Jeremiah 32

Kamba (Mbivilia) 1956

← Chapter 31 Jump to: Chapter 33 →

1Ndeto ĩla yamũkĩe Yelemia kuma kwa Yeova mwaka wa ĩkũmi wa kũsumbĩka kwa Nzetekia mũsumbĩ wa Yuta, naw’o waĩ mwaka wa ĩkũmi na nyanya wa kũsumbĩka kwa Nevukatilesa.

2Ĩvinda yĩu ita sya mũsumbĩ wa Mbaviloni nĩsyatwĩkanĩsye Yelusaleme; na mwathani Yelemia aĩ mwove nza ya kolokolo ũla waĩ nyũmbanĩ ya mũsumbĩ wa Yuta.

3Nũndũ Nzetekia mũsumbĩ wa Yuta aĩ anamwova, akĩkũlya, Nũndũ wa kĩ wathanaa, na kwasya, Ũũ nĩw’o Yeova ũnũkwasya, Sisya, nganengane ndũa ĩno kw’okonĩ kwa mũsumbĩ wa Mbaviloni, nake akamyosa;

4na Nzetekia mũsumbĩ wa Yuta ndakavonoka kuma mokonĩ ma Akalitei, ĩndĩ vate ndĩi akanenganwe kw’okonĩ kwa mũsumbĩ wa Mbaviloni, na akaneena nake kanyw’a kwa kanyw’a, na metho make makoona metho make;

5na akamũtwaa Nzetekia Mbaviloni, na akeethĩwa kw’o kũvika yĩla ngamũendea, easya ũu Yeova: o na ethĩwa mũkokita na Akalitei, mũikaunĩka?

6Na Yelemia asya, Ndeto ya Yeova yambũkĩa, ĩkyasya,

7Sisya, Anameli mwana wa Salumu mwendw’a ĩthe waku akakũkĩa, akĩkwĩa, Thooa mũũnda wakwa, ũla wĩ ndũanĩ ya Anathothi; nĩkwĩthĩwa nĩ ũndũ waku kũthooa, ũwovosye.

8Kwondũ wa ũu Anameli mwana wa mwendw’a asa ambũkĩa nĩ nza ya kolokolo kwĩanana na ndeto ya Yeova, na ambĩa, Nĩngũkwĩsũva, thooa mũũnda wakwa, ũla wĩ Anathothi, ĩla yĩ nthĩ ya Mbenyamini; nũndũ kĩanda kya ũtiĩwa nĩ kyaku, na kũwovosya nĩ kwaku; ĩthooee. Nĩvo ĩndĩ namanyie atĩ ĩsu nĩ ndeto ya Yeova.

9Na namũthooea Anameli mwana wa mwendw’a asa mũũnda ũla waĩ Anathothi, na namũthimĩa mbesa, o sekeli ĩkũmi na mũonza sya vetha.

10Nakwa naandĩka syĩtwa yakwa valũanĩ wa ũthooana, na kũwĩkĩa ũsiĩlo, na kũsyĩta ngũsĩ, na kũmũthimĩa ila mbesa kĩthiminĩ.

11Na ĩndĩ noosa valũa wa kũthooana, ũla weekĩĩtwe ũsiĩlo, kwĩanana na mwĩao o na kĩthĩo, na ũla ũngĩ ũtaĩ ũsiĩlo, me elĩ:

12na ũla valũa wa kũthooana namũnenga Mbaluku mwana wa Nelia, mwana wa Maaseia, Anameli mwana wa mwendw’a asa ene, na ngũsĩ ila syakũsĩĩe ũla valũa wa kũthooana syene, na Ayuti onthe ala mekalile nza ya kolokolo mene.

13Na namwĩaĩa Mbaluku mbee wamo, ngyasya,

14Ũũ nĩw’o Yeova wa nguthu, Ngai wa Isilaeli, ũnũkwasya: Osa mavalũa aa, valũa ũũ wa kũthooana ũla wĩ na ũsiĩlo, na valũa ũũ ũte ũsiĩlo, noimekĩa kĩndũnĩ kya yũmba; nĩ kana mekale mĩthenya mingĩ.

15Nũndũ ũũ nĩw’o Yeova wa nguthu, Ngai wa Isilaeli, ũnũkwasya: Nyũmba na isesi na mĩũnda ya mĩsavivũ ikathoowa ĩngĩ nthĩ ĩno.

16Ĩtina wa kũmũnenga Mbaluku mwana wa Nelia valũa ũsu wa kũthooana, namũvoya Yeova, ngyasya,

17A! Mwĩaĩi Yeova! Sisya, nĩwoombie matu na nthĩ kwondũ wa vinya waku mũnene na kwondũ wa kw’oko kwaku kũtambũũku; vai ũndũ ũkũema,

18ũla wonanasya ũseo wĩ wendo kwa ngili na ngili, na kũĩvanĩsya ũthũku wa aaĩthe kĩthũinĩ kya syana syoo ĩtina woo; Ngai mũnene mwene vinya, Yeova wa nguthu nĩ syĩtwa yake;

19mũnene ũtaonĩ, na ũla wĩ ũtonyi wa kwĩka; ũla metho make masalukĩtye masyaĩtye mĩendele yonthe ya ana ma andũ, kũmũnenga kĩla mũndũ kwĩanana na mĩendele yake, na kwĩanana na ũsyao wa meko make;

20ũla wekie syama na moseng’yo nthĩ ya Misili, o na kũvika ũmũnthĩ, katĩ wa Isilaeli o na katĩ wa andũ nao; na kwĩseũvĩsya syĩtwa, o ũndũ kũilyĩ ũmũnthĩ;

21na waumya andũ maku Isilaeli nthĩ ya Misili na syama, na moseng’yo, na kw’oko kwĩ vinya, na kw’oko kũtambũũku, na ũtĩsyo mũnene;

22na wamanenga nthĩ ĩno, ĩla wamevĩtĩe aaĩthe moo kũmanenga, nthĩ yusũĩte ĩia na ũkĩ wa nzũkĩ;

23nao malika na mamĩmesya; ĩndĩ matyaaĩthukĩĩsya wasya waku, o na matyaaenda mĩaonĩ yaku; matyaaĩka ũndũ o na ũmwe wa onthe ala wameaĩa meke: kwondũ wa ũu nũmaetee ũthũku ũũ w’onthe.

24Sisya, ivumbu, nĩmamyũkĩe ndũa ĩno kũmyosa; na ndũa nĩnenganĩtwe mokonĩ ma Akalitei ala meũmyũkita, nũndũ wa ũvyũ, na yũa, na mũimũ; na ũvoo ũla ũneenete nĩ mwĩanĩsye; na, sisya, naku nũkwona ũu.

25Naku, ame Mwĩaĩi Yeova, nĩwambĩie, Ĩthooee ũla mũũnda na mbesa, noyĩta ngũsĩ; o na kau ndũa nĩnenganĩtwe mokonĩ ma Akalitei.

26Nĩvo ĩndĩ ndeto ya Yeova yamũkĩe Yelemia, ĩkyasya,

27Sisya, ninyie Yeova, Ngai wa mĩĩ yonthe: ve ũndũ ũnema?

28Kwondũ wa ũu Yeova nũnũkwasya: Sisya, nganengane ndũa ĩno mokonĩ ma Akalitei, na kw’okonĩ kwa Nevukatilesa mũsumbĩ wa Mbaviloni, nake akamyosa:

29na Akalitei, ala memyũkita ndũa ĩno, makooka na kũmĩkwatya ndũa ĩno mwaki, na kũmĩvĩvya, vamwe na nyũmba, ila matoeeasya Mbaali ũvani ialanĩ syasyo, na kwĩtĩa ngai ingĩ nthembo sya kũnyuwa, manthatye.

30Nũndũ ana ma Isilaeli na ana ma Yuta nĩmeekie ũla nonaa wĩ ũthũku ki kuma wana woo; nũndũ ana ma Isilaeli nĩmanthatĩtye kwondũ wa wĩa wa moko moo, easya ũu Yeova.

31Nũndũ ndũa ĩno nĩyatw’ĩkie kwakwa kĩtumi kya ũthatu wakwa na wa kũthilĩka kwakwa kuma mũthenya ũla mamyakie o na kũvika ũmũnthĩ; nĩ kana nĩmĩvete nĩeke kũmyona,

32nũndũ wa ũthũku w’onthe wa ana ma Isilaeli na wa ana ma Yuta, ũla meekie manthatye, mo, na asumbĩ moo, na anene moo me mbee ũsumbĩnĩ, na athembi moo, na athani moo, na andũ ma Yuta, na ala matwĩe Yelusaleme.

33Na nĩmambonetye mĩongo, na ti ũthyũ: o na kau nĩnamamanyĩisye, ngyũkĩla tene na ngĩmamanyĩsya, ĩndĩ matyaaĩthukĩĩsya mose ũmanyĩsyo.

34Ĩndĩ nĩmaiie mothatyo moo nyũmbanĩ ĩla yĩtanĩaw’a na syĩtwa yakwa, mamithũkye.

35Na nĩmaakie kũndũ kũtũlu kwa Mbaali, kũla kwĩ mwandanĩ wa mwana wa Inomu, mavĩtĩlye ana moo na eĩtu moo mwakinĩ kwondũ wa Moleki; ũndũ ũla ndaameaĩa, o na ndwaalika kĩlilikanonĩ kyakwa, kana meke ũthatyo ũsu, kũvĩtĩthya Yuta.

36Na kwondũ wa ũu Yeova, Ngai wa Isilaeli, easya, ũndũ wa ndũa ĩno, ĩla inyw’ĩ mũũneena ũndũ wayo atĩĩ: Nĩnenganĩtwe kw’okonĩ kwa mũsumbĩ wa Mbaviloni kwondũ wa ũvyũ, na yũa, na mũimũ:

37Sisya, ngamomban’ya kuma nthĩ syonthe, vala namalũngĩlĩĩlye ũthatunĩ wakwa, na kũthilĩkanĩ kwakwa, na woonĩ wakwa mwingĩ; na ngamaete ĩngĩ vaa, na ngamekalya mate na mũisyo.

38Nao makeethĩwa andũ makwa, nakwa ngeethĩwa Ngai woo:

39na ngamanenga ngoo ĩmwe na nzĩa ĩmwe, nĩ kana mangĩe tene na tene, mone ũseo, o na syana syoo ĩtina woo:

40na ngatianĩa ũtianĩo nao wa tene na tene, atĩ ndikethyũũa na kũeka kũmaatĩĩa, nĩ kana nĩmeke ũseo; na ngeekĩa kũngĩa ngoonĩ syoo, nĩ kana maikandie.

41Ĩĩ, ngamatanĩa nĩmeke nesa, na vate ndĩi ngamavanda nthĩ ĩno na ngoo yakwa yonthe na thayũ wakwa w’onthe.

42Nũndũ ũũ nĩw’o Yeova ũnũkwasya: O tondũ namaetee andũ aa ũthũku ũũ w’onthe mũnene, now’o ngamaetee ũseo w’onthe ũla namathie.

43Na mĩũnda ĩkathoowa nthĩ ĩno ĩla mũũneena ũndũ wayo, Nĩ ĩei, ĩte mũndũ kana nyamũ; nĩnenganĩtwe mokonĩ ma Akalitei.

44Andũ makathooa mĩũnda na mbesa, na kũandĩka masyĩtwa moo mavalũanĩ ma kũthooana, na kũmekĩa ũsiĩlo, na kwĩta ngũsĩ, nthĩ ya Mbenyamini, na ku ndee sya Yelusaleme, na ndũanĩ sya Yuta, na ndũanĩ sya nthĩ yĩ tũlĩma, na ndũanĩ sya nthĩ ndindimalu, na ndũanĩ sya ngalĩ ya Ĩtheo: nũndũ ngamatũnga kuma kũtavwanĩ kwoo, easya ũu Yeova.

← Chapter 31 Jump to: Chapter 33 →