Jeremiah 26

Kamba (Mbivilia) 1956

← Chapter 25 Jump to: Chapter 27 →

1Wambĩlĩlyo wa kũsumbĩka kwa Yeoiakimu mwana wa Yosia, mũsumbĩ wa Yuta, ndeto ĩno yaumie kwa Yeova, ĩkĩmbĩa,

2Ũũ nĩw’o Yeova ũnũkwasya: Ũngama nza ya nyũmba ya Yeova, noineena na ndũa syonthe sya Yuta, ila syũkaa kũthaitha nyũmbanĩ ya Yeova, ndeto syonthe ila ngũkwĩaĩa witavye; ndũkatialye ndeto o na ĩmwe.

3Nokwĩthĩwa makethukĩĩsya, na kĩla mũndũ kwĩthyũũa na kũtia mũendele wake mũthũku; nĩ kana nĩalyũle ũndũ wa ũthũku ũla nĩsũanĩĩte kũmeka nũndũ wa ũthũku wa meko moo.

4Na wĩmea, Ũũ nĩw’o Yeova ũnũkwasya: Ethĩwa mũtikambĩthukĩĩsya, mũende mĩaonĩ yakwa, ĩla niĩte mbee wenyu.

5Na kwĩthukĩĩsya ndeto sya athũkũmi makwa athani, ala nĩtũmaa kwenyu, ngyũkĩla tene na kũmatũma, ĩndĩ mũtyaaĩthukĩĩsya;

6nĩvo ĩndĩ ngatw’ĩkĩthya nyũmba ĩno ta Silo, na kũtw’ĩkĩthya ndũa ĩno kĩumo kwa mbaĩ syonthe sya nthĩ.

7Na athembi na athani na andũ onthe meew’a Yelemia aineenea ndeto isu nyũmbanĩ ya Yeova.

8Na kweethĩwa, Yelemia amina ũneena syonthe ila Yeova wamwĩaĩe amatavye andũ onthe, athembi na athani na andũ onthe mamũkwata, makĩmwĩa, No mũvaka ũkw’e.

9Nũndũ wa kĩ wathana syĩtwanĩ ya Yeova, ũkyasya, Nyũmba ĩno ĩkeethĩwa ta Silo, na ndũa ĩno ĩkeethĩwa ĩanzo, ĩte mũndũ ũmĩtũa? Na andũ onthe mamũmbanĩa Yelemia nyũmbanĩ ya Yeova.

10Na anene me mbee ũsumbĩnĩ ma Yuta meew’a maũndũ asu, mauma nyũmbanĩ ya mũsumbĩ mambata nyũmbanĩ ya Yeova; na mekala vandũ va ũlikĩla mbingĩlonĩ nzaũ ya nyũmba ya Yeova.

11Nĩvo ĩndĩ athembi na athani maneenie na anene me mbee ũsumbĩnĩ na andũ onthe, makyasya, Mũndũ ũũ nĩwaĩlwe nĩ kĩkw’ũ; nĩkwĩthĩwa nũmyathanĩe ndũa ĩno, o tondũ mwĩwie na matũ menyu.

12Nĩvo ĩndĩ Yelemia waneenie na anene onthe me mbee ũsumbĩnĩ na andũ onthe, akyasya, Yeova nũndũmĩte nĩmyathanĩe nyũmba ĩno na ndũa ĩno ndeto syonthe ila mwĩwie.

13Kwondũ wa ũu lũngalyai mĩendele yenyu o na meko menyu, na kwĩw’a wasya wa Yeova Ngai wenyu; na Yeova akeealyũla ũndũ wa ũthũku ũla ũneenete kũmwĩka.

14Ĩndĩ ũndũ wakwa nyie, sisya, nĩ mokonĩ menyu: mbĩkai ũndũ mwĩona wĩ ũseo na wa katĩ.

15Ĩndĩ manyai nesa kana, ethĩwa nĩmũũmbũaa, mwĩyĩetee ene na ndũa ĩno na ala mamĩtwĩe, nthakame ĩte ĩvĩtyo; nũndũ nĩ w’o Yeova nũndũmĩte kwenyu nĩneene ndeto isu syonthe matũnĩ menyu.

16Nĩvo ĩndĩ anene me mbee ũsumbĩnĩ na andũ onthe matavisye athembi na athani: Mũndũ ũũ ndaĩlwe nĩ kĩkw’ũ; nũndũ nũneenete naitũ syĩtwanĩ ya Yeova Ngai waitũ.

17Nĩvo ĩndĩ atumĩa amwe ma nthĩ mookĩlile na maneena na ĩkomano yonthe ya andũ, makyasya,

18Mĩka ũla Mũmolasiti nĩwathanie mĩthenyanĩ ya Esekia mũsumbĩ wa Yuta; na aneena na andũ onthe ma Yuta, akyasya, Ũũ nĩw’o Yeova wa nguthu ũnũkwasya: Saioni ĩkenzwa ta mũũnda, na Yelusaleme ĩkatw’ĩka ivumbu, na kĩĩma kĩla kĩ ĩla nyũmba kĩkatw’ĩka ta kũndũ kũtũlu kwa mũtitũ.

19Esekia mũsumbĩ wa Yuta na Yuta onthe nĩmamũaie? Ndaakĩa Yeova, na kũmwĩsũva Yeova onan’ye ũseo, na Yeova eealyũla ũndũ wa ũthũku ũla waneenie kũmeka? Tweka ũu tũkameka mathayũ maitũ ũthũku mũnene.

20Na ĩngĩ kwaĩ mũndũ ũla wathanie syĩtwanĩ ya Yeova, Ũlia mwana wa Semaia wa ndũa ya Kiliathi‐yealimu; nake nĩwamyathanĩe ndũa ĩno na nthĩ ĩno kwĩanana na ndeto syonthe sya Yelemia.

21Na yĩla mũsumbĩ Yeoiakimu, vamwe na ngũmbaũ syake syonthe, na anene onthe me mbee ũsumbĩnĩ, meewie ndeto syake, mũsumbĩ nĩwatatie kũmũaa; ĩndĩ Ulia eew’a ũu, akĩa, na aindũka, na athi Misili.

22Na mũsumbĩ Yeoiakimu atũma andũ Misili, nao nĩ aa, Elinathani mwana wa Akivoli, na andũ amwe vamwe nake, na mathi Misili;

23na mamumya Ulia Misili, na kũmũtwaa kwa mũsumbĩ Yeoiakimu, nake amũaa na ũvyũ, na ekya kimba kyake vala vaĩ mbũa sya andũ mate ndaĩa.

24Ĩndĩ kw’oko kwa Aikamu mwana wa Savani kwaĩ vamwe na Yelemia, nĩ kana matikamũnengane kw’okonĩ kwa andũ mamũae.

← Chapter 25 Jump to: Chapter 27 →