Jeremiah 27

Kamba (Mbivilia) 1956

← Chapter 26 Jump to: Chapter 28 →

1Wambĩlilyo wa kũsumbĩka kwa Yeoiakimu mwana wa Yosia, mũsumbĩ wa Yuta, ndeto ĩno yamũkĩa Yelemia kuma kwa Yeova, ĩkyasya,

2Ũũ nĩw’o Yeova ũnũũmbĩa: Ĩseũvĩsye tũmĩkwa na masoki, na kwĩkĩa ngingonĩ yaku;

3na mũtwaĩe mũsumbĩ wa Etomu, na mũsumbĩ wa Moavi, na mũsumbĩ wa ana ma Amimoni, na mũsumbĩ wa Tile, na mũsumbĩ wa Sitoni, na moko ma atũmwa ala mokaa Yelusaleme kwa Nzetekia mũsumbĩ wa Yuta:

4na kũmanenga wĩaĩo makatavye mavwana moo, ũkyasya, Ũũ nĩw’o Yeova wa nguthu Ngai wa Isilaeli, ũnũkwasya, Matavyei mavwana menyu atĩĩ:

5Nĩnoombie nthĩ, na andũ na nyamũ ila syĩ ĩũlũ wa nthĩ, kwondũ wa vinya wakwa mũnene na kwondũ wa kw’oko kwakwa kũtambũũku; na nĩnengae o ũla ngwona naĩle kũnenga.

6Na yu nĩnĩnenganĩte nthĩ isu syonthe kw’okonĩ kwa Nevukatilesa mũsumbĩ wa Mbaviloni mũthũkũmi wakwa; o na nyamũ sya kĩtheka nĩnĩmũnengete imũthũkũme.

7Na mbaĩ syonthe ikamũthũkũma we, na mwana wake, na mwĩsukũũe, mũvaka yĩla ĩvinda ya nthĩ yake mwene yĩvika: nĩvo ĩndĩ mbaĩ nyingĩ na asumbĩ anene makamũtw’ĩkĩthya ngombo yoo.

8Na kũkeethĩwa, atĩ ũsumbĩ na mbaĩ ĩla ĩkalea kũthũkũma Nevukatilesa ũsu, mũsumbĩ wa Mbaviloni, na kũlea kwĩkĩa ngingo yayo ĩsokinĩ ya mũsumbĩ wa Mbaviloni, mbaĩ ĩsu ngamĩkũna na ũvyũ, na yũa, na mũimũ, kũvika namĩmina na kw’oko kwake, easya ũu Yeova.

9Ĩndĩ ũndũ wenyu, mũtikethukĩĩsye athani menyu, kana menyu ala maaũasya, kana ndoto syenyu, kana ala mathanaa maũndũ, kana aoi menyu, ala maneenaa nenyu, makĩmwĩa, Mũtikathũkũma mũsumbĩ wa Mbaviloni:

10nũndũ nĩmeũmwathanĩa ũvũngũ, mamumye kũasa na nthĩ yenyu, na nĩ kana nĩmũlũngye, mũkae.

11Ĩndĩ mbaĩ ĩla ĩkekĩa ngingo yayo ĩsokinĩ ya mũsumbĩ wa Mbaviloni, na kũmũthũkũma, mbaĩ ĩsu ngamĩeka ĩkalae nthĩ yoo ene, na makamĩnza, na kwĩkala kw’o, easya ũu Yeova.

12Na naneena na Nzetekia mũsumbĩ wa Yuta kwĩanana na ndeto ii syonthe, ngĩmwĩa, Ĩkĩai ngingo syenyu ĩsokinĩ ya mũsumbĩ wa Mbaviloni, na kũmũthũkũma we na andũ make, na kwĩkala thayũ.

13Nĩkĩ mũkw’e, we na andũ maku, nũndũ wa ũvyũ, na yũa, na mũimũ, o tondũ Yeova ũneenete ũndũ wa mbaĩ ĩla ĩtakamũthũkũma mũsumbĩ wa Mbaviloni?

14Na mũtikethukĩĩsye ndeto sya athani ala maneenaa nenyu, makĩmwĩa, Mũtikathũkũma mũsumbĩ wa Mbaviloni; nũndũ mamwathanĩaa ũvũngũ.

15Nũndũ ndyaamatũma, easya Yeova, ĩndĩ nĩmathanaa ũvũngũ syĩtwanĩ yakwa; nĩ kana nĩmũlũngye, mwae, inyw’ĩ, na athani ala mamwathanĩaa.

16Na ũndũ ũngĩ naneena na athembi na andũ aa onthe, ngĩmea, Ũũ nĩw’o Yeova ũnũkwasya: Mũtikethũkĩĩsye ndeto sya athani menyu ala mamwathanĩaa, makyasya, Sisya, mĩio ya nyũmba ya Yeova ĩkaetwe ĩngĩ mĩtũkĩ kuma Mbaviloni; nũndũ mamwathanĩaa ũvũngũ.

17Mũikamethukĩĩsye; thũkũmai mũsumbĩ wa Mbaviloni, mwĩkale thayũ: ndũa ĩno yĩalyũlĩlwa ĩanzo kĩ?

18Ĩndĩ ethĩwa nĩ athani, na ethĩwa ndeto ya Yeova yĩ nao, mamwĩsũve Yeova wa nguthu yu, kana mĩio ĩla ĩtialĩtw’e nyũmbanĩ ya Yeova, na nyũmbanĩ ya mũsumbĩ wa Yuta, na ku Yelusaleme, ndĩkatwawe Mbaviloni.

19Nũndũ ũũ nĩw’o Yeova wa nguthu ũnũkwasya ũndũ wa ituĩ, na ũndũ wa ũla ũkanga, na ũndũ wa ala matina, na ũndũ wa mĩio ĩla ĩtialĩtw’e ndũanĩ ĩno,

20ĩla Nevukatilesa mũsumbĩ wa Mbaviloni ũtaosa, yĩla wamũtavie Yekonia mwana wa Yeoiakimu, mũsumbĩ wa Yuta, kũmumya Yelusaleme kũthi Mbaviloni, o na anene onthe me ndaĩa ma Yuta na ma Yelusaleme;

21ĩĩ, ũũ nĩw’o Yeova wa nguthu, Ngai wa Isilaeli, ũnũkwasya, ũndũ wa mĩio ĩla ĩtialĩtw’e nyũmbanĩ ya Yeova, na nyũmbanĩ ya mũsumbĩ wa Yuta, na ku Yelusaleme:

22Ĩkatwawa Mbaviloni, nayo ĩkekala kw’o, kũvika mũthenya ũla ngamĩsĩsya, easya ũu Yeova; nĩvo ĩndĩ ngamyambatya, na kũmĩtũnga vaa.

← Chapter 26 Jump to: Chapter 28 →