Jeremiah 33

Kamba (Mbivilia) 1956

← Chapter 32 Jump to: Chapter 34 →

1Na ĩngĩ ndeto ya Yeova yamũkĩa Yelemia ĩvinda ya kelĩ, o yĩla waĩ mwove nza ya kolokolo, ĩkyasya,

2Ũũ nĩw’o Yeova ũnũkwasya ũla ũwĩkaa, Yeova ũla ũseũvasya kana olũlũmĩlye; Yeova nĩ syĩtwa yake:

3Mbĩkaĩla, na ngakũsũngĩa, na ngakwon’ya maũndũ manene, na me vinya, ũtamesĩ.

4Nũndũ ũũ nĩw’o Yeova, Ngai wa Isilaeli, ũnũkwasya ũndũ wa nyũmba sya ndũa ĩno, na ũndũ wa nyũmba sya asumbĩ ma Yuta, ila iomboetwe syake syĩndũ sya kwĩlingan’ya nasyo ũndũ wa ivumbu na ũvyũ;

5yĩla mookĩte kũkita na Akalitei, na kũsyusũsya na simba sya andũ, ala nooaie nĩ mũthatu na mũthilĩku, na ũndũ wa ũthũku wa onthe nĩnĩmĩvithĩte ndũa ĩno ũthyũ wakwa:

6Sisya, ngamĩetee ũseo wa mwĩĩ na ũvosyo, na ngamavosya; na ngamon’ya wingĩ wa mũuo na w’o.

7Na ngatũnga Yuta na Isilaeli maume kũtavwanĩ kwoo, na ngamatũngĩĩa, o ũndũ mailyĩ mbee.

8Na ngamathesya ũthũku woo w’onthe, ũla mambĩtanĩsye; na ngamaekea mothũku moo onthe, ala mambĩtanĩsye, na ala mambĩkie.

9Na ndũa ĩno ĩkeethĩwa kwakwa syĩtwa ya ũtanu, na ũtaĩo, na ũnene, mbaĩ syonthe sya nthĩ syene, ila ikew’a w’onthe ũla nĩmekaa, na ikakĩa na kũtetema nũndũ wa ũseo w’onthe na mũuo w’onthe ũla nĩmyonea.

10Ũũ nĩw’o Yeova ũnũkwasya: o na ĩngĩ kũkeew’ĩka vandũ vaa, vala mwĩneena ũndũ wa vo, Nĩ ĩanzo, vate mũndũ na vate nyamũ, o na ndũanĩ sya Yuta, na nzĩanĩ nene sya Yelusaleme, ila syatiiwe, ite mũndũ, na ite andũ ma kwitũa, na ite nyamũ,

11kũkeew’ĩka wasya wa kũtheka na wasya wa ũtanu, wasya wa mũtwaani na wasya wa mũtwawa, wasya wa ala mekwasya, Mũtũngĩei mũvea Yeova wa nguthu, nũndũ Yeova nĩ mũseo, nũndũ ũseo wake wĩ wendo nĩwĩkalaa tene na tene; na wasya wa ala maetae nthembo sya mũvea nyũmbanĩ ya Yeova. Nũndũ ngatũnga atavwa ma ĩ nthĩ ĩkale tondũ yailyĩ mbee, easya ũu Yeova.

12Ũũ nĩw’o Yeova wa nguthu ũnũkwasya: o na ĩngĩ vandũ vaa, vala nĩ ĩanzo, vate mũndũ na vate nyamũ, na ndũanĩ syonthe sya vo, vakeethĩwa wĩkalo wa aĩthi ala matindiasya ndĩthya syoo sya mbũi na malondu.

13Ndũanĩ sya nthĩ yĩ iĩma, na ndũanĩ sya nthĩ ndindimalu, na ndũanĩ sya ngalĩ ya Ĩtheo, na nthĩ ya Mbenyamini, na ku ndee sya Yelusaleme, na ndũanĩ sya Yuta, ndĩthya sya mbũi na malondu ikavĩtĩla ĩngĩ ungu wa moko ma ũla wĩtalaa, easya ũu Yeova.

14Sisya, mĩthenya nĩyũkĩte, easya Yeova, ĩla ngeanĩsya ndeto nzeo ĩla nĩneenete ũndũ wa nyũmba ya Isilaeli na ũndũ wa nyũmba ya Yuta.

15Mĩthenya ĩsu, na ĩvinda yĩu, ngathongoesya Ndaviti Ũvonge wa ũlũngalu; nake akasilaa sila wa katĩ na mũlũngalu e ĩ nthĩ.

16Mĩthenya ĩsu Yuta ĩkatangĩĩwa, na Yelusaleme ĩkekala ĩte na mũisyo; na yĩĩ nĩyo syĩtwa yĩla ĩketwa nayo: Yeova ũlũngalu wĩtũ.

17Nũndũ ũũ nĩw’o Yeova ũnũkwasya: Ndaviti ndakaĩwa nĩ mũndũ mũũme wa kwĩkalĩla kĩvĩla kya ũsumbĩ kya nyũmba ya Isilaeli;

18o na athembi Alivai matikaĩwa nĩ mũndũ wa kũthemba nthembo sya kũvĩvw’a, na wa kũvivya nthembo sya mũtu, na kũthemba mavinda onthe mbee wakwa.

19Na ndeto ya Yeova yamũkĩa Yelemia, ĩkyasya,

20Ũũ nĩw’o Yeova ũnũkwasya: Ethĩwa mũtonya kwananga ũtianĩo wakwa wa mũthenya, na ũtianĩo wakwa wa ũtukũ, kũikethiwe mũthenya na ũtukũ ĩvinda yaw’o;

21nĩvo ĩndĩ ũtianĩo wakwa naw’o ũtonya kwanangwa ũla natianĩe na Ndaviti mũthũkũmi wakwa, ndakethĩwe na mwana wa kũsumbĩka kĩvĩlanĩ kyake kya ũsumbĩ; o na ũla natianĩe na athembi Alivai, athũkũmi makwa.

22O ũndũ nguthu sya ĩtunĩ itatonya kũtalĩka, kana kĩthangathĩ kya ũkanga kĩtatonya kũthimĩka; now’o ngaingĩvya ũsyao wa Ndaviti mũthũkũmi wakwa, na Alivai ala manthũkũmaa.

23Na ndeto ya Yeova yamũkĩa Yelemia, ĩkĩmũkũlya,

24Ndũũsũanĩa ũndũ andũ aa maneenete, makyasya, Mĩvĩa ĩlĩ ĩla Yeova wanyuvie, nake nũmĩkĩtye ũtee? Now’o mavũthasya andũ makwa, nĩ kana matikethĩwe mbaĩ mbee woo ĩngĩ.

25Ũũ nĩw’o Yeova ũnũkwasya: Ethĩwa ũtianĩo wakwa wa mũthenya na ũtukũ ndũkethĩwa vo, ethĩwa nditw’ĩte motw’ĩo ma ĩtu na nthĩ;

26nĩvo ĩndĩ ngekya ũtee ũsyao wa Yakovo, na wa Ndaviti mũthũkũmi wakwa, kana ndikose ma ũsyao wake methĩwa ma kũsumbĩka ũsyao wa Avalaamu, na Isaka, na Yakovo: nũndũ ngamatũnga maume kũtavwanĩ kwoo, na kũmew’ĩa tei.

← Chapter 32 Jump to: Chapter 34 →