Jeremiah 19

Kamba (Mbivilia) 1956

← Chapter 18 Jump to: Chapter 20 →

1Ũũ nĩw’o Yeova waisye, Enda ũthooe sũva wa yũmba wũmbĩtwe nĩ mũmbi, noyosa amwe ma atumĩa ma andũ, na ma atumĩa ma athembi;

2na ũyumaala ũende mwandanĩ wa mwana wa Inomu, ũla wĩ vala valikĩlawa mbingĩlonĩ yĩtaw’a Alisithi, na kũtavanĩsya kw’o ndeto ila ngakũtavya:

3na kwasya, Ĩthukĩĩsyei ndeto ya Yeova, inyw’ĩ asumbĩ ma Yuta, na ala mũtwĩe Yelusaleme: Ũũ nĩw’o Yeova wa nguthu, Ngai wa Isilaeli, ũnũkwasya, Sisya ngavaetee vandũ va ũthũku, o ũla ũkawĩw’a matũ make makasĩĩlĩla.

4Nĩkwĩthĩwa nĩmandiĩte, na matw’ĩkĩthĩtye vandũ vaa va mũeni, na kwitoeesya vaa ngai ingĩ ũvani, ila mataamanya, mo na aaĩthe moo na asumbĩ ma Yuta, na kusũsya vandũ vaa na nthakame ya ala mate na ĩvĩtyo,

5na nĩmakĩte kũndũ kũtũlu kwa Mbaali, mamũvĩvĩsye Mbaali ana moo mwakinĩ methĩwe nthembo sya kũvĩvw’a; ũndũ ũla ndaawĩaa, kana kũneena, o na ndwaalika kĩlilikanonĩ kyakwa;

6kwondũ wa ũu, sisya, mĩthenya nĩyũkĩte, easya Yeova, ĩla vandũ vaa vatiketwa ĩngĩ Tovethi, kana Mwanda wa mwana wa Inomu, ĩndĩ vaketwa Mwanda wa Kũaĩa.

7Na ngatw’ĩkĩthĩsya mosũanĩo ma Yuta na ma Yelusaleme ma mana vaa; na ngamavalũkya na ũvyũ mbee wa amaitha moo, na kwa moko ma ala mamanthaa mathayũ moo: na simba syoo nganengane syĩthĩwe lĩu wa nyũnyi sya yayaya, na wa nyamũ sya nthĩ.

8Na ngatw’ĩkĩthya ndũa ĩno ũseng’yo, na ya kũtimbwa; kĩla mũndũ ũla wĩmĩvĩtĩla akaseng’a na kũmĩtimba nũndũ wa mothĩn’yo onthe mayo.

9Na ngatuma maya nyama sya mĩĩ ya ana moo na eĩtu moo; na makaya kĩla ũmwe nyama sya mũnyanyae, kũtw’ĩkanĩw’anĩ na ũnyamaonĩ, ũla amaitha moo, na ala mamanthaa mathayũ moo, makamanyamasya naw’o.

10Nĩvo ĩndĩ ũkoaa sũva ũsu atumĩa mene ala maendie vamwe naku,

11na kũmatavya, Ũũ nĩw’o Yeova wa nguthu ũnũkwasya: O tondũ mũndũ wũaa kĩndũ kyũmbĩtwe nĩ mũmbi, kĩla kĩtatonya kũmbwa ĩngĩ kĩthĩwe kĩima, o ta ũu ngooaa andũ aa na ndũa ĩno; na makenzĩa andũ nthĩ kũu Tovethi, kũvika vathela vandũ va kwĩnzĩa nthĩ.

12Ũũ nĩw’o ngaveka vandũ vaa, na ala matwĩe vo, o na kũtw’ĩkĩthya ndũa ĩno ta Tovethi, easya ũu Yeova:

13na nyũmba sya Yelusaleme, na nyũmba sya asumbĩ ma Yuta, ila syavukiw’e, ikethĩwa ta vandũ va Tovethi, o nyũmba syonthe ila ialanĩ syasyo matoeesye nguthu yonthe ya ĩtunĩ ũvani, na kwĩtĩkĩsya ngai ingĩ nthembo sya kũnyuwa.

14Na ĩndĩ Yelemia auma Tovethi, vala Yeova wamũtũmie athanĩe vo; na aũngama nza ya nyũmba ya Yeova, na amea andũ onthe:

15Ũũ nĩw’o Yeova wa nguthu, Ngai wa Isilaeli, ũnũkwasya, Sisya, ngamĩetee ndũa ĩno na tũtũla twayo tw’onthe ũthũku w’onthe ũla natavanisye ĩũlũ wayo; nĩkwĩthĩwa nĩmoomisye ngingo syoo, matikew’e ndeto syakwa.

← Chapter 18 Jump to: Chapter 20 →