Jeremiah 36

Kamba (Mbivilia) 1956

← Chapter 35 Jump to: Chapter 37 →

1Na kweethĩwa mwaka wa kana wa kũsumbĩka kwa Yeoiakimu mwana wa Yosĩa, mũsumbĩ wa Yuta, ndeto ĩno yamũkĩa Yelemia kuma kwa Yeova, ĩkĩmwĩa,

2Ĩyose ĩvuku ĩkũnze, noiandĩka nthĩnĩ wayo ndeto syonthe ila nakũtavisye ngĩneenea Isilaeli, na Yuta, na mbaĩ syonthe, kuma mũthenya naneenie naku, kuma mĩthenya ya Yosia, o kũvika ũmũnthĩ.

3Nokwĩthĩwa nyũmba ya Yuta ĩkeew’a ũthũku w’onthe ũla nĩsũanĩĩte kũmeka; matonye kũsyoka kĩla mũndũ kuma mũendelenĩ wake mũthũku; nĩ kana nĩmaekee ũthũku woo na naĩ yoo.

4Nĩvo ĩndĩ Yelemia wamwĩtie Mbaluka mwana wa Nelia; na Mbaluku aandĩka kuma kanyw’anĩ wa Yelemia ĩvukunĩ ĩkũnze ndeto syonthe sya Yeova, ila wamũtavisye.

5Na Yelemia amwĩaĩa Mbaluku, akyasya, Nĩ mwove; nditonya kũthi nyũmbanĩ ya Yeova;

6kwondũ wa ũu enda, ũsome ĩvukunĩ ĩkũnze, yila ũandĩkĩte kuma kanyw’anĩ wakwa, ndeto sya Yeova matũnĩ ma andũ nyũmbanĩ ya Yeova mũthenya wa kũtĩĩa ũya; o na ũkaisoma matũnĩ ma Ayuta onthe ala maumaa ndũanĩ syoo.

7Nokwĩthĩwa makaete mboya syoo mbee wa Yeova, na kũsyoka kĩla ũmwe kuma mũendelenĩ wake mũthũku; nũndũ ũthatu na kũthilĩka kũla Yeova ũmaneeneete andũ aa nĩ kũnene.

8Na Mbaluku mwana wa Nelia eeka kwĩanana na w’onthe ũla mwathani Yelemia wamwĩaĩa, aisoma yĩla ĩvukunĩ ndeto sya Yeova nyũmbanĩ ya Yeova.

9Na kweethĩwa mwaka wa katano wa kũsumbĩka kwa Yeoiakimu mwana wa Yosia, mũsumbĩ wa Yuta, mwei wa kenda, andũ onthe ma Yelusaleme, na andũ onthe ala mookie Yelusaleme kuma ndũanĩ sya Yuta, matavan’ya kũtĩĩa ũya mbee wa Yeova.

10Nĩvo ĩndĩ Mbaluku wasomie yĩla ĩvukunĩ ndeto sya Yelemia e nyũmbanĩ ya Yeova, kasũmbanĩ ka Ngemalia mwana wa mũandĩki Savani, nza ya ĩũlũ, vandũ wa ũlikĩla mbingĩlonĩ nzaũ ya nyũmba ya Yeova, andũ onthe makĩw’a.

11Na yĩla Mikaia mwana wa Ngemalia, mwana wa Savani, wewie ndeto syonthe sya Yeova kuma yĩla ĩvukunĩ,

12atheea nyũmbanĩ ya mũsumbĩ, kasũmbanĩ ka mũandĩki: na, sisya, anene onthe me mbee ũsumbĩnĩ mekalĩte vo, nao nĩ aa; mũandĩki Elisama, na Ndelaia mwana wa Semaia, na Elinathani mwana wa Akivoli, na Ngemalia mwana wa Savani, na Nzetekia mwana wa Aanania, na anene onthe me mbee ũsumbĩnĩ.

13Nĩvo ĩndĩ Mikaia wamatavisye ndeto syonthe ila wewie, yĩla Mbaluku wasomie yĩla ĩvuku matũnĩ ma andũ.

14Kwondũ wa ũu anene onthe me mbee ũsumbĩnĩ matũma Yeuuti mwana wa Nethania, mwana wa Selemia, mwana wa Kusi, kwa Mbaluku, makĩmwĩa, Osa na kw’oko kwaku ivuku ĩkũnze yĩla wasomee matũnĩ ma andũ, noyũka. Kwondũ wa ũu Mbaluku mwana wa Nelia oosa ĩvuku na kw’oko kwake na athi vala maĩ.

15Nao mamwĩa, Yu ĩkala nthĩ, noiyĩsoma matũnĩ maitũ. Na ĩndĩ Mbaluku ayĩsoma matũnĩ moo.

16Na kweethĩwa, meew’a ndeto syonthe, masian’ya kĩla mũndũ na ũla ũngĩ na w’ĩa, na mamwĩa Mbaluku, Tũitĩa kũtavya mũsumbĩ ndeto ii syonthe.

17Na mamũkũlya Mbaluku, makyasya, Tũtavye yu, Waandĩkie ndeto ii syonthe ata kuma kanyw’anĩ wake?

18Nĩvo ĩndĩ Mbaluku wamasũngĩie, Nĩwawetie ndeto ii syonthe mbee wakwa na kanyw’a wake, nakwa naandĩka na ingi yĩla ĩvukunĩ.

19Nĩvo ĩndĩ anene me mbee ũsumbĩnĩ mamwĩie Mbaluku, Enda wĩvithe, we na Yelemia; na mũndũ o na wĩva ndakamanye vala mũĩ.

20Na malika nza kwa mũsumbĩ; ĩndĩ maĩ manaia ĩvuku ĩkũnze kasũmbanĩ ka mũandĩki Elisama; na maneena ndeto syonthe matũni ma mũsumbĩ.

21Kwondũ wa ũu mũsumbĩ amũtũma Yeuuti alatye yĩla ĩvuku; na ayumya kasũmbanĩ ka mũandĩki Elisama. Na Yeuuti ayĩsoma matũnĩ ma mũsumbĩ, na matũnĩ ma anene onthe me mbee ũsumbĩnĩ ala maũngeme vakuvĩ na mũsumbĩ.

22Na mũsumbĩ ekalĩte nyũmbanĩ ĩla ĩkalawa ĩvinda ya mbevo mwei wa kenda: na vaĩ mwaki wakanĩte kaikonĩ mbee wake.

23Na kweethĩwa, yĩla Yeuuti waminie kũsoma ilungu itatũ kana inya, mũsumbĩ atila kĩlungu kyu na kavyũ, na kũkĩkya mwakinĩ ũla waĩ kaikonĩ, kũvika ĩvuku ĩkũnze yonthe yavĩvw’a na mwaki ũla waĩ kaikonĩ.

24Na matyaakĩa, kana kũtembũanga ngũa syoo, o na mũsumbĩ, kana athũkũmi make o na meva ala meewie ndeto isu.

25Na ũndũ ũngĩ Elinathani na Ndelaia na Ngemalia maĩ manamwĩsũva mũsumbĩ ndakavĩvye yĩla ĩvuku ĩkũnze; ĩndĩ ndaaĩtĩkĩla kũmew’a.

26Na mũsumbĩ amwĩaĩa Yelameeli mwana wa mũsumbĩ, na Selaia mwana wa Anzilieli, na Selemia mwana wa Aviteeli, makwate mũandĩki Mbaluku na mwathani Yelemia; ĩndĩ Yeova amavitha.

27Nĩvo ĩndĩ ndeto ya Yeova yamũkĩe Yelemia, ĩtina wa mũsumbĩ kũvĩvya ĩvuku ĩkũnze, na ndeto ila Mbaluku waandĩkie syaumĩte kanyw’anĩ wa Yelemia, ĩkĩmwĩa,

28Osa ingĩ ĩvuku yĩngĩ ĩkũnze, noiandĩka nthĩnĩ wayo ndeto syonthe sya mbee ila syaĩ ĩvukunĩ ĩkũnze ya mbee, yĩla Yeoiakimu mũsumbĩ wa Yuta wavĩvisye.

29Na ũndũ wa Yeoiakimu mũsumbĩ wa Yuta ũkasya, Ũũ nĩw’o Yeova ũnũkwasya: Nĩwavĩvisye ĩvuku yĩu, ũkyasya, Nũndũ wa kĩ waandĩkie nthĩnĩ wayo, ũkyasya, Mũsumbĩ wa Mbaviloni ndatĩa kũka na kwananga nthĩ ĩno, na kũmina kw’o andũ na nyamũ?

30Kwondũ wa ũu Yeova easya ũndũ wa Yeoiakimu mũsumbĩ wa Yuta: Ndakethĩwa na mũndũ wa kwĩkalĩla kĩvĩla kya ũsumbĩ kya Ndaviti; na kimba kyake kĩkekw’a nza mũthenya kwĩ kũvyũ, na ũtukũ kwĩ ĩmwe yĩkamĩtw’e nĩ mbevo.

31Na ngamũkũna we na ũsyao wake na athũkũmi make ũndũ wa ũthũku woo; na ngamaetee, na ala matwĩe Yelusaleme, na andũ ma Yuta, ũthũku w’onthe ũla namawetee, ĩndĩ matyaaĩthukĩĩsya.

32Nĩvo ĩndĩ Yelemia wosie ĩvuku yĩngĩ ĩkũnze, na amũnenga mũandĩki Mbaluku, mwana wa Nelia, ũla waandĩkie nthĩnĩ wayo kuma kanyw’anĩ wa Yelemia ndeto syonthe sya ĩvuku yĩla Yeoiakimu mũsumbĩ wa Yuta wavĩvisye na mwaki; nasyo syongelelwa ndeto ingĩ mbingĩ iilyĩ tasyo.

← Chapter 35 Jump to: Chapter 37 →