Jeremiah 40

Kamba (Mbivilia) 1956

← Chapter 39 Jump to: Chapter 41 →

1Ndeto ĩno yamũkĩe Yelemia kuma kwa Yeova, ĩtina wa Nevusalatani kavuteni wa nguthu ya asũvĩi kũmũlekya athi kuma Lama, yĩla waĩ anamũtwaa e mwove na mĩnyolo vamwe na onthe ala matwaiwe me Yelusaleme na Yuta, ala matwaiwe me atave kũvika Mbaviloni.

2Na ũla kavuteni amwosa Yelemia, na amwĩa, Yeova Ngai waku nĩwaneenee vandũ vaa ũthũku ũũ;

3na Yeova nũwũetete, na kwĩka kwĩanana na ũndũ waisye: nũndũ nĩmwamũvĩtanĩsye Yeova, na mũtyaaĩthukĩĩsya wasya wake, kwondũ wa ũu ũndũ ũsu nĩwĩkĩkĩte kwenyu.

4Na yu, sisya, nĩngũũthasya ũmũnthĩ kuma mĩnyololonĩ ĩla yĩ mokonĩ maku. Ethĩwa nũkwona nĩ ũseo kũenda nakwa Mbaviloni, ũka, na ngakũsũvĩa nesa; ĩndĩ ethĩwa nũkwona nĩ ũthũku kũenda nakwa Mbaviloni, eka: sisya, nthĩ yonthe yĩ mbee waku; o vala wĩona ve vaseo na vaĩlu va kũthi, enda vo.

5Na ĩndĩ atanamba kũsyoka, asya, Syoka ĩndĩ kwa Ngetalia mwana wa Aikamu, mwana wa Savani, ũla mũsumbĩ wa Mbaviloni ũmũtw’ĩkĩthĩtye ngavana wa ndũa sya Yuta, noyĩkala nake katĩ wa andũ; kana enda o vala wĩona ve vaseo va kũthi. Na ĩndĩ ũla kavuteni wa nguthu ya asũvĩi amũnenga lĩu na mũthĩnzĩo, na amũlekya athi.

6Nĩvo ĩndĩ Yelemia athi kwa Ngetelia mwana wa Aikamu ku Misiva, na ekala nake katĩ wa andũ ala matialile nthĩ ĩsu.

7Na yĩla makavuteni onthe ma asikalĩ ala maĩ weũnĩ, mo, na andũ moo, meewie kana mũsumbĩ wa Mbaviloni nũmũtw’ĩkĩthĩtye Ngetalia mwana wa Aikamu ngavana wa ĩ nthĩ, na kũmũnenga mokonĩ make aũme, na aka, na syana, na ala ngya mũno ma ĩ nthĩ, ma ala mataatwawa me atave Mbaviloni;

8nĩvo ĩndĩ mamũkĩe Ngetalia ku Misiva, nao nĩ aa, Isumaeli mwana wa Nethania, na Yoanani na Yonathani ana ma Kalea, na Selaia mwana wa Tanumethi, na ana ma Evai Mũnetovathi, na Yesania mwana wa Mũmaaka, mo na andũ moo.

9Na Ngetalia mwana wa Aikamu mwana wa Savani amevĩtĩa mo na andũ moo, akyasya, Mũtikakĩe kũthũkũma Akalitei: ĩkalai nthĩ ĩno, mũthũkũme mũsumbĩ wa Mbaviloni na kũkeethĩwa ũseo kwenyu.

10Ũndũ wakwa nyie, sisya, ngekala Misiva, nĩũngame mbee wa Akalitei ala makatũkĩa: ĩndĩ inyw’ĩ, ũmban’yai mbinyu na mosyao ma ĩvinda ya syũa na mauta, na mũisyĩkĩa mĩionĩ yenyu, na kwĩkalaa ndũanĩ syenyu ila mwosete.

11O ta ũu Ayuti onthe ala maĩ Moavi, na katĩ wa ana ma Amimoni, na Etomu, na nthĩ syonthe, meewie atĩ mũsumbĩ wa Mbaviloni nũtiĩte ũtialo wa Yuta, na kũmaiĩa Ngetalia mwana wa Aikamu, mwana wa Savani;

12nĩvo ĩndĩ Ayuti onthe masyokie kuma kũndũ kw’onthe kũla malũngĩlĩĩlw’e, na mamũkĩa Ngetalia, nthĩ ya Yuta, kũvika Misiva, na moomban’ya mbinyu na mosyao maingĩ ma ĩvinda ya syũa.

13Na ĩngĩ Yoanani mwana wa Kalea, na makavuteni onthe ma asikalĩ ala maĩ maweũnĩ, mamũkĩa Ngetalia ku Misiva,

14na mamũkũlya, Nũũmanya kana Mbaalisi mũsumbĩ wa ana ma Amimoni nũtũmĩte Isumaeli mwana wa Nethania akũae? Ĩndĩ Ngetalia mwana wa Aikamu ndaamaĩkĩĩa.

15Nĩvo ĩndĩ Yoanani mwana wa Kalea waneenie na Ngetalia na kĩmbithĩ ku Misiva, akĩmwĩa, Nĩngũkwĩsũva, ũnenge ũthei nĩende, na ngooaa Isumaeli mwana wa Nethania, na vai mũndũ ũkamanya: akakũaĩa kĩ, Ayuti onthe ala makũmbanĩe manyaĩĩkw’e, na ũtialo wa Yuta ũkyaa?

16Ĩndĩ Ngetalia mwana wa Aikamu amwĩa Yoanani mwana wa Kalea, Ndũkeke ũndũ ũsu; nũndũ nũũneena ũvũngũ ũndũ wa Isumaeli.

← Chapter 39 Jump to: Chapter 41 →