĩsesi kyoo.

37Na syengo syaĩ na mũuo nivindĩthĩtwe nũndũ wa ũthatu mwai wa Yeova.

38Nũtiĩte kĩsumo kyake ta mũnyambũ; nũndũ nthĩ yoo nĩtw’ĩkĩte ũseng’yo nũndũ wa wai wa ũvyũ ũla ũthĩnasya, na nũndũ wa ũthatu wake mwai.

← Chapter 24 Jump to: Chapter 26 →