Jeremiah 39

Kamba (Mbivilia) 1956

← Chapter 38 Jump to: Chapter 40 →

1Na kweethĩwa yĩla Yelusaleme yosiwe (mwaka wa kenda wa kũsumbĩka kwa Nzetekia mũsumbĩ wa Yuta, mwei wa ĩkũmi, Nevukatilesa mũsumbĩ wa Mbaviloni na ita syake syonthe syoka kũkita na Yelusaleme, na syamĩtw’ĩkanĩsya;

2na mwaka wa ĩkũmi na ũmwe wa kũsumbĩka kwa Nzetekia, mwei wa kana, mũthenya wa kenda wa mwei, ndũa ĩsu yavũthũwa),

3na anene onthe me mbee ũsumbĩnĩ ma mũsumbĩ wa Mbaviloni malika, na mekala mbingĩlonĩ ĩla yaĩ katĩ, nao nĩ aa, Nelikali‐saleseli, na Samikali‐nevo, na Salisekimu, na Lavisalisi, na Nelikali‐saleseli, na Lavimaki, vamwe na anene ala angĩ onthe ma mũsumbĩ wa Mbaviloni.

4Na kweethĩwa, Nzetekia mũsumbĩ wa Yuta na andũ onthe ma kaũ mamona, makĩa, na mauma ndũanĩ ũtukũ, na nzĩa ya mũũnda wa mũsumbĩ, makĩvĩtĩla mbingĩlonĩ ĩla yĩ katĩ wa maũvai elĩ; nake aenda elekele mwanda wa Alava.

5Indĩ ita sya Akalitei syamaatĩĩa, na syamũvikĩlĩla Nzetekia ndiĩnĩ sya Yeliko: na syamũkwata, syamũtwaa kwa Nevukatilesa mũsumbĩ wa Mbaviloni ku Livila nthĩ ya Amathi; nake amũtw’ĩĩa sila.

6Nĩvo ĩndĩ mũsumbĩ wa Mbaviloni wamoaĩe ana ma Nzetekia ku Livila ene na metho make; o na mũsumbĩ wa Mbaviloni ooaa anene onthe me ndaĩa ma Yuta.

7Na ĩngĩ amũvũthũanga Nzetekia metho, na kũmwova na mbingũ, amũtwae Mbaviloni.

8Na Akalitei mavĩvya nyũmba ya mũsumbĩ, na nyũmba sya andũ, na mwaki, na maomboa maũvai ma Yelusaleme.

9Nĩvo ĩndĩ Nevusalatani kavuteni wa nguthu ya asũvĩi watwaie Mbaviloni me atave ũtialo wa andũ ala matialilw’e ndũanĩ, o na ala meetilĩle maende nake, na ũtialo wa andũ ala matialile.

10Ĩndĩ Nevusalatani kavuteni wa nguthu ya asũvĩi nĩwatiie ala ngya ma andũ, ala mataĩ na kĩndũ, nthĩ ya Yuta, na amanenga mĩũnda ya mĩsavivũ na mĩũnda o ĩvinda yĩu.

11Na Nevukatilesa mũsumbĩ wa Mbaviloni amwĩaĩa Nevusalatani kavuteni wa asũvĩi ũndũ wa Yelemia, akĩmwĩa,

12Mwose, noimũsũvĩa nesa, na ndũkamwĩke ũthũku; ĩndĩ mwĩke o ũndũ ũkakwĩa.

13Na ĩndĩ Nevusalatani kavuteni wa asũvĩi atũmana, o na Nevusasivani, na Lavisalisi, na Nelikali‐saleseli, na Lavimaki, na anene onthe ma mũsumbĩ wa Mbaviloni;

14nao matũmana, na maumya Yelemia vu nza ya kolokolo, na mamũnengane mokonĩ ma Ngetalia mwana wa Aikamu, mwana wa Savani, amũtwae kwake. Kwondũ wa ũu ekala na andũ.

15Na ĩndĩ ndeto ya Yeova yamũkĩa Yelemia, yĩla waĩ mwove nza ya kolokolo, ĩkĩmwĩa,

16Enda, ũneene na Mũethiovia Eveti‐meleki, ũkĩmwĩa, Ũũ nĩw’o Yeova wa nguthu, Ngai wa Isilaeli, ũnũkwasya: Sisya, ngamĩetee ndũa ĩno ndeto syakwa nĩmĩke ũthũku, na ti kũmĩka ũseo; nasyo ikeanĩw’a mbee waku mũthenya ũsu.

17Ĩndĩ ngakũvonokya mũthenya ũsu, easya ũu Yeova; na ndũkanenganwe mokonĩ ma andũ ala ũmakĩaa.

18Nũndũ nditĩa ũkũtangĩĩa, na ndũkavalukw’a na ũvyũ, ĩndĩ thayũ waku ũkeethĩwa mũtavo waku; nĩkwĩthĩwa nĩwandĩkĩĩe, easya ũu Yeova.

← Chapter 38 Jump to: Chapter 40 →