Jeremiah 41

Kamba (Mbivilia) 1956

← Chapter 40 Jump to: Chapter 42 →

1Na kweethĩwa mwei wa mũonza, Isumaeli mwana wa Nethania, mwana wa Elisama, wa ũsyao wa kĩũsumbĩ na ũmwe wa anene ma mũsumbĩ, na andũ ĩkũmi vamwe nake, mamũkĩa Ngetalia mwana wa Aikamu ku Misiva; na maĩa lĩu vamwe ku Misiva.

2Nĩvo ĩndĩ Isumaeli mwana wa Nethania wokĩlile, vamwe na ala andũ ĩkũmi ala maĩ nake, na mamũkũna Ngetalia mwana wa Aikamu, mwana wa Savani na ũvyũ, na mamũaa, ũla mũsumbĩ wa Mbaviloni wamũtw’ĩkĩthĩtye ngavana wa nthĩ.

3O na Isumaeli amoaa Ayuti onthe ala maĩ nake, nao nĩ ala maĩ na Ngetalia, ku Misiva, na Akalitei ala moonekie kw’o, andũ ma kaũ.

4Na kweethĩwa mũthenya wa kelĩ ĩtina wa kũmũaa Ngetalia, na vatyaĩ mũndũ waamanya,

5kwooka andũ kuma Sekemu, na Silo, na Samalia, o andũ mĩongo nyanya, menzete ing’ew’a syoo na matembũangĩte ngũa syoo, na metemangĩte mĩĩ, me na nthembo sya mũtu na ũvumba mokonĩ moo, maetete nyũmbanĩ ya Yeova.

6Na Isumaeli mwana wa Nethania auma ku Misiva amathaũe, akĩĩa aendete: na kweethĩwa, akomana nao, amea, Ũkai vala ve Ngetalia mwana wa Aikamu.

7Na kweethĩwa, malika ndũanĩ katĩ, Isumaeli mwana wa Nethania amoaa, na kũmekya nthĩnĩ wa yĩla ĩima, we, na andũ ala maĩ nake.

8Ĩndĩ kwooneka katĩ woo andũ ĩkũmi ala mamwĩie Isumaeli, Ndũkatũae; nũndũ twĩ na mĩio ya nganũ, na ya mbaale, na ya mauta, na ya ũkĩ wa nzũkĩ, ĩvithĩtwe mũũndanĩ. Kwondũ wa ũu amaeka, na ndaamoaa vamwe na ana‐a‐ĩthe moo.

9Na ĩima yĩla Isumaeli wekisye simba syonthe sya andũ ala wamoaie, vakuvĩ na Ngetalia, (nĩyo yĩla mũsumbĩ Asa wenzie ũndũ wa ũkĩa Mbaasa mũsumbĩ wa Isilaeli), Isumaeli mwana wa Nethania ayusũsya na ala mooaiwe.

10Nĩvo ĩndĩ Isumaeli watwaie me atave ũtialo w’onthe wa andũ ala matialilw’e Misiva, o na eĩtu ma mũsumbĩ, na andũ onthe ala matialilw’e Misiva, ala Nevusalatani kavuteni wa nguthu ya asũvĩi wamatiie mokonĩ ma Ngetalia mwana wa Aikamu; Isumaeli mwana wa Nethania amatwaa me atave, na akũsya eendea ananĩ ma Amimoni.

11Ĩndĩ yĩla Yoanani mwana wa Kalea, na makavuteni onthe ma asikalĩ ala maĩ nake, meewie ũthũku ũsu w’onthe ũla Isumaeli mwana wa Nethania wekie,

12nĩvo ĩndĩ moosie andũ onthe, na mathi kũkita na Isumaeli mwana wa Nethania, na mamwĩthĩa ũtee wa manzĩ maingĩ ala me Ngiveoni.

13Na kweethĩwa atĩ yĩla andũ onthe ala maĩ na Isumaeli moonie Yoanani mwana wa Kalea, na makavuteni onthe ma asikalĩ ala maĩ nake, matana.

14Na kwondũ wa ũu andũ onthe ala Isumaeli wamatwaie me atave kuma Misiva meethyũũa na masyoka, na mathi vala ve Yoanani mwana wa Kalea.

15Ĩndĩ Isumaeli mwana wa Nethania avonoka kuma mokonĩ ma Yoanani vamwe na andũ nyanya, na athi ananĩ ma Amimoni.

16Nĩvo ĩndĩ Yoanani mwana wa Kalea, na makavuteni onthe ma asikalĩ ala maĩ nake, moosie ũtialo w’onthe wa andũ ala wamaumĩtye kwa Isumaeli mwana wa Nethania, kuma Misiva, ĩtina wa kũaa Ngetalia mwana wa Aikamu, nao nĩ aa, andũ ma kaũ, na aka, na syana, na avakũe, ala wamaetete kuma Ngiveoni.

17Nao maenda, na matũa Ngeluthi Kimiamu, ĩla yĩ vakuvĩ na Mbethileemu, maende kũlika Misili,

18nũndũ wa Akalitei; nũndũ nĩmamakĩaa, nũndũ Isumaeli mwana wa Nethania aĩ anamũaa Ngetalia mwana wa Aikamu, ũla mũsumbĩ wa Mbaviloni wamũtw’ĩkĩthĩtye ngavana wa ĩ nthĩ.

← Chapter 40 Jump to: Chapter 42 →